გორის ბაღებში ცივა, სამებაში ავარიები გახშირდა, დიცსა და წედისში აქციებია, თელავში კი ჩოგბურთის კორტებს აწყობენ. დაიჯესტი
რეგიონული მედიის დაიჯესტი
მარნეულში, კრიზისულ ცენტრში 10 თვეში 30 საქმე შევიდა
მარნეულში ძალადობის მსხვერპლთა მომსახურების კრიზისულ ცენტრში, ქალთა მიმართ ძალადობაზე 10 თვეში დაახლოებით 30 საქმე შევიდა. როგორც „რადიო მარნეული“ იუწყება, ამ შემთხვევებიდან უმეტესობა მარნეულიდანაა, თუმცა არის რამდენიმე მიმართვა ბოლნისიდან, დმანისიდან და თეთრიწყაროდანაც.
ცენტრის ხელმძღვანელი ეკა ბედიანაშვილი რადიოსთან ამბობს, რომ მსხვერპლებს შორის არიან არასრულწლოვნებიც. და ეს შემთხვევები უკავშირდება ადრეულ ქორწინებას და იძულებით ნიშნობას და ასეთი შემთხვევები ხდება ქალაქებშიც და სოფლებშიც.
ვრცლად: Marneulifm.ge
ქალაქ გორის საბავშვო ბაღებში ისევ არ აქვთ გათბობა
იმის გამო, რომ უკვე დიდი ხანია ბუნერივი აირი არ მიეწოდებათ, გორის ბაღებში ბავშვების გასათბობად ელექტროპლიტებია ჩართული. ბაღებში ელოდებოდნენ, რომ გაზის მიწოდება 15 ნოემბრიდან აღდგებოდა.
როგორც გორის მუნიციპალიტეტის სკოლამდელი აღზრდის სააგენტოს ხელმძღვანელი გიორგი შათირიშვილი ეუბნება გამოცემა Qartli.ge-ს ნოემბრის ბოლომდე ბაღებში გაზის მიწოდება აღდგება.
ვრცლად: Qartli.ge
“ასფალტი დააგეს და სამ ბოძზე ნათურა ვერ შეცვალეს” – ზინობიანში არ არის გარეგანათება
ყვარელში, სოფელ ზინობიანში მცხოვრებლები მერიას გარე განათების სვეტებზე ძველი ნათურების გამოცვლას სთხოვენ.
„სოფელში ასფალტი დააგეს და სამ ბოძზე ნათურა ვერ შეცვალეს. ვიღაც ხომ უნდა ამოწმებდეს ამას?“- ეუბნება ადგილობრივ გამოცემა “სპექტრს” ადგილობრივი გიორგი კიწბაბაშვილი.
ზინობიანი ერთადერთი სოფელია საქართველოში სადაც უდიური თემი ცხოვრობს. ეს თემი საქართველოში აზერბაიჯანიდან არის გადმოსახლებული.
ვრცლად: Speqtri.ge
ამ თემაზე შეგიძლიათ ნახოთ „ჯემნიუსის“ ავტორების მიერ მომზადებული დოკუმენტური ფილმი:
გორში, სოფელ დიცში, კაცები სოფლის მიწების გაყიდვას აპროტესტებენ
გასულ კვირას გორის მუნიციპალიტეტის სოფელ დიცში მოსახლეობამ საპროტესტო აქცია გამართა და მიწების გაყიდვა გააპროტესტა. როგორც გამოცემა „მოზაიკა” იუწყება, დიცში მცხოვრებლები ამბობენ, რომ ბოლო ათ წელიწადში 130 ჰექტარი მიწა გაიყიდა და ეს მიწები ხელისუფლებასთან დაახლოებულმა პირებმა იყიდეს.
ვრცლად: Mozaikanews.ge
გორში, სოფელ წედისში, გაზს, წყალს და ტრანსპორტს ითხოვენ
გასულ კვირას საპროტესტო აქცია იყო გორის კიდევ ერთ სოფელში წედისში. აქ აქციაზე უმეტესად ადგილობრივი ქალები შეიკრიბნენ. ყოველ შემთხვევაში, ასე ჩანს ფოტოზე, რომელიც გამოცემა „მოზაიკამ“ გამოაქვეყნა.
გამოცემა წერს, რომ ქალებმა მოითხოვეს სოფელში გაზი შეიყვანონ, სასმელი წყლის პრობლემა მოაგვარონ და საზოგადოებრივი ტრანპორტის მოძრაობა მოაწესრიგონ.
ვრცლად: Mozaikanews.ge
სოფელ სამებაში, ითხოვენ გზაზე სიჩქარის შემზღუდველები გააკეთონ
ნინოწმინდის მუნიციპალიტეტის სოფელ სამებაში ხალხი ითხოვს გზაზე სიჩქარის შემზღუდველები გააკეთონ. საქმე იმაშია, რომ ეს სოფელი ნინოწმინდის თბილისთან დამაკავშირებელ გზაზეა, ეს გზა კი გადატვირთულია და ხშირად მანქანები დიდი სისწრაფით დადიან. ამ მიზეზით სოფელში ხშირია ავარიები.
ერთ-ერთი ადგილობრივი ნინოწმინდის რადიო „ნორს“ უყვება, რომ მას მანქანამ დაარტყა: „გადავრჩი, ავდექი, მივხვდი, რომ სიარული შემეძლო და მძღოლს ვუთხარი, წადი-მეთქი. მაგრამ ფეხს დღემდე ვმკურნალობ“.
ვრცლად: Nor.ge
მალე ჩოგბურთის სათამაშოდ ყველა თელავში შეიკრიბება
ქალაქ თელავს მალე საერთაშორისო მნიშვნელობის ჩოგბურთის კორტები ექნება. სარემონტო სამუშაოების კორტების კეთილმოსაწყობად უკვე დაიწყო. დაგეგმილია კორტების საფარის განახლება, ჩოგბურთის მოედნის გადახურვა, დამონტაჟდება ტრიბუნები მაყურებლისთვის, მოეწყობა გარე განათება.
გამოცემა „კახეთის ხმის” ინფორმაციით“, გარემონტდება ადმინისტრაციის შენობაც და ასევე, მოეწყობა კაფე-ბარიც. პროექტი საპილოტე რეგიონების ინტეგრირებული განვითარების პროგრამის ფარგლებში განხორციელდება.
ვრცლად: knews.ge
შშმ ბავშვებისთვის ყვარელში ახალი სარეაბილიტაციო ცენტრი გაიხსნა
ყვარელში მცხოვრები, 0-დან 18 წლამდე ასაკის შეზღუდული შესაძლებლობების მქონე ბავშვებისთვის ახალი სარეაბილიტაციო ცენტრი გაიხსნა. ცენტრის მიზანი ბავშვების სოციალური განვითარების ხელშეწყობაა. ამ ეტაპზე ცენტრი 40-ზე მეტ ბავშვს ემსახურება.
როგორც გამოცემა „კახეთის ხმა” წერს, ცენტრი ასოციაცია „ანიკასა“ და ადგილობრივი თვითმმართველობის ინიცივიტითა და ევროკავშირის დაფინანსებით გაიხსნა.
ვრცლად: knews.ge
გურჯაანში მილიონ ნახევარ ლარს დახარჯავენ მერიის შენობის გასარემონტებლად
გურჯაანის მერია, ადგილობრივი ბიუჯეტიდან 1,5 მილიონ ლარს დახარჯავს მერიის შენობის გასარემონტებლად. ტენდერში, რომელიც მერიას 1.501,437 ლარზე ჰქონდა გამოცხადებული, ერთადერთი კომპანია მონაწილეობდა. შპს „გილემმა“ ეს უკონკურენტო ტენდერი 1,485,814 ლარად მოიგო.
ადგილობრივი გამოცემა „სპექტრის“ ინფორმაციით, მერიის შენობის რემონტი დეკემბერშივე დაიწყება და მომდევნო წლის ივნისში დასრულდება.
ვრცლად: Speqtri.ge
ადიგენელმა ფეხბურთელმა გოგოებმა Master League მოიგეს
MasterLeague-ის საქართველოს ჩემპიონატზე, რომელში მონაწილეობასაც ქვეყნის მასშტაბით არაერთი ძლიერი საფეხბურთო გუნდი იღებდა, გამარჯვებულის ტიტული ადიგენის სპორტსკოლის გოგონათა საფეხბურთო გუნდმა „ჭულემ“ მოიპოვა.
გამოცემა „სამხრეთის კარიბჭე“ ფეხბურთელი გოგოების ფოტოსაც აქვეყნებს.
ვრცლად: Sknews.ge
ახალქალაქელმა მოკრივემ ბრინჯაოს მედალი მიიღო მსოფლიო ჩემპიონატში
17 წლის ახალქალაქელმა მოკრივემ, გორ აივაზიანმა, ახალგაზრდულ მსოფლიო ჩემპიონატში ბრინჯაოს მედალი მოიპოვა. გამოცემა „სამხრეთის კარიბჭე“ წე რომ გორი ევროპის 2022 წლის ჩემპიონია.
გამოცემის ცნობით, 54 კგ. წონით კატეგორიაში მებრძოლ17 წლის მოკრივე იაპონიის წარმომადგენელთან, საკაი იუტასთან ანგარიშით 4:1 დამარცხდა.
ვრცლად: Knews.ge
გორის თეატრის ეზოში ბავშვები თავიან საყვარელ წიგნებს ტოვებენ
გორის ცენტრში, თეატრის ეზოში „წიგნის ბუდე“ დადგეს. ხის პატარა ყუთში, რომელსაც სახლის ფორმა აქვს, სკოლის მოსწავლეებმა და გორის უნივერსიტეტის სტუდენტებმა თავიანთი საყვარელი წიგნები დატოვეს.
ამ სახლების იდეა ისაა, რომ ვისაც უნდა წიგნი დატოვოს და ვისაც უნდა, აიღოს, იმ პირობით, რომ წაკითხვის შემდეგ უკან დააბრუნებს. “Qartli.ge-ს“ ინფორმაციით, ეს “პროკრედიტ ბანკისა” და პარლამენტის ეროვნული ბიბლიოთეკის იდეა იყო.
ვრცლად: Qartli.ge
რეგიონული მედიის დაიჯესტი
