რა ვიცით კომპანიაზე, რომელმაც ვაკის პარკის შადრევნის რეაბილიტაცია ჩაატარა
კომპანია გრინსერვისი
კომპანია, რომელიც ვაკის პარკში მერიის დაკვეთით შადრევნის სარეაბილიტაციო სამუშაოებს აწარმოებს, არის შპს “გრინსერვის+”. ამ დროისთვის კომპანიას სახელმწიფოსგან მიღებული აქვს 6 324 286.07 ლარი, რაც საერთო ღირებულების 49 პროცენტია.
13 ოქტომბერს, ახლადრეაბილიტირებული ვაკის პარკის შადრევანში ორ მოზარდს დენმა დაარტყა. ისინი წყალში ჩავარდნილი ბურთის ამოსაღებად ჩავიდნენ. 13 წლის გოგონას გადარჩენა ვერ მოხერხდა, მეორე მოზარდის მდგომარეობა მძიმეა.
სახელმწიფო შესყიდვების სააგენტოს სატენდერო დოკუმენტაციის მიხედვით, შადრევნების კასკადს ბოლო ინსპექტირება 2022 წლის 29 აგვისტოს ჩაუტარდა. ინსპექტირების ანგარიში სქელტანიანი, 533 გვერდიანი დოკუმენტია, რომლის თანახმადაც, ყველა შესრულებული სამუშაო წესრიგშია, წერს “რადიო თავისუფლება”.
თბილისის მერი კახა კალაძე ადასტურებს, რომ ვაკის პარკში ჩატარებული სამუშაოების ცენტრალური კონტრაქტორი იყო „გრინსერვისი“. კალაძე ადასტურებს იმასაც, რომ პროექტი შემოწმებული იყო.
შსს-მ უკვე დაიწყო გამოძიება. კომპანია “გრინსერვისის” დამფუძნებელი, ლაშა ფურცხვანიძე ვაკე-საბურთალოს პოლიციის მთავარ სამმართველოში გამოკითხვაზე დაიბარეს. ფურცხვანიძე გამოკითხვაზე შესვლის წინ ჟურნალისტებს უთხრა, რომ პირადად იყო პასუხისმგებელი შადრევნის გამართულად მუშაობაზე.
ასევე, პოლიციაში იკითხებიან მერიის თანამშრომლები.
“შავი სია”, რომელიც ხელისუფლებამ არ გაითვალისწინა
2018 წელს არასამთავრობო ორგანიზაცია “საერთაშორისო გამჭვირვალობა – საქართველომ” მოუწოდა ხელისუფლებას კორუფციასა და თაღლითობაში მხილებული კომპანიების “შავი სიის” შედგენისკენ. ამ ორგანიზაციების სახელმწიფო შესყიდვებში მონაწილეობა უნდა შეზღუდულიყო.
“კარგი საერთაშორისო პრაქტიკისგან განსხვავებით, საქართველოში კორუფციაზე და თაღლითობაზე ნასამართლევ პირებს სახელმწიფო შესყიდვებში მონაწილეობა არ ეზღუდებათ. იმ შემთხვევაშიც კი, როცა კანონსაწინააღმდეგო ფაქტები სახელმწიფო შესყიდვებში მონაწილეობისას გამოვლინდა”, – წერდა TI და აღნიშნავდა, რომ აღმოსავლეთ ევროპის და ცენტრალური აზიის ანტიკორუფციული ქსელის რეკომენდაციით, საქართველოში კორუფციასთან დაკავშირებული კომპანიების და მათი მენეჯმენტის სახელმწიფო შესყიდვებში მონაწილეობა უნდა შეიზღუდოს.
იქვე არასამთავრობო ორგანიზაცია აღწერდა სქემას, თუ როგორ უვლიდნენ გვერდს კორუფციაში შემჩნეული კომპნანიები “შავ სიას”.
“შავ სიაში“ შემავალი კომპანიის მფლობელებს შეუძლიათ სხვა კომპანია დააფუძნონ და ისე მიიღონ შესყიდვებში მონაწილეობა ან “გაშავებული“ კომპანიით ქვეკონტრაქტორები გახდნენ.
ორგანიზაციას თავის ანგარიშში მოჰყავს სამი მაგალითი, სადაც შესყიდვებში მონაწილეობენ და იმარჯვებენ პირები, ვინც სწორედ სახელმწიფო შესყიდვებში აღმოჩენილი ფაქტების გამო გასამართლდნენ. ამ სამი შემთხვევიდან ერთ-ერთი სწორედ “გრინსერვისია”.
რა ვიცით გრინსერვისზე
2013 წლის დეკემბერში ფინანსთა სამინისტროს საგამოძიებო სამსახურმა ძველი თბილისის რაიონის ყოფილი გამგებელი ლაშა ფურცხვანიძე და მისი ყოფილი მოადგილე კობა ხარშილაძე დააკავა.
გამოძიება წინა ხელისუფლების დროს ჩადენილ კორუფციულ დანაშაულს იძიებდა. საქმეში იკვეთებოდა, რომ ყოფილმა ჩინოვნიკებმა – ფურცხვანიძემ და ხარშილაძემ 2007 წელს თავიანთი ნაცნობების სახელზე ფიქტიურად დააფუძნეს შპს “გრინსერვისი“, სინამდვილეში კი კომპანიის რეალური მფლობელები და ხელმძღვანელები თავად იყვნენ.
შპს „გრინსერვისის“ დაფუძნების ძირითადი მიზანი ის იყო, რომ ამ კომპანიას მონაწილეობა მიეღო და გაემარჯვა ძველი თბილისის გამგეობის მიერ გამოცხადებულ გამწვანებითი სამუშაოების ტენდერებში და ეს მაშინ, როდესაც ძველი თბილისის გამგებელი ლაშა ფურცხვანიძე და მისი მოადგილე სატენდერო კომისიის წევრები იყვნენ.
ეს უკანასკნელები ტენდერებს აცხადებდნენ და შემდეგ თავადვე იგებდნენ მათთვის ხელსაყრელი პირობებით. შპს „გრინსერვისმა” ლაშა ფურცხვანიძის და კობა ხარშილაძის ძველი თბილისის გამგეობაში მოღვაწეობის პერიოდში გამგეობის მიერ გამწვანებით სამუშაოებზე გამოცხადებულ ხუთ სახელმწიფო შესყიდვაში გაიმარჯვა.
2010 წლის 16 ნოემბერს „გრინსერვისის“ ფურცხვანიძემ და ხარშილაძემ, მას შემდეგ რაც აღარ იყვნენ საჯარო მოხელეები, საწარმოს ფიქტიური დამფუძნებლები შეცვალეს და საწარმოს 100 პროცენტიანი წილი თანაბრად გაიყვეს. ასევე, ამავე წელს ამ ორმა კიდევ ერთი კომპანია – შპს „გრინსერვისი+“ დაარსა.
2013 წლამდე „გრინსერვისმა“ 8 მლნ ლარამდე ღირებულების ელექტრონული ტენდერები მოიგო, მათ შორის 407 ათასი ლარი პირდაპირი შესყიდვებიდან მიიღო.
ბრალის წარდგენიდან ერთ წელიწადში ფურცხვანიძემ გამოძიებასთან ითანამშრომლა და მთელი ამ სქემის ნამდვილობა აღიარა. იგი ჯარიმის სანაცვლოდ გაათავისუფლეს, ხარშილაძეს კი ორი წლით პატიმრობა და ჯარიმის გადახდა მიესაჯა.
იმის ნაცვლად, რომ კორუფციაში მხილებული კომპანიისთვის სახელმწიფო შესყიდვებში მონაწილეობა აეკრძალა, “ქართულმა ოცნებამ” ფურცხვანიძესთან ურთიერთობა აღადგინა. ოღონდ ამჯერად სახელმწიფო შესყიდვებში მონაწილეობდა არა “გრინსერვისი”, რომლის წინააღმდეგ იყო საქმე აღძრული, არამედ “გრინსერვის+” (იგივე კომპანია შეცვლილი სახელით).
2013 წლის იანვრიდან “გრინსერვის +” მონაწილეობს სახელმწიფო შესყიდვებში და ამ წლების განმავლობაში რამდენიმე მილიონი აქვს მიღებული სახელმწიფოსგან.
