საკონსტიტუციო სასამართლოს თავმჯდომარე მერაბ ტურავა გახდა

საქართველოს საკონსტიტუციო სასამართლოს თავმჯდომარედ მერაბ ტურავა აირჩიეს. კენჭისყრის დროს მას 9 მოსამართლიდან მხარი ხუთმა მოსამართლემ დაუჭირა. მერაბ ტურავა საკონსტიტუციო სასამართლოს შემდეგი ხუთი წლის განმავლობაში უხელმძღვანელებს.

საკონსტიტუციო სასამართლოს თავმჯდომარეობისთვის ორი კანდიდატი იბრძოდა: ირინა იმერლიშვილი და მერაბ ტურავა.

საკონსტიტუციო სასამართლოს ცხრა მოსამართლიდან ხუთმა მერაბ ტურავას, ოთხმა კი ირინა იმერლიშვილს დაუჭირა მხარი.

ირინა იმერლიშვილი საქართველოს საკონსტიტუციო სასამართლოში მოსამართლედ საქართველოს ყოფილმა პრეზიდენტმა, გიორგი მარგველაშვილმა ოთხი წლის წინ წარადგინა, მერაბ ტურავა კი საქართველოს პარლამენტის კვოტით, 5 წლის წინ დაინიშნა.

საკონსტიტუციო სასამართლოს ყოფილ თავმჯდომარეს, ზაზა თავაძეს მოსამართლის უფლებამოსილება 15 ივნისს ამოეწურა.