"დგას საშიშროება, რუსეთმა მოიგოს ის, რაც ვერასდროს მოიგო" - სალომე ზურაბიშვილი მიუნხენის კონფერენციას დაესწრება
სალომე ზურაბიშვილი მიუნხენის კონფერენციაზე
მნიშვნელოვანია, მიუნხენის უსაფრთხოების კონფერენციაზე სხვადასხვა სახელმწიფოს ხელმძღვანელთან მივიტანო გზავნილები, თუ რა ხდება დღეს საქართველოში, სადაც არის არა მხოლოდ დიქტატურა, რუსული რეჟიმი, რეპრესიები, არამედ ის, რომ აქ დგას საშიშროება, რომ რუსეთმა მოიგოს ის, რაც ვერასდროს მოიგო და ეს იყოს პირველი ასეთი მარცხი დასავლეთისთვის – ამის შესახებ საქართველოს მეხუთე პრეზიდენტმა სალომე ზურაბიშვილმა სამოქალაქო საზოგადოების წარმომადგენლებთან შეხვედრის დასრულების შემდეგ განაცხადა.
ზურაბიშვილის თქმით, პლატფორმები, რომლებიც ახლა იქმნება, არის პირველი რეალური პოლიტიკური პროცესი და ეს არის ის პროცესი, რომელსაც ყველა ელოდა.
მიუნხენის უსაფრთხოების კონფერენცია, რომელსაც სალომე ზურაბიშვილი დაესწრება, 14-16 თებერვალს გაიმართება. აშშ-დან მას ვიცე-პრეზიდენტი ჯეი დი ვენსი და უკრაინისა და რუსეთის საკითხებში სპეციალური წარმომადგენელი, კიტ კელოგი დაესწრებიან. კონფერენციას ასევე დაესწრება უკრაინის პრეზიდენტი, ვოლოდიმირ ზელენსკი.
“ქართული ოცნებიდან” კონფერენციაზე მიწვეული არავინ არ არის.
სალომე ზურაბიშვილი:
“გავაგრძელე დღევანდელი შეხვედრები, კიდევ ორ სხვადასხვა პლატფორმას შევხვდი. ერთი იყო ჩემთვის ძალიან მნიშვნელოვანი და საინტერესო – ეს იმ ადამიანებისგან შედგებოდა, ვინც დღეს დგანან ქუჩაში, ის აქტივისტები თუ ინდივიდუალური ჯგუფები, ვინც იყო ამის სათავეში, თუმცა აქ ვერ ვილაპარაკებთ, ვინ აორგანიზებდა, ეს არის ყველა ერთად და ასევე მათი გზავნილები მაინტერესებდა, მათი პრობლემები დღევანდელ დღეს რეპრესიული მანქანის წინაშე და მათი მზადყოფნა, რაც გამოხატეს იმისთვის, რომ ბოლომდე გააგრძელონ ეს ბრძოლა და მე ამ შემართებას ჩავიტან მიუნხენში, რადგან დღევანდელი შეხვედრების მიზანი ეს იყო, რომ ვიცოდე, ყველა შეხვედრის შემდეგ, რა არის ის მთავარი გზავნილები და მთავარი პრობლემები, რაც მე უნდა წავიღო მიუნხენში.
შემდგომ გვქონდა შეხვედრა არასამთავრობო ორგანიზაციების პლატფორმასთან, სადაც ასევე საინტერესო საკითხები წამოიჭრა უფრო გეოპოლიტიკური კუთხით, თუ რამდენად მნიშვნელოვანია, რომ იქ მივიტანო, მითუმეტეს, რომ ეს არის უსაფრთხოების კონფერენცია, სადაც მაღალი დონის ხელმძღვანელები იქნებიან სხვადასხვა სახელმწიფოსი და მათთან მივიტანო ის მთავარი გზავნილი, თუ რა ხდება დღეს საქართველოში, სადაც არის არა მხოლოდ დიქტატურა, რუსული რეჟიმი, რეპრესიები, არამედ ის, რომ აქ დგას საშიშროება, რომ რეალურად რუსეთმა მოიგოს ის, რაც ვერასდროს მოიგო და ეს იყოს პირველი ასეთი მარცხი დასავლეთისთვის, ევროპისთვის და ამერიკის ახალი ადმინისტრაციისთვის.
მე ვარ ძალიან დამუხტული ამ შეხვედრებით, ამდენი მოსაზრებითა და ამდენი გზავნილით. ძალიან სერიოზული პასუხისმგებლობა არის, მაგრამ ამავდროულად ვარ ძალიან კმაყოფილი და ეს გაგრძელდება ხვალაც და ზეგაც იმით, რომ ეს პლატფორმები, რომლებიც იქმნება, არის პირველი რეალური პოლიტიკური პროცესი და ეს კოორდინაცია, რომელიც დაიწყო, ახლა ცოტა მეტად დავალაგებთ და რომ ჩამოვალ, გავაგრძელებთ ამ პროცესს. ეს არის ის პროცესი, რომელსაც, ალბათ, ყველა ელოდა და რომელიც, ჩვენი ყველას ვალდებულებაა, რომ გავაგრძელოთ.“
