"მთავრობის კურსის გამო, EU-ს ლიდერებმა საქართველოს გაწევრების პროცესი შეაჩერეს" - ევროკავშირის ელჩი
საქართველოს ევროკავშირში გაწევრება შეჩერებულია
საქართველოში ევროკავშირის ელჩის, პაველ ჰერჩინსკის განცხადებით, მთავრობის კურსის გამო, ევროკავშირის ლიდერებმა ქვეყნის ევროკავშირში გაწევრების პროცესი შეაჩერეს. და, ეს პროცესი შეჩერებული იქნება იქამდე, ვიდრე საქართველო ევროკავშირის ღირებულებებიდან დაშორებას გააგრძელებს.
ეს განცხადება ევროკავშირის ელჩმა პრეს-კონფერენციაზე გააკეთა. პაველ ჰერჩინსი გამოეხმაურა ყოველწლიური გაფართოების ანგარიშს, რომელიც ევროკომისიამ 30 ოქტომბერს გამოაქვეყნა.
- პრეზიდენტმა ზურაბიშვილმა არალეგიტიმურად ცნო 26 ოქტომბრის არჩევნები. მისი თქმით, ეს იყო რუსული სპეცოპერაცია
- ბიულეტენების ჩაყრა, დამკვირვებლების გამოძევება, ამომრჩევლის კონტროლი – როგორი იყო არჩევნების დღე საქართველოში
- ოპოზიციური კოალიციები აცხადებენ, რომ არჩევნების შედეგებს არ აღიარებენ
ამ ანგარიშის თანახმად, ევროკომისია არ აპირებს, საქართველოსთან ევროკავშირში შესვლის მოლაპარაკებების დაწყების რეკომენდაცია გასცეს.
რა თქვა ჰერჩინსკიმ, მთავარი აქცენტები
ჰერჩინსკიმ ისაუბრა ანგარიშის გარშემო, რომელიც დღეს, 30 ოქტომბერს გამოაქვეყნა ევროკომისიამ და რომელიც, საქართველოს ნაწილში, რეკომენდაციების შესრულებას ეხებოდა.
პაველ ჰერჩინსკიმ გაიხსენა გასული წელი, როდესაც ევროკომისიამ რეკომენდაცია გაუწია საქართველოსთვის ევროკავშირის კანდიდატის სტატუსის მინიჭებას და შემდეგ, დეკემბერში დეკემბერში ეს რეკომენდაცია ევროკავშირის წევრმა ქვეყნებმა ერთხმად დაადასტურეს.
„როგორც ევროკავშირისთვის, ასევე საქართველოს მოსახლეობისთვის ეს იმედით აღსავსე და დაუვიწყარი დღე იყო, ჩემთვის ეს პროფესიული კარიერის მწვერვალს წარმოადგენდა“, – თქვა ელჩმა და დაამატა, რომ ამ ამბიდან ერთი წლის თავზე, „სამწუხაროდ, ბევრი არაფერი დარჩა საზეიმო“.
„საქართველოს მთავრობის მოქმედების კურსის გამო, ევროკავშირის ლიდერებმა საქართველოს გაწევრიანების პროცესი შეაჩერეს, ის შეჩერებული იქნება იქამდე, სანამ საქართველო ევროკავშირისგან ჩვენი ღირებულებებისა და ჩვენი პრინციპებისგან დაშორებას გააგრძელებს“.
პაველ ჰერჩინსკიმ თქვა, რომ ანგარიში, რომელიც დღეს გამოქვეყნდა, ბოლო ერთი წლის განმავლობაში განვითარებული მოვლენების სამართლიან შეფასებას წარმოადგენს.
ელჩმა დაასახელა სამი მიმართულება, სადაც არის წინსვლა. სამივე ტექნიკურ სფეროს შეეხებოდა. კერძოდ, ელჩმა ახსენა ის, რომ ენერგეტიკის სექტორში ნაწილობრივ დაიწყო ბაზრის დიდი ხნით გადადებული გახსნა. აღინიშნა მზაობა რეფორმების მიმართულებით გარემოს დაცვის, კლიმატის და ნარჩენების მართვის სფეროებში და მესამე, სახელმწიფო შესყიდვების კუთხით მოვლენების განვითარება მნიშვნელოვანი იყო.
„ვისურვებდი, რომ მეტი ასეთი პოზიტიური მიღწევების შესახებ საუბარი შემეძლოს. სამწუხაროდ, მიღწევები დაჩრდილა შემაშფოთებელმა დემოკრატიულმა უკუსვლამ, ევროკავშირის წინააღმდეგ მიმართულმა მტრულმა ნარატივებმა და დეზინფორმაციამ“, – განაცხადა ჰერჩინსკიმ.
მან თქვა, რომ საქართველოს კანდიდატის სტატუსი მიენიჭა იმის გათვალისწინებით, რომ გადაიდგმებოდა ცხრა ნაბიჯი, ძირითადად კანონის უზენაესობასა და დემოკრატიასთან დაკავშირებით.
„სამწუხაროდ, საქართველოს ხელისუფლების მხრიდან არ იყო საკმარისი პოლიტიკური მზაობა აუცილებელი რეფორმების განსახორციელებლად“, – აცხადებს ევროკავშირის ელჩი.
პაველ ჰერჩინსკიმ თქვა, რომ ანგარიში აშკარა უკუსვლაზე მიუთითებს დეზინფორმაციის წინააღმდეგ ბრძოლასთან, პოლიტიკურ პოლარიზაციასთან, არჩევნებთან და ადამიანის უფლებებთან დაკავშირებული ნაბიჯების მიმართულებით.
„უკუსვლა მოხდა იმ სფეროში, რომელსაც ეხება ყველაზე მნიშვნელოვანი თავი, სასამართლო სისტემა და ადამიანის უფლებები. ნება მიბოძეთ ვთქვა, რომ ეს უპრეცედენტოა ქვეყნისთვის, რომელიც ევროკავშირში გაწევრიანებისკენ ისწრაფვის“.
ელჩმა გაიმეორა, რომ ევროკავშირში გაწევრება არის დამსახურებაზე დაფუძნებული და დამსახურებაზე დაფუძნებული დარჩება. ის სრულად დამოკიდებულია თითოეული ქვეყნის მიერ მიღწეულ ობიექტურ წინსვლაზე:
„წელს საქართველომ უკან დაიხია, ხოლო სხვა კანდიდატმა ქვეყნებმა წინ წაიწიეს. რამდენიმე მათგანმა გაწევრიანების შესახებ მოლაპარაკებები გახსნა“.
ევროკავშირის ელჩმა განსაკუთრებული ყურადღება გაამახვილა საქართველოში ჩატარებულ არჩევნებზე.
მან თქვა, რომ საერთაშორისო დამკვირვებლების მიერ აღნიშნული დარღვევები დროულად უნდა გამოიძიონ:
„გამოძიება სწრაფად, გამჭვირვალედ და დამოუკიდებლად უნდა მოხდეს. საერთაშორისო დამკვირვებლებს არ გამოუცხადებიათ, რომ არჩევნები თავისუფალი და სამართლიანი იყო. საპირისპიროც არ უთქვამთ. ამიტომ ეს გამოძიება სასწრაფოდ უნდა ჩატარდეს“.
პაველ ჰერჩინსკიმ თქვა, რომ ევროკავშირი-საქართველოს ურთიერთობების მომავალი ახლა საქართველოს ლიდერების ხელშია.
„ვთავაზობ ხელისუფლებას, ყურადღებით წაიკითხოს გაფართოების შესახებ ამ ანგარიშის 103 გვერდი. ის გვთავაზობს მკაფიო გზას ხელახალი ჩართულობისკენ და გზამკვლევს ევროკავშირში საქართველოს შესაძლო წევრობისკენ. მაგრამ მისი განხორციელება ჭეშმარიტ პოლიტიკურ ნებას მოითხოვს და ასევე დაბრუნებას იმ ღირებულებებისკენ, რომელიც არ განიხილება და ეს ძალიან მნიშვნელოვანია“.
და კიდევ ერთხელ თქვა, ხაზგასმით, რომ „გაფართოების პროცესი დამსახურებაზე დაფუძნებული პროცესია. მან თქვა, რომ საქართველო მხოლოდ იმ შემთხვევაში წაიწევს წინ ევროკავშირის გზაზე, თუ რეფორმებს განახორციელებს:
„საქართველოს მომავალმა მთავრობამ უნდა შეცვალოს კურსი, დაუბრუნდეს დემოკრატიულ პრინციპებსა და ღირებულებებს და ეს უნდა დაიწყოს გამჭვირვალეობით საარჩევნო პროცესთან დაკავშირებით“.
ელჩმა თქვა, რო ევროკავშირის კარი კვლავ ღია რჩება საქართველოსთვის.
“გულწრფელად მჯერა, რომ საქართველოს ხელისუფლება პატივს სცემს საქართველოს მოსახლეობის მისწრაფებებს, რომელიც საქართველოს ევროპულ გზას ყოველთვის მხარს უჭერდა. ნუ დაკარგავთ იმედს!“, – განაცხადა პაველ ჰერჩინსკიმ.
საქართველოს ევროკავშირში გაწევრება შეჩერებულია
