თბილისში რუსთაველის გამზირის რეაბილიტაციას იწყებენ. ბევრი აქ პოლიტიკურ კონტექსტს ხედავს

რუსთაველის გამზირის რეაბილიტაცია

მომავალი წლიდან თბილისის განვითარების ფონდი რუსთაველის გამზირის სარეაბილიტაციო სამუშოებს იწყებს. ამის შესახებ დედაქალაქის მთავრობის სხდომაზე ქალაქის მერმა, კახა კალაძემ განაცხადა. რეაბილიტაციის პროცესი 2 წელზე მეტხანს გაგრძელდება და მისი დასრულება 2026 წლის ბოლოსთვის იგეგმება.

მისი თქმით, პირველი, რაც გაკეთდება, ეს არის არსებული შენობა-ნაგებობების მოწესრიგება, რადგან, როგორც კალაძე განმარტავს, აქ “არის ძალიან მძიმე მდგომარეობა”.

რას აპირებს მერია

კახა კალაძის ინფორმაციით, ეს არის არსებული შენობების დაზიანებული სახურავები, ფასადები, წყალსაწრეტი ღარები, კონსტრუქციული ნაწილები. რადგან “არის ისეთი შენობები”, რომელიც საჭიროებს გამაგრებით სამუშოებს.

ასევე იგეგმება მოეწყოს თანამედროვე სტანდარტების მხატვრულ-დეკორატიული მინათება, მოწესრიგდეს ფასადზე “ქაოტურად არსებული კომუნიკაციის ქსელები.”

მისივე თქმით, რეაბილიტაციის ბოლო ეტაპი საგზაო ინფრასტრუქტურის მოწესრიგება იქნება, რადგან ამ კუთხით, რუსთაველის გამზირზე “ძალიან მძიმე” მდგომარეობაა.  როგორც დედაქალაქის მერი განმარტავს, შემდეგი ეტაპი იქნება საგზაო ინფრასტრუქტურის მოწესრიგება თავისი მიწისქვეშა კომუნიკაციებით.

“საგზაო სამუშაოები, ალბათ, ბოლოს ჩატარდება, როცა ფასადების ძირითადი ნაწილი მოწესრიგდება.” – ამბობს კალაძე. 

კალაძის მერობის განმავლობაში ვაკეში, ვერაზე, გლდანსა და ისნის რაიონში განხორციელდა მთავარი გამზირების რეაბილიტაცია. იყო შემთხვევები, როცა სამუშაოები დაგეგმილთან შედარებით გაცილებით მეტხანს გაგრძელდა.

ახლა სარეაბილიტაციო სამუშაოები წერეთლის გამზირსა და უნივერსიტეტის ქუჩაზე მიმდინარეობს, რაც პიკის საათებში ქალაქში ფაქტობრივად სატრანსპორტო კოლაფსს იწვევს. ამას ემატება ისიც, რომ ჯერ კიდევ არ მოწესრიგებულა საზოგადოებრივი ტრანსპორტი, არ არის საკმარისი რაოდენობის ავტობუსები, თბილისის მეტრო კი განსაკუთრებით პიკის საათებში ისეთი გადატვირთულია, ზოგჯერ მოქალაქეებს გადაადგილებაც კი უჭირთ.

● თბილისში გადამეტებულ ხმაურზე ჯარიმები იზრდება
● ვაკის პარკში მომხდარი ტრაგედიის საქმეზე ბრალდებული 9 პირიდან რვას პატიმრობა მიესაჯა
● მოაგვარებს თუ არა უსახლკარო ძაღლების პრობლემას საქართველოში ახალი კანონი. რა წერია დოკუმენტში

პოლიტიკური კონტექსტი? 2024 წელს საქართველოში მნიშვნელოვანი არჩევნებია

აღსანიშნავია, რომ 2024 წელი საქართველოში მნიშვნელოვანი საპარლამენტო არჩევნების წელია. მოსახლეობის ნაწილს მიაჩნია, რომ რუსთაველის გამზირის სარეაბილიტაციო სამუშაოები სწორედ მასობრივი შეკრებების და დემონსტრაციების თავიდან ასარიდებლად იწყება.

აი რას წერენ სოციალურ ქსელებში მოქალაქეები:

“მიტინგებს ელოდებიან და რა ქნან უკეთესი ვერ მოიფიქრეს.”

“კარგადაა გათვლილი! როგორც პარლამენტის წინ ფანტანები და გამწვანება გააკეთეს, რომლის მთავარი მიზანი იყო დემონსტრაციაზე გამოსული ხალხისთვის ფართის შემცირება და ხელშეშლა! ასევე, პარლამენტის არჩევნების წელს იწყებენ რუსთაველის რეაბილიტაციას! ნათელია! რუსთაველიც და მიმდებარე ქუჩები იქნება გადაკეტილი, და უბრალოდ, პროტესტის გამოხატვის არეალი არ იარსებებს!!!“

“2 წელს ამბობენ, მაგრამ ეს 5 წელს ნიშნავს ხომ?”

“არ მესმის უსაშველოდ გაჭიანურებული რემონტები, მაგალითად მ/ს ავლაბარი. რამდენი წელია, აბსურდამდე უხარისხოა, დღესაც მინგრეულია და ობიექტზე მომუშავეს ვერ დაინახავთ. რატომ არ არის საჯარიმო სანქციები კონტრაქტებში? სალაპარაკოს რატომ ხდით? ამ პირობებში რუსთაველის გადათხრა პოლიტიკურადაც კი სახიფათოა.”

“მორჩა! აქაც ჩაკეტავს და საცობს შექმნის. დაიტვირთება მეორე ხარისხოვანი ქუჩები. მოსახლეობა ვერც ფანჯარას გააღებს, ვერც ბავშვებს გაუშვებს ქუჩაში სათამაშოდ…რა ვერ გაიგეთ, ამ ადამიანს არ უყვარს თბილისი და ასე ებრძვის.”