საქართველოს საპატრიარქო: პრაიდი არ უნდა ჩატარდეს, ეს არის ცოდვის ლეგალიზება

საქართველოს საპატრიარქო ,,თბილისი-პრაიდთან” დაკავშირებით განცხადებას ავრცელებს და მიმართავს ევროპარლამენტარებს და საქართველოში აკრედიტებულ ელჩებს, რომ თავი შეიკავონ ,,თბილისი პრაიდის“ მხარდაჭერისა და წახალისებისაგან, რადგან საპატრიარქოს აზრით, ეს გამოიწვევს საქართველოში “დასავლური ფასეულობების დისკრედიტაციას”.

“აუცილებელია, ჩვენმა საზოგადოებამ დაინახოს, რომ ევროპული დემოკრატია არ არის ხალხის უდიდესი უმრავლესობის აზროვნებისა და ცხოვრების წესის და მათი რელიგიური გრძნობების უარმყოფელი,” – მიმართავს საპატრიარქო საერთაშორისო თანამეგობრობას.

______________________________________________________________________________

● ოთხი საპროტესტო აქცია ერთ დღეს. თბილისი პროტესტმა მოიცვა – ფოტორეპორტაჟი

● თბილისში ლგბტ აქტივისტები აღლუმისთვის ემზადებიან. ნეონაცისტები კი, მის ჩასაშლელად

• “არასოდეს ვიცი, სახლში ცოცხალი დავბრუნდები თუ არა”

● ცხოვრება სიძულვილის გარემოში. რას ჰყვებიან ლგბტ ადამიანების მშობლები

______________________________________________________________________________

ასევე, საპატრიარქო მოუწოდებს საქართველოს ხელისუფლებას არ დაუშვას პრაიდის კვირეულის ჩატარება:

“მივმართავთ ჩვენს ხელისუფლებას, ადეკვატურად შეაფასონ არსებული ვითარება, იმოქმედონ სახელმწიფო სტაბილურობისა და სამოქალაქო მშვიდობის ინტერესებიდან გამომდინარე და აარიდონ ქვეყანას დესტაბილიზაცია,” -აღნიშნულია განცხადებაში.

ეკლესიის შეფასებით, პრაიდის ორგანიზატორების მიზანია “ცოდვის ლეგალიზება”, “არატრადიციული ცხოვრების წესის პროპაგანდა”, “პროვოცირება და საზოგადოებაში აღიარებულ ზნეობრივ ნორმებთან კონფლიქტში შესვლა”.

“მცირე ჯგუფის მიერ საკუთარი არჩევანის სხვებზე თავსმოხვევა ძალადობაა და … ლახავს სხვის, – ჩვენი საზოგადოების აბსოლუტური უმრავლესობის, უფლებას, თავისუფლებასა და არჩევანს,” – წერია საპატრიარქოს განცხადებაში.

საპატრიარქო აღნიშნავს, რომ “მართლმადიდებელი ეკლესია ყოველთვის ლმობიერია ცოდვილთა მიმართ, მაგრამ არა ცოდვისადმი”.

“ამიტომაც ვინმეს მიმართ გამოვლენილი სიძულვილი და ძალადობა ყოვლად მიუღებელია, მაგრამ, ასევე, მიუღებელია ცოდვით თავმოწონება და სხვებზე ზეგავლენის მოხდენის მცდელობა”.

საპატრიარქო ასევე აღნიშნავს, რომ პრაიდი ” მკვეთრად ნეგატიურ გავლენას” მოახდენს არასრულწლოვანთა ფსიქიკაზე და “ლახავს ბავშვთა საუკეთესო ინტერესებს”.

____________________________________________________________________________

არასამთავრობო ორგანიზაცია Tbilisi Pride, რომელიც ლგბტ თემის უფლებების დაცვის სფეროში მუშაობს, აპირებს პრაიდის კვირეულის ჩატარებას 1-5 ივლისს.

„პრაიდ კვირეული“ თბილისში 1 ივლისს გაიხსნება – მოეწყობა დოკუმენტური ფილმის ჩვენება და ქვიარ მუსიკალური ფესტივალი. კვირეულის კულმინაცია იქნება 5 ივლისს “ღირსების მარში” – ლგბტქ აქტივისტები და მათი მხარდამჭერები თბილისის ცენტრში, რუსთაველის გამზირზე შეიკრიბებიან და მსვლელობას მოაწყობენ.

Tbilisi Pride- ის გეგმებმა გააღიზიანა ექსტრემისტი მემარჯვენეები. ბიზნესმენმა, ულტრა-კონსერვატიული მოძრაობა “ერის” დამფუძნებელმა ლევან ვასაძემ, რომელიც ქვეყანაში ჰომოფობიური და ანტი-ლგბტ მოძრაობის ერთ-ერთი მთავარი ფიგურაა, ხელისუფლებას ულტიმატუმი წაუყენა. 15 ივნისს მან „ქართული ოცნებას“ 10-დღიანი ვადა მისცა მარშის გასაუქმებლად და „გარყვნილების პროპაგანდის“ ამკრძალავი კანონის მისაღებად.

ვასაძის მოთხოვნები ხელისუფლებამ არ დააკმაყოფილა, თუმცა მმართველი გუნდის წარმომადგენლები მიიჩნევენ, რომ თბილისი-პრაიდი არ უნდა ჩატარდეს, რადგან ამ ღონისძიებას სხვადასხვა ძალები პროვოკაციების და დესტაბილიზაციის მოსაწყობად გამოიყენებენ.