რუსეთის საგარეო უწყება აცხადებს, რომ 3+3 ფორმატისთვის საქართველოსთვის კარი ღია რჩება

რუსეთის საგარეო საქმეთა სამინისტრო აცხადებს, რომ 3+3 ფორმატისთვის საქართველოსთვის კარი ღია რჩება.

9 დეკემბერს, საქართველოს საგარეო საქმეთა სამინისტრომ განმარტა, რომ 10 დეკემბრის შეხვედრაში, რომელიც მოსკოვში იმართება, საქართველო მონაწილეობას არ მიიღებდა და ქვეყანა არც 3+3 პლატფორმაში ჩართვას განიხილავს.

3+3 ფორმატის იდეა 2020 წლის მთიანი ყარაბაღის კონფლიქტის შემდეგ, თურქეთის პრეზიდენტმა, რეჯეფ თაიფ ერდოღანმა წამოაყენა.

ფორმატი გულისხმობს ექვსი ერის პლატფორმის შექმნას, რომელშიც მონაწილეობა თურქეთის, აზერბაიჯანის, სომხეთის, საქართველოს, რუსეთისა და ირანის ხელისუფლებებმა უნდა მიიღონ, რათა – როგორც ერდოღანი ამბობს – რეგიონში მშვიდობა დამყარდეს.

ქართული მხარე თავიდანვე უარს ამბობდა 6 ერის პლატფორმაში მონაწილეობაზე. თუმცა ერდოღანმა ეს ინიციატივა კიდევ ერთხელ გაიმეორა 2021 წლის ივნისში, აზერბაიჯანში ვიზიტის დროს.

თურქეთის პრეზიდენტმა მაშინ განაცხადა, რომ კავკასიის რეგიონში მშვიდობის დამყარება რეგიონული კოოპერაციითაა შესაძლებელი და ეს მთელი მსოფლიოსთვის სასიკეთო იქნება.

“არა მხოლოდ აზერბაიჯანი, არამედ რეგიონის ყველა ქვეყანა, სომხეთის ჩათვლით, ასევე მთელი მსოფლიო, მოგებული დარჩება კავკასიაში მშვიდობისა და სიწყნარის არსებობით”, – თქვა ერდოღანმა.

რუსეთის საგარეო უწყების თქმით, 10 დეკემბერს მოსკოვში 3+3 პლატფორმის პირველი კონსულტაცია გაიმართა, რუსეთის (ა. რუდენკო), აზერბაიჯანის (ხ. ხალაფოვა), სომხეთის (ვ. გევორკიანი), თურქეთის (ს. ონალა), და ირანის (ა. ხაგიგიანი) საგარეო საქმეთა მინისტრების მონაწილეობით.

“განვიხილეთ პერსპექტივები მრავალმხრივი რეგიონული გაერთიანების. გაძლიერდა პლატფორმის მუშაობის ფოკუსი პრაქტიკულ საკითხებზე, რაც ყველა მონაწილის ინტერესშია. მათ შორისაა, ნდობის ამაღლება, გაერთიანება სავაჭრო-ეკონომიკური, ტრანსპორტის, კულტურულ-ჰუმანიტარული საკითხების მხრივ და მუქარების საწინააღმდეგოდ ერთობლივი მოქმედება.

“ხუთი ქვეყნის წარმომადგენლებმა გამოხატეს დაინტერესება პლატფორმის მუშაობაში ჩაერთოს საქართველოც, რომლისთვისაც კარი ღია რჩება.” – ნათქვამია რუსეთის საგარეო საქმეთა სამინისტროს განცხადებაში.

● გაიმართა აბაშიძე კარასინის ონლაინ შეხვედრა. საქართველო 3+3 ფორმატში მონაწილეობას არ განიხილავს
● ჟენევის მოლაპარაკებები: რუსეთის დელეგაციამ შეხვედრა დატოვა
● საგარეო საქმეთა სამინისტრო: მიუღებელია მოსკოვის განცხადებები საოკუპაციო ხაზის დელიმიტაციაზე