პრეზიდენტმა ზურაბიშვილმა არალეგიტიმურად ცნო 26 ოქტომბრის არჩევნები. მისი თქმით, ეს იყო რუსული სპეცოპერაცია
სალომე ზურაბიშვილმა არჩევნები არალეგიტიმურად აღიარა
საქართველოს პრეზიდენტმა სალომე ზურაბიშვილმა, 26 ოქტომბრის არჩევნების დასრულებიდან 24 საათში გამართა ბრიფინგი, სადაც არალეგიტიმური უწოდა არჩევნებს. მისი თქმით, ის არ აღიარებს არჩევნების შედეგს, რადგან “არჩევნები ტოტალურად გაყალბდა”.
ზურაბიშვილის თქმით, არჩევნების გაყალბება მოხდა რუსული მეთოდებით, ახალი ტექნოლოგიების გამოყენებით.
სალომე ზურაბიშვილმა 28 ოქტომბერს, პარლამენტის შენობასთან დაანონსა მასშტაბური აქცია და მოქალაქეებს გაყალბებული არჩევნების გაპროტესტებისკენ მოუწოდა.
პრეზიდენტის ამ განცხადებას წინ უძღოდა კონსულტაციები ბარიერგადალახულ ოთხ ოპოზიციურ საარჩევნო სუბიექტთან. ოთხივე ოპოზიციური ძალა, რომელთაც მოიპოვეს საპარლამენტო მანდატები, უარს ამბობს ამ მანდატებზე და არ აპირებს პარლამენტში შესვლას.
ოპოზიციონერი ლიდერები პრეზიდენტის ზურგს უკან იდგნენ, როდესაც სალომე ზურაბიშვილი პრესისთვის აღნიშნულ განცხადებას აკეთებდა. ეს იყო ერთიანობის ერთგვარი დემონსტრირება.
ერთადერთი პოლიტიკოსი, რომელიც დანარჩენ ოპოზიციასთან არ იდგა, გიორგი გახარია იყო, თუმცა გაკთდა განმარტება, რომ გახარიას პარტიაც იზიარებს ზურაბიშვილის განცხადების სულისკვეთებას და უერთდება მას.
წინასწარი მონაცემებით, 26 ოქტომბრის არჩევნები მმართველმა პარტიამ, “ქართულმა ოცნებამ” მოიგო – ხმების 54 პროცენტი დააგროვა. თუმცა ოპოზიცია და სამოქალაქო საზოგადოების დიდი ნაწილი არჩევნებს გაყალბებულად და მოპარულად მიიჩნევს და მათ შედეგებს არ აღიარებს.
ეს იყო ტოტალური გაყალბება
ეს იყო ტოტალური გაყალბება, ტოტალური წართმევა თქვენი ხმების, – განაცხადა პრეზიდენტმა ბრიფინგზე.
როგორც მან აღნიშნა, არჩევნების გაყალბებისათვის გამოყენებული იყო თანამედროვე ტექნოლოგიები.
“ჩვენ დავესწარით ძალიან უჩვეულო რამეს – ეს იყო გამოყენება ყველა იმ ხერხის, რაც გინახავთ სხვადასხვა ქვეყანაში და ამ ქვეყანაში არჩევნების გასაყალბებლად. პლუს [ეს იყო] დღევანდელი ტექნოლოგიების გამოყენება იმ დონეზე, რომ ტექნოლოგია გამოყენებულ იქნა იმისთვის, რომ გაეთეთრებინა გაყალბება. ასეთ რამ ჯერ არ ყოფილა. ჩვენ ვიყავით მოწმე და მსხვერპლი რუსული სპეცოპერაციის, ჰიბრიდული ომის ერთ-ერთი ახალი ფორმის, რომელიც განხორციელდა ჩვენს ხალხზე, ჩვენს ქვეყანაზე”, – განაცხადა პრეზიდენტმა.
პრეზიდენტის გამოსვლა ძალიან მკაფიო და ცალსახა იყო:
“არ ვაღიარებ ამ არჩევნებს. ამ არჩევნების აღიარება არ შეიძლება. ამის აღიარება არის რუსეთის შემოსვლის აღიარება”, – განაცხადა პრეზიდენტმა.
მისი თქმით, დღეს საქართველოში დარჩენილია ერთადერთი დამოუკიდებელი ინსტიტუტი და ეს არის პრეზიდენტის ინსტიტუტი.
პრეზიდენტმა ჰიბრიდული ომი ახსენა და თქვა, რომ ეს იყო რუსული სპეცოპერაცია:
“ტექნოლოგია გამოყენებული იქნა იმისთვის, რომ გაეთეთრებინა გაყალბება. ასეთი რამ ჯერ არ ყოფილა… ჩატარდა რუსული არჩევნები”, – განაცხადა, მან.
ამასთან, როგორც პრეზიდენტმა აღნიშნა, “ძალიან ბევრი რამ არის გამოსაკვლევი”.
აქცია რუსთაველზე
სალომე ზურაბიშვილმა მოქალაქეებს საპროტესტო, სიმბოლურ აქციაზე დასწრებისკენ მოუწოდა:
“გვინდა მოგიწვიოთ ხვალ საღამოს, 19:00 საათზე რუსთაველზე იმისთვის, რომ ჩვენ ერთად გამოვუცხადოთ მსოფლიოს, რომ არ ვაღიარებთ ამ არჩევნებს”.
როგორც პრეზიდენტმა აღნიშნა, არჩევნების გაყალბებას არ შეეგუებიან.
“უფლებას, ჩატარდეს დემოკრატიული არჩევნები, არავის დავუთმობთ. ეს იქნება სიმბოლური გამოსვლა – ყველანი ერთად”, – განაცხადა პრეზიდენტმა.
ზურაბიშვილის თქმით, ეს იქნება გზავნილი მთელი მსოფლიოსთვის, რომ “არ ვაღიარებთ არჩევნებს”.
მიმართვა საერთაშორისო თანამეგობრობას
პრეზიდენტის გამოსვლის მნიშვნელოვანი ნაწილი საერთაშორისო პარტნიორების მიმაფრთ გაკეთებულ მიმართვას დაეთმო. მან მოუწოდა დასავლეთს, დადგნენ ხალხის გვერდით და არ აღიარონ არჩევნები.
“მინდა მივმართო ჩვენ პარტნიორებს – ევროპელებს, ამერიკელებს, უნდა დაგვიდგეთ გვერდით მოსახლეობას, რადგან ეს არჩევნები არ შედგა, არ არის ლეგიტიმური და ამ არჩევნებს ვერაფერი გახდის ლეგიტიმურს”.
როგორც ზურაბიშვილმა აღნიშნა, „საზღვარგარეთ ყველამ უნდა იცოდეს, რომ საქართველოს დაცვა, საქართველოს მომავლის დაცვა, ამ რეგიონში გეოპოლიტიკური ბალანსის დაცვა, ეს არის ხალხის დაცვა და არა ამ არალეგიტიმურ მთავრობასთან რამე კავშირების დამყარება“.
მან მოუწოდა დასავლეთის ლიდერებს მხარი არ დაუჭირონ “ქართული ოცნების” არალეგიტიმურ მთავრობას.
