“რა დროს კაბების სიგრძეა?” - დაღესტანში დრესკოდის დაწესებამ შესაძლოა ტურისტული სეზონი ჩაშალოს
კორონავირუსის პანდემიის გამო, რუსეთის მოქალაქეების უმეტესობისთვის საზღვარგარეთ დასვენება მიუწვდომელია, ამიტომ ახლა მათ ყურადღება შიდა კურორტებს მიაპყრეს. ზოგიერთმა საინტერესო მიმართულებად დაღესტანი მიიჩნია.
ამ რეგიონში ბევრი სამთო და ბალნეოლოგიური კურორტია, ასევე პლაჟები კასპიის ზღვის სანაპიროზე, რაც ბევრ დამსვენებელს იზიდავს.
მაგრამ, დაღესტნის სასულიერო პირებმა პრევენციის მიზნით, ჯერ კიდევ ტურისტების ჩამოსვლამდე განმარტეს სტუმრებისთვის, რა უნდა ჩაიცვან და როგორ მოიქცნენ, თუკი ამ რესპუბლიკაში სტუმრობას გადაწყვეტენ.
პირველი გაფრთხილება დაღესტნის “მენტალიტეტის გათვალისწინების” აუცილებლობის შესახებ ივლისის შუა რიცხვებში გაისმა, როდესაც რესპუბლიკის მუფთმა განცხადება გამოაქვეყნა. შამილ ალიხანოვმა აღნიშნა, რომ ადგილობრივი მოსახლეობის მხრიდან ისმის პრეტენზიები ტურისტების “შეუსაბამო” ჩაცმულობასთან დაკავშირებით.
• კორონავირუსი ჩრდილოეთ კავკასიაში: უკმაყოფილება ხელისუფლების მიმართ იზრდება
• “ჩაკეტილი ქვეყანა” და ზარალი ეკონომიკისთვის
ტურიზმის ინდუსტრიის წარმომადგენლები სააგენტო “კავკაზსკი უზელთან” საუბრისას სასულიერო პირების მიმართვას აღშფოთებით შეხვდნენ – მათი თქმით, ჩამოსულები ადგილობრივ თავისებურებებს ისედაც ითვალისწინებდნენ. ბევრმა მუფთის განცხადებას ტურიზმისთვის საშიში უწოდა.
”კლიენტი ახლაღა წამოვიდა, მათ შორის ტურისტები. რა დროს კაბების სიგრძეა, ოჯახები გვყავს სარჩენი […] სამუფთომ რეკომენდაციები თავის სფეროში გასცეს, ისინი მე და ჩემს თანამშრომლებს ხომ არ შეგვინახავენ?,”– განუცხადა სააგენტოს კორესპონდენტს ერთ-ერთი რესტორნის ადმინისტრატორმა, ამინატმა.
იგივე აზრის არიან ტურისტებიც. ერთ-ერთი მათგანის თქმით, მან ისედაც იცოდა, რომ უმჯობესი იქნება, თუ დაღესტანში შორტებს არ ჩაიცვამს.
”მაგრამ თუ ისინი მკაცრად იტყვიან ვის და რა უნდა ეცვას, არავინ ჩამოვა. მე თურქეთში, ტუნისში და სხვა მუსლიმურ ქვეყნებში ვარ ნამყოფი, სადაც ტურისტებს დრესკოდს არავინ კარნახობს,”- ამბობს ტურისტი, სახელად მიხაილი.
სამუფთოს განცხადებიდან არ ჩანს, როგორი შეიძლება იყოს შეზღუდვები ტურისტებისთვის. ზოგი შიშობს, რომ ეს შეიძლება იყოს საცურაო კოსტუმების აკრძალვა და კაბებში ბანაობის შეთავაზება.
“კავკაზსკი უზელის” ცნობით, რესპუბლიკაში 127 სასტუმრო, 51 ტურისტული ცენტრი, 23 სანატორიუმი და 47 გესთჰაუსია. ოფიციალურად, დაღესტანში, რომელსაც კორონავირუსის ეპიდემია ჯერ კიდევ არ დაუძლევია, საკარანტინო შეზღუდვები კვლავ მოქმედებს და სასტუმროების გახსნა ჯერჯერობით, აკრძალულია.
მაგრამ ტურისტები მაინც ჩამოდიან და ბინებში, ან ნათესავებთან რჩებიან. როგორც ივნისის ბოლოს ადგილობრივი მედია იუწყებოდა, დაღესტნის მახაჩკალა, რუსეთში ყველაზე პოპულარულ ადგილობრივ მიმართულებათა ათეულში შევიდა.
ეს არ არის პირველი შემთხვევა, როდესაც “ზნეობისთვის მებრძოლებმა” დაღესტანში თავი გამოიჩინეს – ორი წლის წინ მათ კონცერტებისა და ფესტივალების ჩაშლა შეძლეს.
