საპატრულო პოლიციის წარმომადგენლები მეტრო “თავისუფლების მოედანთან” და მეტრო “რუსთაველთან” დგანან და მეტროდან ამოსული მოქალაქეებს ჩხრეკენ.
ახალგაზრდებს, რომლებიც აქციაზე მიდიან უმოწმებენ ჩანთებს და პარკებს.
როგორც პოლიციის წარმომადგენლები მედიასთან აცხადებენ, ეს ღონისძიება არის “ზედაპირული დათვალიერება”. თუ რა ინფორმაციის საფუძველზე ტარდება აღნიშნული ღონისძიება, სამართალდამცავები არ აკონკრეტებენ.
ოფიციალური განცხადება მეტროსთან მიმდინარე ღონისძიებების შესახებ ჯერ არ გაუვრცელებია შსს.
პოლიციის ქმედებით გაღიზიანებული მოქალაქეები სამართალდამცავებს წინააღმდეგობას უწევენ, რის გამოც მეტრო სადგურებთან ხმაური იყო.
პოლიციამ რამდენიმე ახალგაზრდა დააკავა. იყო რამდენიმე ინცინდენტი, რომლის დროსაც პოლიცია ახალგაზრდის დაკავებას ცდილობდა, თუმცა როდესაც მოქალაქეებმა ვიდეოკამერები ჩართეს, მათ უკან დაიხიეს. ამის შესახებ თვითმხილველები ტვ პირველი ჟურნალისტს უყვებიან.
უკვე მეშვიდე დღეა რუსთაველის გამზირზე, საქართველოს პარლამენტის შენობასთან ათასობით მოქალაქე “ოცნების” ხელისუფლების გადაწყვეტილებას აპროტესტებს ევროკავშირში გაწევრიანების მოლაპარაკებების შეწყვეტასთან დაკავშირებით.
4 დეკემბერს აქცია 19:00 საათზე დაიწყო. მანამდე სამართალდამცავებმა რეიდები ჩაატარეს ოპოზიციის და აქტივისტების ოფისებსა და სახლებში, დააკავეს ოპოზიციის ერთ-ერთი ლიდერი ნიკა გვარამია.
აქციები და საპროტესტო გამოსვლებია ასევე საქართველოს სხვა დიდ ქალაქებში – ბათუმსა და ქუთაისში.
