საქართველოს პრეზიდენტი სალომე ზურაბიშვილი 31 აგვისტოს გერმანელ კოლეგას, ფრანკ-ვალტერ შტაინმაიერს შეხვდა. ფოტოებს პრეზიდენტის ადმინისტრაცია ავრცელებს. პრეზიდენტის ევროპის ლიდერებთან დაგეგმილ შეხვედრებს ეხმაურება მმართველი პარტიის თავმჯდომარე და აცხადებს, რომ ზურაბიშვილი კონსტიტუციას “უხეშად” არღვევს.
პრეზიდენტის ადმინისტრაციის ცნობით, საქართველოსთვის ევროკავშირის წევრობის კანდიდატი ქვეყნის სტატუსის მინიჭების მხარდასაჭერად სალომე ზურაბიშვილმა ევროპელ ლიდერებთან შეხვედრები სწორედ გერმანიის პრეზიდენტთან ვიზიტით დაიწყო.
ირაკლი კობახიძე: “იმპიჩმენტს 100 ხმა სჭირდება, მას კოლექტიური ნაცმოძრაობის იმედი აქვს“
“ქართული ოცნების” თავმჯდომარე ირაკლი კობახიძე სალომე ზურაბიშვილის ევროპაში ვიზიტთან დაკავშირებით ამბობს, რომ პრეზიდენტს “კოლექტიური ნაცმოძრაობის” იმედი აქვს. კობახიძის განმარტებით, სხვა შემთხვევაში, სალომე ზურაბიშვილი კონსტიტუციას ასე “უხეშად” არ დაარღვევდა. მან ასევე აღნიშნა, რომ პრეზიდენტის იმპიჩმენტს პარლამენტში 100 ხმა სჭირდება.
“ზურაბიშვილს ამ კონსტიტუციაზე ფიცი აქვს დადებული, თუმცა, მას უხეშად არღვევს, რაც, რა თქმა უნდა, ძალიან მძიმე მოვლენაა და ამაზე ჩვენ შესაბამისი რეაგირება გვჭირდება. ამას, რა თქმა უნდა, რეაგირების გარეშე ვერ დავტოვებთ […]
ვიცით, რომ სალომე ზურაბიშვილი ქვეყნის ევროინტეგრაციის ინტერესს უპირისპირდება. მნიშვნელობა არ აქვს, ევროინტეგრაციის საპირისპირო განცხადებებს ის საქართველოს პარლამენტის შენობაში გააკეთებს, თუ საგარეო ვიზიტის განხორციელების დროს. ჩვენს საერთაშორისო პარტნიორებთან ეს ინფორმაცია ისედაც მიდის […]
თქვენ იცით, რომ იმპიჩმენტს 100 ხმა სჭირდება და, რა თქმა უნდა, სალომე ზურაბიშვილს კოლექტიური ნაცმოძრაობის იმედი აქვს. რა თქმა უნდა, ამ გარანტიის გარეშე ის საქართველოს კონსტიტუციას უხეშად არ დაარღვევდა. ზურაბიშვილს გარანტიები მათი საერთო პატრონებისგან აქვს. სალომე ზურაბიშვილსა და ნაციონალურ მოძრაობას საერთო პატრონები ჰყავთ და მას გარანტიები მათი მხრიდან აქვს მიღებული. წინააღმდეგ შემთხვევაში, ის არ გარისკავდა და კონსტიტუციას ასე უხეშად არ დაარღვევდა. საზოგადოება მეტ-ნაკლებად უკვე გათვითცნობიერებულია იმაში, თუ ვის შეიძლება, ამაში ვგულისხმობდეთ. ეს არის გლობალური ომის პარტია”. – თქვა კობახიძემ.
საქართველოს მთავრობა სალომე ზურაბიშვილის გერმანიაში დაგეგმილ ვიზიტს გამოეხმაურა და განაცხადა, რომ პრეზიდენტს უარი გერმანიის გარდა, უკრაინაში ვიზიტზეც უარი ეთქვა. ზურაბიშვილს ასევე უარი ეთქვა შვეიცარიაში, პოლონეთში, ბელგიაში, დანიაში, არაბთა გაერთიანებულ საამიროებში, ბულგარეთში, ჩეხეთსა და ისრაელში დაგეგმილ შეხვედრებზეც.
“შევახსენებთ პრეზიდენტ სალომე ზურაბიშვილს, რომ საქართველოს კონსტიტუციის 52-ე მუხლის პირველი პუნქტის “ა” ქვეპუნქტის შესაბამისად, საქართველოს პრეზიდენტი მხოლოდ საქართველოს მთავრობის თანხმობით ახორციელებს წარმომადგენლობით უფლებამოსილებებს საგარეო ურთიერთობებში, ვინაიდან კონსტიტუციის 54-ე მუხლის პირველი პუნქტის შესაბამისად, ქვეყნის საგარეო პოლიტიკის განხორციელება საქართველოს მთავრობის უფლებამოსილებაა.” – ნათქვამია განცხადებაში.
საქართველოს პრეზიდენტის ადმინისტრაციამ 30 აგვისტოს გამოაქვეყნა განცხადება, რომლის მიხედვით, საქართველოსთვის ევროკავშირის წევრობის კანდიდატი ქვეყნის სტატუსის მინიჭების მხარდასაჭერად პრეზიდენტი სალომე ზურაბიშვილი ევროპელ ლიდერებთან შეხვედრებს იწყებს.
