რუსული თვითმფრინავი თბილისის აეროპორტში დაეშვა. რა გამოხმაურება მოჰყვა ამ ფაქტს
რუსული თვითმფრინავი თბილისის აეროპორტში დაეშვა
რუსული თვითმფრინავი თბილისის საერთაშორისო აეროპორტში დაეშვა. ფრენებზე შეზღუდვის მოხსნის შემდეგ ეს მოსკოვიდან პირველი რეისია. პარალელურად აეროპორტთან საპროტესტო აქცია მიმდინარეობს. აქტივისტებმა დღეს, 8 საათზე, პარლამენტთან აქცია დააანონსეს.
რა გამოხმაურება მოჰყვა თბილისში ამ ფაქტს
აშშ-ს ელჩი კელი დეგნანი:
“უახლესი მონაცემები აჩვენებს, რომ მხოლოდ დაახლოებით 130 000 ქართველი ცხოვრობს რუსეთში და მათი უმეტესობა ან ორმაგი რუსეთ-საქართველოს მოქალაქეა ან თუ მათ რუსეთის დატოვება სურდათ შარშან უკვე დატოვეს. სინამდვილეში ეს ეხება იმ, შესაძლოა, მილიონ რუსეთის მოქალაქეს, ვისაც სურს საქართველოში ჩამოსვლა. ეს უმეტესწილად რუსების კომფორტისთვისაა, ვისაც საქართველოში ჩამოსვლა სურთ და არა ქართველებისთვის. შესაბამისად, ვფიქრობ, გასაგებია, რატომ არის ქართველი ხალხი შეშფოთებული. ხალხს სურს უკეთ გაიგოს, ეს რა დაუჯდება საქართველოს.”
საქართველოს პრეზიდენტი სალომე ზურაბიშვილი:
“ქართველი ხალხის წინააღმდეგობის მიუხედავად, რუსეთმა თბილისში არასასურველი რეისი შეასრულა.
არა რუსეთთან ფრენებს!”
საქართველოს პრემიერმინისტრი ირაკლი ღარიბაშვილი:
“საკმაოდ დეტალურად განვმარტეთ, რომ არც ერთი სანქცირებული ავიაკომპანია, არც ერთი სანქცირებული თვითმფრინავი არ იფრენს საქართველოში – ამით ყველაფერი ნათქვამია. მქონდა ევროპელ ლიდერებთან ისლანდიაში შეხვედრები და მათ ავუხსენი, რომ ეს არის ჩვენი ეროვნული ინტერესების შესაბამისი. აქ ახალი და უცხო არაფერია. ეს არის ეკონომიკური, სავაჭრო ურთიერთობების შემადგენელი. ვისაც არ უნდა რომ ქვეყანამ დაძლიოს სიღარიბე, უმუშევრობა, ვაჭრობა-ეკონომიკა იყოს – მარტივად უნდა ითქვას, რომ ეს არის ჩვენი ქვეყნის მტერი… ყველაფერი რაც ჩამოვთვალე, ემსახურება ჩვენი ქვეყნის ინტერესების დაცვას. ყველაფერი არის შესაბამისობაში ჩვენს ეროვნულ პოლიტიკასთან და ასევე საერთაშორისო სანქციებთანაც.”
ზურაბ ჯაფარიძე, პარტია “გირჩი-მეტი თავისუფლება”:
“აზიმუტი დასანქცირებულია უკრაინის მიერ. უკრაინა აზიმუტისთვის ითხოვს საერთაშორისო სანქციებს. აზიმუტის მფლობელები დასანქცირებული არიან უკრაინის მიერ. უკრაინა მათთვის ითხოვს საერთაშორისო სანქციებს. თვითმფრინავების მწარმოებელი კომპანია, რომლებსაც აზიმუტი იყენებს, დასანქცირებულია უკრაინის, ბრიტანეთის და აშშ-ს მიერ. ამ კომპანიის მმართველი დასანქცირებულია, უკრაინის, ბრიტანეთის და აშშ-ს მიერ. ამ კომპანიის ნაწარმოებ თვითმფრინავებზე ევროკავშირმა შეაჩერა უსაფრთხოების სერტიფიცირება.
მეორე ავიაკომპანია, რედ ვინგზი, რომელიც ასევე დაიწყებს ფრენებს, დასანქცირებულია უკრაინის და აშშ-ს მიერ. ევროკავშირმა შვიდასჯერ გაგვიმეორა, რომ საქართველოს საგარეო და უსაფრთხოების პოლიტიკა უნდა იყოს თანხვედრაში ევროკავშირის პოლიტიკასთან, თუ მათთან დაახლოება გვინდა. ევროკავშირში რუსული თვითმფრინავები ვერ ჯდებიან სანქციების გამო, რამე კითხვები დაგრჩათ კიდევ?
ესენი მიზანმიმართულად გვაშორებენ დასავლეთს და გვტენიან რუსეთის ტრაკში, საიდანაც 2 საუკუნის მერე, ბევრი სისხლის ფასად დავიწყეთ გამოძრომა. ესენი მიზანმიმართულად ძირს უთხრიან კანდიდატის სტატუსის მიღებას, ყველანაირად ცდილობენ რომ დასავლეთმა ჩვენზე თქვას უარი. რასაც ახლა აკეთებენ, არაფრით ნაკლებია რუსული კანონის მიღებაზე. ესენი არიან რუსები, ამათ უნდა გაა*ვან.
გაიღვიძეთ, აქ ცხოვრებას თუ აპირებთ, შვილების აქ გაზრდას თუ აპირებთ, ამაზე მნიშვნელოვანი საქმე ახლა არ გაქვთ. ნუ გგონიათ, რომ ეს მარტო პარტიების ან/და არასამთავრობოების საქმეა. არ გარუსდება ეს ქვეყანა არასდროს, მაგრამ რაც უფრო მეტი გაუვათ ამათ ახლა, მით უფრო ძვირი დაგვიჯდება მერე მოტრიალება.
დღეს, 20:00 საათზე, პარლამენტთან.”
ლაშა ბუღაძე, მწერალი:
“ცხადია, მოვლენებს ერთმანეთს არ ვადარებ, მაგრამ შეგრძნება ისეთი მაქვს, რომ “პუტინის თვითმფრინავის” შემოღწევით ჩვენს ქვეყანაში, მე-11 არმიის 25 თებერვლის შემოჭრის მსგავსთან გვაქვს საქმე: ერთგვარ “დაშაქრულ” 25 თებერვალთან, რომელიც იმავე მიზნის მატარებელია, როგორიც 100 წლის წინანდელს ჰქონდა – ჩვენი სუვერენიტეტის ხელყოფა და საქართველოს მოწყვეტა ევროპისგან.
გიგა ოთხოზორიას მკვლელობის დღეს ამ ეფესბეშნიკ-კაგებეშნიკებით შევსებული თვითმფრინავის ჩამოსვლა განსაკუთრებით შეურაცხმყოფელი და ცინიკურია.”
● ამერიკის ელჩი: საკითხავია, რატომ აძლევს პუტინი ამ “საჩუქარს” საქართველოს ახლა
● ევროკავშირი ოცნებას მოუწოდებს, რუსეთის წინააღმდეგ საავიაციო სექტორში დაწესებულ სანქციებს შეუერთდეს
● სენატორები შაჰინი და რიში: საქართველოს მთავრობის უკუსვლა გვაიძულებს ადმინისტრაციას ზომების მიღება ვთხოვოთ
აეროპორტის მიმდებარე ტერიტორიაზე პარტია “დროა” და სამოქალაქო აქტივისტები საპროტესტო აქციას მართავენ. ელენე ხოშტარიას თქმით, პოლიციამ 4 ადამიანი დააკავა. ასევე, “დროას” ლიდერის თქმით, დღეს აქტივისტების დაანონსებულ აქციაზე ბევრი ხალხი უნდა გავიდეს.
რუსეთმა საქართველოს მოქალაქეებისთვის სავიზო რეჟიმი გააუქმა
10 მაისს რუსეთის პრეზიდენტმა ვლადიმერ პუტინმა ხელი მოაწერა საქართველოს მოქალაქეებისთვის სავიზო რეჟიმის გაუქმების შესახებ დოკუმენტს 2023 წლის 15 მაისიდან. მეორე განკარგულებით კი, პუტინმა გააუქმა რუსეთიდან საქართველოში საჰაერო მიმოსვლის აკრძალვა.
დოკუმენტის მიხედვით, გამონაკლისს წარმოადგენენ „მოქალაქეები, რომლებიც შედიან რუსეთის ფედერაციაში შრომითი საქმიანობის განსახორციელებლად ან 90 დღეზე მეტი ვადით, მათ შორის განათლების მიღების მიზნით“.
პუტინმა კიდევ ერთი განკარგულებით რუსეთის პრეზიდენტმა რუსული ავიაკომპანიებისთვის საქართველოში ფრენებზე აკრძალვა მოიხსნა.
დოკუმენტის თანახმად, რუსეთის ფედერაციის პრეზიდენტის 2019 წლის 21 ივნისის ბრძანება ძალადაკარგულად გამოცხადდა, რომელიც რუსულ ავიაკომპანიებს საქართველოსა და რუსეთს შორის ფრენას უკრძალავდა.
სამოქალაქო ავიაციის სააგენტოს ცნობით, რუსული ავიაკომპანია Азимут-ის გარდა, თბილისი – მოსკოვი – თბილისის მიმართულებით რეგულარულ ფრენებს ავიაკომპანია Georgian Airways-იც იწყებს. ავიაკომპანიის მიერ, სამოქალაქო ავიაციის სააგენტოში წარმოდგენილი ფრენის განაცხადის შესაბამისად, ფრენები 20 მაისიდან, კვირაში 7 სიხშირით შესრულდება.
საქართველოს სამოქალაქო ავიაციის სააგენტომ აუცილებელი ნებართვა 16 მაისს გასცა.
ამ დრომდე რუსეთთან სავიზო რეჟიმი ცალმხრივად იყო გაუქმებული. ე.წ. გავრილოვის ღამის შემდეგ კი რუსეთმა 2019 წლის ივლისიდან საქართველოსთან პირდაპირი ფრენებიც შეწყვიტა.
