აშშ-ს სახელმწიფო დეპარტამენტის განმარტებით, იურიდიული და ფიზიკური პირები, რომლებიც ოთარ ფარცხალაძესთან ტრანზაქციებს შეასრულებენ, თავს სანქციების საფრთხის წინაშე დააყენებენ. სახდეპის წერილობით პასუხს ტელეკომპანია “ფორმულა” ავრცელებს.
“ფორმულას”მიერ გამოქვეყნებულ წერილში სახელმწიფო დეპარტამენტი გამოხატავს წუხილს საქართველოს ეროვნული ბანკის გადაწყვეტილებასთან დაკავშირებით. ასევე, აშშ-ს საგარეო უწყება საქართველოს საბანკო სისტემას ქვეყნის დემოკრატიულ ისტორიაში ერთ-ერთ საუკეთესო მიღწევას უწოდებს.
“14 სექტემბერს შეერთებულმა შტატებმა სანქციები დაუწესა ქართველ-რუს ოლიგარქ ოთარ ფარცხალაძეს, რომელიც მუშაობდა FSB-სთან, რათა გავლენა მოეხდინა ქართულ საზოგადოებასა და პოლიტიკაზე რუსეთის სასარგებლოდ. მის წინააღმდეგ სანქციები ამოქმედდა ნომერ-14024 აღმასრულებელი ბრძანების შესაბამისად, რომელიც აწესებს სანქციებს რუსეთის ფედერაციის მთავრობის მიერ, სპეციფიკურ, დამაზიანებელ საქმიანობასთან დაკავშირებით.
ვწუხვართ საქართველოს ეროვნული ბანკის გადაწყვეტილებაზე. ფიზიკური და იურიდიული პირები, რომლებიც ახორციელებენ ტრანზაქციებს ფარცხალაძესთან ან ჩვენს მიერ, რუსეთთან დაკავშირებული სანქციების ფარგლებში დასანქცირებულ სხვა პირებთან, საკუთარ თავს, სანქციების რისკის ქვეშ აყენებენ.
საქართველოს საბანკო სისტემა იყო ერთ-ერთი საუკეთესო მიღწევა საქართველოს დემოკრატიულ ისტორიაში. დამოუკიდებელი ეროვნული ბანკი ნებისმიერი ქვეყნის ჯანსაღი ეკონომიკის ქვაკუთხედია“. – ნათქვამია “ფორმულას” მიერ გავრცელებულ წერილში.
საქართველოს ყოფილ გენერალურ პროკურორს, ოთარ ფარცხალაძეს ამერიკის შეერთებულმა შტატებმა სანქციები 14 სექტემბერს დაუწესა. ამერიკული მხარე აცხადებს, რომ სანქციების დაწესება ფარცხალაძის ბ რუსულ “ეფესბესთან” თანამშრომლობას და მის ბიზნესსაქმიანობას უკავშირდება. ამერიკულ მედიაში ფარცხალაძე მოხსენიებული იყო როგორც “ქართველი-რუსი ოლიგარქი”.
თავდაპირველად, ფარცხალაძის დასანქცირების შემდეგ, ეროვნულმა ბანკმა, სანქციების წესიდან გამომდინარე, ფარცხალაძეს პირად ანგარიშებზე წვდომა შეუზღუდა, თუმცა სებ-ის ამ გადაწყვეტილებას “ქართული ოცნების” ლიდერებმა ანტიკონსტიტუციური უწოდეს და მწვავედ გააკრიტიკეს. ამის შემდეგ სებ-მა კვლავ შეცვალა თავისი პოზიცია და ფარცხალაძეს ანგარიშებზე წვდომა აღუდგინა.
ქართველი პოლიტიკოსები და ექსპერტები მიიჩნევენ, რომ სებ-ის ქმედებების უკან ქვეყნის არაფორმალური მმართველი, ბიძინა ივანიშვილი დგას. ისინი ამბობენ, რომ საერთაშორისო სანქციების უგულებელყოფა და ასევე ეროვნულ ბანკზე პოლიტიკური ზეწოლა ქვეყნის პოლიტიკური და ეკონომიკური სტაბილურობისთვის დიდ რისკებს შეიცავს.
ამასთან, იუსტიციის სამინისტრომ 20 სექტემბრის საღამოს გამოაქვეყნა განცხადება, რომელშიც ნათქვამია, რომ უწყება მიზანშეწონილად მიიჩნევს, ყოფილ გენერალურ პროკურორს, ოთარ ფარცხალაძეს საქართველოს მოქალაქეობა ჩამოერთვას. დასკვნა სახელმწიფო სერვისების მართვის სააგენტომ პრეზიდენტს უკვე გაუგზავნა.
