რას ელის თბილისი ნატოს სამიტისგან?

ბრიუსელში დღეს, 14 ივნისს ნატოს სამიტი გაიმართება – როგორც საქართველოს საგარეო საქმეთა სამინისტრო აცხადებს, სამიტის დღის წესრიგში საქართველოს საკითხიც მოხვდა.

საქართველოს საკითხი წერია სამიტის იმ ნაწილში, რომელიც წესებზე დაფუძნებული საერთაშორისო წესრიგის მხარდაჭერას ეხება.

როგორც საგარეო უწყების განცხადებაშია ნათქვამი, ბრიუსელის სამიტზე მიღებულ იქნება დასკვნითი დოკუმენტი – კომუნიკე. ქართულ მხარე ელის, რომ ამ კომუნიკეში “ადეკვატურად იქნება ასახული” რამდენიმე კონკრეტული თემა, რომელიც საქართველოს ეხება.

კერძოდ კი, ოფიციალური თბილისი ელის, რომ კომუნიკეში:

● აღნიშნული იქნება პროგრესი, რომელსაც საქართველომ და მისმა მთავრობამ ევროატლანტიკური ინტეგრაციის გზაზე მიაღწია;

● ნატოს მხრიდან კიდევ ერთხელ ხაზგასმით დაფიქსირდება საქართველოს სუვერენიტეტის და ტერიტორიული მთლიანობის მიმართ მხარდაჭერა;

● ყურადღება გამახვილდება იმ მძიმე ვითარებაზე, რომელიც ოკუპირებულ ტერიტოიერბზე არსებობს ჰუმანიტარული და უსაფრთხოების თვალსაზრისით;

● ასევე, თბილისს მოლოდინი აქვს, რომ კომუნიკეში იქნება ჩანაწერი – „საქართველო გახდება ნატოს წევრი“. ეს ფრაზა საქართველოსთან მიმართებაში ნატომ პირველად 2008 წლის ბუქარესტის სამიტზე გამოიყენა. ამჟამად თბილისი მოკავშირეებისგან ელის ბუქარესტის ამ გადაწყვეტილების კიდევ ერთხელ დადასტურებას.

______________________________

ბრიუსელის სამიტის პარალელურად, 14 ივნისს საქართველოს პრემიერ – მინისტრი მონაწილეობას მიიღებს „ბრიუსელის ფორუმში“ , პანელზე სახელწოდებით Investing in resilience. ირაკლი ღარიბაშვილი ისაუბრებს ჰიბრიდულ საფრთხეებზე და საქართველოს გამოცდილებაზე მათთან გამკლავების კუთხით.