ფარნები, სიყვარული და ნავალნი. მორიგი აქცია რუსეთში
”სიყვარული შიშზე ძლიერია” – ამ ლოზუნგით ჩატარდა აქცია- ფლეშმობი მთელი რუსეთის მასშტაბთ ოპოზიციის დაკავებული ლიდერის ალექსეი ნავალნის მხარდასაჭერად. აქციის მონაწილეები ქუჩაში გამოვიდნენ და ფარნები აანთეს. ხელისუფლებამ ყველაფერი გააკეთა, რომ ეს ქცია არ დაეშვა.
როგორც აქციის ორგანიზატორებმა ადრე განმარტეს, მისი არსი დაპატიმრებული პოლიტიკოსისადმი მხარდაჭერის დემონსტრირებაა, ისევე სოლიდარობის ერთმანეთის მიმართ, როდესაც თანამოაზრეები ერთმანეთს ქუჩაში ან ეზოში შეხვდებიან.
- “მილიონებს ვერ დაიჭერთ” – რუს ოპოზიციონერ ნავალნის პატიმრობა მიუსაჯეს
- ახალი საპროტესტო აქციები რუსეთში ნავალნის გათავისუფლების მოთხოვნით. ფოტო, ვიდეო
- “თავისუფლება ნავალნის!” მრავალათასიანი აქციები ოპოზიციონერი პოლიტიკოსის მხარდასაჭერად მთელ რუსეთში. ფოტო, ვიდეო
რუსული მედიის ცნობით, კვირის აქციებზე, რომელიც რუსეთის სხვადასხვა ქალაქში ნავალნის მხარდასაჭერად ჩატარდა, 12 ადამიანი დააკავეს.
ფოტოებს აქციიდან ადამიანები სოციალურ ქსელებში აქვეყნებდნენ.
ტვიტერზე ჰეშთეგის ქვეშ #სიყვარულიშიშზეძლიერია 8,000-ზე მეტი პოსტი გამოქვეყნდა. ზოგი წერდა, რომ აქციაში მარტო მონაწილეობდნენ და თანამოაზრეები ვერ ნახეს, მაგრამ მაინც არ ნანობენ.
რუსეთის ოპოზიციის ლიდერი ალექსეი ნავალნი 18 იანვარს აეროპორტში დააკავეს, როდესაც გერმანიიდან დაბრუნდა, სადაც “ნოვიჩოკის” ტიპის მომწამვლელი ნივთიერებით მოწამვლის შემდეგ მკურნალობდა. მან მკვლელობის მცდელობაში რუსეთის ხელისუფლება დაადანაშაულა.
მოგვიანებით, სასამართლომ მას ერთ-ერთ სისხლის სამართლის საქმეზე პირობითი მსჯავრი ნამდვილი პატიმრობით შეუცვალა და თავისუფლების აღკვეთა 2 წლითა და 8 თვით მიუსაჯა.
პოლიტიკოსის გათავისუფლების მოთხოვნით მასობრივი აქციები მთელ რუსეთში 23 და 31 იანვარს ჩატარდა. ხელისუფლებამ საპროტესტო აქციებს დაპატიმრებებით და რეპრესიებით უპასუხა.
სიყვარულის იძულება
აქციის წინა დღეებში რუსეთის ყველა სტრუქტურა აქტიურად ცდილობდა მისი ჩატარებისთვის ხელი შეეშალა.
რუსეთის გენერალურმა პროკურატურამ, საგამოძიებო კომიტეტმა და შინაგან საქმეთა სამინისტრომ გაავრცელეს გაფრთხილება “უკანონო ქმედებებში” მონაწილეობისთვის პასუხისმგებლობის შესახებ.
რუსეთის კომუნიკაციების მარეგულირებელმა ორგანიზაციამ “როსკომნადზორმა” ონლაინ გამოცემებს მოსთხოვა 14 თებერვლის “ფარნების აქციის” ანონსები წაეშალათ. ზოგიერთი დამოუკიდებელი გამოცემა იძულებული გახდა შეესრულებინა ეს მოთხოვნა დაბლოკვის საფრთხის გამო.
აქციის შესახებ მასალის გამო “როსკომნადზორმა” დაბლოკა გამოცემა “სპექტრი”, რომლის რედაქცია ლატვიაში მდებარეობს.
სოციალურ ქსელებში ჯგუფების საშუალებით გაფრთხილებები გაეგზავნა სტუდენტებს, ასევე სკოლის მოსწავლეების მშობლებს. სტუდენტებს მიტინგებში მონაწილეობის გამო უნივერსიტეტებიდან გარიცხვით ემუქრებოდნენ.
ამავე დროს, ახალგაზრდულ საქმეთა ფედერალურმა სააგენტომ რეკომენდაცია მისცა სკოლებსა და უნივერსიტეტებს 14 თებერვალს ქვეყნის მასშტაბით ჩაეტარებინათ კამპანია “რუსეთი – სიყვარულის ქვეყანა”. სტუდენტებს მოუწოდებდნენ ვალენტინობის დღესთან დაკავშირებით “ყველა გარშემომყოფისთვის” ყვავილები დაერიგებინათ.
მთავრობის მომხრე მედიამ სტატიებიც კი გამოაქვეყნა იმის შესახებ, თუ რამდენად საშიშია ფარნის ფუნქცია სმარტფონში და რომ მისი გამორთვა ჯობია.
პუტინი ნავალნის შესახებ
ამავე დროს, რუსეთის პრეზიდენტმა ვლადიმირ პუტინმა კომენტარი გააკეთა ალექსეი ნავალნის მხარდასაჭერად გამართული საპროტესტო აქციების თაობაზე მედიის მთავარ რედაქტორებთან შეხვედრის დროს. მისი აზრით, ნავალნის “იყენებენ”, საპროტესტო აქციები კი კორონავირუსის პანდემიის და ეკონომიკური პრობლემების გამო საზოგადოების უკმაყოფილებას უკავშირდება.
”ამ ფიგურანტს (პუტინი დღემდე თავს იკავებს ნავალნის სახელის ხსენებისგან) ამჟამად იყენებენ, სწორედ მაშინ, როდესაც მსოფლიოს ყველა ქვეყანაში, ჩვენი ჩათვლით, დაღლილობაა, ხალხს გაღიზიანება და უკმაყოფილება დაუგროვდა, მათ შორის მათი ცხოვრების, შემოსავლის დონით”, – თქვა პუტინმა.
მისი თქმით, ”ადამიანის ცხოვრება გაუარესდა, ამიტომ ის ადანაშაულებს ხელისუფლებას” და აქ ახალი არაფერია.
”არსებობს ბევრი ამბიცია, ბევრი ენერგია, მეტი ფულის შოვნის, ხელისუფლებაში მოსვლის სურვილი. […] და ამ ყველაფერს უბრალოდ აქტიურად იყენებენ,” – თქვა პუტინმა.
