ბრილიანტები, ვერტმფრენები, ფუფუნებაში ცხოვრება - როგორ ძარცვავდნენ თაღლითები საქართველოდან ათასობით ადამიანს

თაღლითები საქართველოდან

ქართველმა გამომძიებელმა ჟურნალისტებმა, საერთაშორისო მედიებში მომუშავე კოლეგებთან ერთად, გამოავლინეს თაღლითური ქოლცენტრი საქართველოში, რომელიც ადამიანებს მთელი მსოფლიოს მასშტაბით ჰპარავდა უზარმაზარ დანაზოგებს.

ჟურნალისტებმა გაარკვიეს, რომ ეს ქოლცენტრი თბილისის ცენტრში, სახელმწიფო უსაფრთხოების სამსახურის შენობიდან 300 მეტრში მდებარეობდა. ამ ცენტრში მუშაობდნენ ახალგაზრდები საქართველოდან, რომლებმაც კარგად იციან უცხო ენები. ისინი ურეკავდნენ ადამიანებს მსოფლიო მასშტაბით, სთავაზობდნენ სხვადასხვა ფინანსურ გარიგებებში ფულის დაბანდებას და ამ გზით სრულად იპარავდნენ მათ დანაზოგებს.

ამ ჟურნალისტური გამოძიებით ირკვევა, რომ ბოლო 3 წელიწადში, ქართველმა “სკამერებმა” (თაღლითებმა) 6,100-ზე მეტი ადამიანი გაძარცვეს და სულ მცირე 35.3 მილიონი დოლარის შემოსავალი მიიღეს.

ნაძარცვი ფულით ეს ადამიანები ფუფუნებაში ცხოვრობდნენ, მოგზაურობდნენ, იხდიდნენ მდიდრულ ქორწილებს, ყიდულობდნენ ძვირფას სამკაულებს და აწყობდნენ ძვირადღირებულ წვეულებებს.

ამ გამოძიებაზე საერთაშორისო მედიის 30-ზე მეტი ჟურნალისტი 8 თვე მუშაობდა.

გამოძიება დაფუძნებულია შვედეთის საზოგადოებრივი მაუწყებლისთვის წყაროს მიერ მიწოდებულ მასალაზე. გამოძიებას კოორდინირება გაუწია OCCRP-მა, საერთაშორისო საგამოძიებო ჟურნალისტიკის ორგანიზაციამ.

საქართველოდან ჟურნალისტურ გამოძიებაზე მუშაობდნენ: “სტუდია მონიტორი”, “აი ფაქტი” და “ფლანგვის დეტექტორი”.

ქავერის ფოტო: Ⓒ ფლანგვის დეტექტორი

თაღლითები საქართველოდან