როგორი იყო სავაჭრო ურთიერთობები საქართველოსა და სომხეთს შორის 2024 წელს. მონაცემები
საქართველოსა და სომხეთს შორის ვაჭრობა 2024 წელს
30 იანვარს “ქართული ოცნების” პრემიერ-მინისტრი, ირაკლი კობახიძე სომხეთის რესპუბლიკაში ვიზიტით იმყოფებოდა. სხვა საკითხებთან ერთად, სომხეთის რესპუბლიკის პრემიერ-მინისტრთან, ნიკოლ ფაშინიანთან პირისპირ შეხვედრისას ორ ქვეყანას შორის ეკონომიკური ურთიერთობების გაღრმავებაზე იყო საუბარი.
ვიზიტის ფარგლებში პრემიერ-მინისტრებმა საქართველო-სომხეთის ეკონომიკური თანამშრომლობის მთავრობათაშორისი კომისიის სხდომას უხელმძღვანელეს.
მოგვიანებით, ერთობლივად გამართულ პრესკონფერენციაზე ნიკოლ ფაშინიანმა „მეგობარი“ უწოდა ირაკლი კობახიძეს და თქვა: „[ჩვენი] შეხვედრები ძალიან მნიშვნელოვანია. ეს ცხადჰყოფს, რომ ჩვენი თანამშრომლობა მდიდარი დღის წესრიგის მქონეა“. მან თქვა, რომ 2024 წელს მნიშვნელოვანი მოვლენა იყო ორ ქვეყანას შორის სტრატეგიული პარტნიორობის დეკლარაციის ხელმოწერა.
ამ ვიზიტთან დაკავშირებით bpn-მა ორ ქვეყანას შორის 2024 წლის სავაჭრო ურთიერთობების შესახებ მონაცემები შეაგროვა:
სომხეთსა და საქართველოს შორის სავაჭრო ბრუნვა შემცირდა. საქსტატის მიხედვით, 2024 წელს ქვეყნებს შორის 853.711 მლნ აშშ დოლარის ვაჭრობა შედგა, ეს მაშინ როდესაც წინა წელს აღნიშნული მაჩვენებელი 1.123 მლრდ აშშ დოლარს შეადგენდა.
ამასთან, გასულ წელს, 2023 წელთან შედარებით, საქართველოდან სომხეთში ექსპორტი 787.159 მლნ აშშ დოლარიდან 617.533 მლნ აშშ დოლარამდე შემცირდა. ხოლო, სომხეთიდან იმპორტი 336.529 მლნ აშშ დოლარიდან 236.177 მლნ დოლარამდე.
იმპორტ/ექსპორტი
2024 წელს ქვეყნებს შორის სავაჭრო პროდუქტებს შორის იყო ავტომობილები, საწვავი, სპირტიანი სასმელები და ა.შ.
საქართველოდან სომხეთში ექსპორტირებული ტოპ-5 პროდუქტი:
- მსუბუქი ავტომობილები – 99.658 მლნ აშშ დოლარი
- ეთილის სპირტი არადენატურირებული, სპირტის კონცენტრაციით 80 მოც.%-ზე ნაკლები, სპირტიანი სასმელები – 48.029 მლნ აშშ დოლარი
- ნავთობი და ნავთობპროდუქტები – 22.601 მლნ აშშ დოლარი
- ბულდოზერები, ავტოგრეიდერები, ექსკავატორები, სატკეპნი მანქანები და სხვა – 22.001 მლნ აშშ დოლარი
- სატვირთო ავტომობილები – 14.684 მლნ აშშ დოლარი
სომხეთიდან საქართველოში იმპორტირებული ტოპ-5 პროდუქტი:
- მადნები და კონცენტრატები სპილენძის – 68.904 მლნ აშშ დოლარი
- ნახევარფაბრიკატები ნახშირბადიანი ფოლადისაგან – 24.017 მლნ აშშ დოლარი
- სიგარები, სიგარილები და სიგარეტები თამბაქოს ან მისი შემცვლელებისაგან – 21.622 მლნ აშშ დოლარი
- ბოცები, ბოთლები და სხვა მინის ტევადობები – 20.181 მლნ აშშ დოლარი
- მადნები და კონცენტრატები ძვირფასი ლითონებისა – 16.616 მლნ აშშ დოლარი
ტურიზმი
სომხეთი საქართველოსთვის მესამე ადგილზეა შემოსული ტურისტების რაოდენობით.
ტურიზმის ეროვნული ადმინისტრაციის ინფორმაციით, 2024 წელს საქართველოში სომხეთის 948 299 მოქალაქე შემოვიდა, რაც ვიზიტორების ჯამური რაოდენობის 12.7%-ია. თუმცა, წინა წლის მაჩვენებელთან შედარებით, სომხეთიდან შემომსვლელთა რაოდენობა 1,5%-ით არის შემცირებული.
ფულადი გზავნილები და ინვესტიციები
რაც შეეხება ფულად გზავნილებს, 2024 წლის დეკემბერში სომხეთიდან საქართველოში 1.302 მლნ აშშ დოლარი გადმოირიცხა, ხოლო საქართველოდან აღნიშნულ ქვეყანაში 1.042 მლნ აშშ დოლარი ჩაირიცხა. სტატისტიკის მიხედვით, სომხეთი ფულად გზავნილებში საქართველოსთვის 25 ქვეყანას შორისაა.
საქსტატის მონაცემებით, 2024 წლის მესამე კვარტალში სომხეთიდან საქართველოში 5.777 მლნ აშშ დოლარის ინვესტიცია განხორციელდა, მეორე კვარტალში 3.481 მლნ აშშ დოლარის, ხოლო პირველ კვარტალში 6.905 მლნ აშშ დოლარის. გამოდის, 3 კვარტალში (IV კვარტალი ჯერ ცნობილი არ არის) ჯამურად 16.163 მლნ აშშ დოლარის სომხური ინვესტიციაა განხორციელებული.
