"პოლიტსაბჭოს პასკვილი შეგვიძლია წავიკითხოთ, როგორც ბოდვითი აშლილობა" - პოლიტოლოგები ოცნების განცხადებაზე
“ქართული ოცნების” განცხადება
ქართველი პოლიტოლოგები და ექსპერტები “ქართული ოცნების” პოლიტსაბჭოს განცხადებას ეხმაურებიან, რომელიც დღეს გავრცელდა.
პოლიტოლოგი პაატა ზაქარეიშვილი დარწმუნებულია, რომ სანქციებს, რომელიც აშშ-მ საქართველოს ხელისუფლების წარმომადგენლების წინააღმდეგ გამოიყენა, დონალდ ტრამპის ადმინისტრაცია “უკან არ წაიღებს“, ხოლო ზაალ ანდრონიკაშვილი ამბობს, რომ “ქართული ოცნების” პოლიტსაბჭოს “პასკვილი” შეგვიძლია წავიკითხოთ, როგორც “ბოდვითი აშლილობა.”
“სოციალური სამართლიანობის ცენტრის” დირექტორის, თამთა მიქელაძის თქმით, “ქართული ოცნების” პროპაგანდას უფრო სერიოზულად უნდა მოვეკიდოთ.
“ქართული ოცნების” პოლიტსაბჭო ავრცელებს განცხადებას, სადაც იმედს გამოთქვამენ, რომ 2030 წლამდე ევროკავშირი ოლიგარქიული გავლენებისა და დიფ სთეითის პრობლემას დაძლევენ. პარტიის განცხადებაში “დამაიმედებელს” უწოდებენ აშშ-ს არჩეული პრეზიდენტის, დონალდ ტრამპის გუნდში გაკეთებულ განცხადებებს დიფ სთეითის შესახებ.
ივანიშვილის პარტიის გავრცელებული ტექსტის მიხედვით, ევროკავშირის ბიუროკრატიის ღირებულებითი მდგომარეობა დღეს უმძიმესია, რაც ევროპარლამენტის მიერ საქართველოსთან დაკავშირებით მიღებული ხუთი რეზოლუციით ყველაზე კარგად გამოიხატა. ამასთან, განცხადების მიხედვით, ქართველი ხალხი იღებს გზავნილს გლობალური ომის პარტიისგან – “ან იომებ, ან დაგსჯით”.
პაატა ზაქარეიშვილი:
“ყველა პრობლემა, რაც დღეს ჩვენ გვაქვს, რომელსაც ქუჩაში და საერთაშორისო დონეზე ვპასუხობთ, 2024 წლიდან გადმოგვყვა. აღნიშნული 2024 წელს უნდა დასრულებულიყო და 2025 წელს არ უნდა გადმოსულიყო. განსაკუთრებით არჩევნებს უნდა ეჩვენებინა ხალხის ნების მკაფიო გამოხატულება, რომელიც იყო და არ დაკანონდა. შესაბამისად, ეს ბრძოლა გრძელდება და ალბათ, ეს ყოველივე წლევანდელ წელს დასრულდება.
ბუნებრივია, საჭიროა შრომა, ბრძოლა, წინააღმდეგობის გაწევა, რათა არ მივიდეთ 2025 წლის ოქტომბრის არჩევნებამდე და მანამდე, გაზაფხულის ფარგლებში, ამ საკითხების მოგვარება მოხდეს. ამისთვის საჭიროა მხოლოდ მკაფიო, მშვიდობიანი პოზიციების გამოხატვა. აშკარად, ევროპა ჩვენ მოგვყვება, უნიკალური სიტუაციაა. ვინც დღეს ეწინააღმდეგება ავტორიტარულ – “ქართულ ოცნების“ რეჟიმს, ვადგენთ არა მარტო საქართველოს შიდა დღის წესრიგს, არამედ ევროკავშირის და აშშ-ს დღის წესრიგს საქართველოსთან მიმართებით. ასევე, არა მარტო საქართველოსთან მიმართებით, ასევე კავკასიის, პოსტსაბჭოთა სივრცესთან მიმართებითაც.
“ქართული ოცნება“ მიხვდა, რომ კუთხეში მოექცა. ისინი ხვდებიან, რომ მოხვდნენ ჩიხში. არ ელოდნენ, ასეთ მკაცრ რეაქციას დასავლეთიდან. მათ არ ეგონათ, რომ ასეთი მკაფიო იქნებოდა დარტყმა. ახლა უნდათ, რომ როგორმე ამ დარტყმას გაუძლონ და შემდეგ გადავიდნენ შეტევაზე.
რაც შეეხება “ქართული ოცნების“ კრიტიკას ჰელსინკის კომისიის თავმჯდომარის, ჯო უილსონის მიმართ: ჯო უილსონი არის ჰელსინკის კომისიის თავმჯდომარე. ის ხედავს რამდენი ენერგია, რესურსი – არა მარტო ფინანსური, ამერიკის შეერთებულმა შტატებმა დახარჯა, რათა სადღაც კავკასიაში, რაღაც მბჟუტავი დემოკრატიის განვითარებისთვის ხელი შეეწყო და ამ მბჟუტავ დემოკრატიას ჰქვია საქართველო. ის ხედავს, როგორ ერთი ხელის მოსმით შეიძლება ეს დაიკარგოს. დემოკრატია ბევრ ქვეყანას დაუკარგავს, მაგრამ მთავარია ქართველი ხალხი ამისთვის იბრძვის. უილსონს თავისი იდეაფიქსები კი არ აქვს, არამედ ხედავს, რომ ქართველი ხალხი ნამდვილად იბრძვის.“
ზაალ ანდრონიკაშვილი:
“ქართული ოცნების” პოლიტსაბჭოს პასკვილი შეგვიძლია წავიკითხოთ, როგორც ბოდვითი აშლილობა, შეთქმულების თეორია და სხვა, მაგრამ ის არის დეკლარაცია იმის შესახებ, რომ: “ქართული ოცნება” წავიდა ესკალაციის გზით, რომ ის უარს ამბობს ახალ არჩევნებზე, რომ მისი მიზანი არის საქართველოს სახელმწიფოს მაქსიმალური ჩამოშლა და მისთვის მაქსიმალური ზიანის მიყენება დროის იმ მონაკვეთში, რომელშიც ის უკანონო ხელისუფლების შენარჩუნებას შეძლებს – ასეთია დავალება, რომელიც ივანიშვილს და ქართულ ოცნებას მიღებული აქვთ.
მეორე მხრივ ეს არის იმის აღიარება, რომ ოცნება საერთაშორისო იზოლაციაშია და რომ აქციებმა ამ თვალსაზრისით დიდი შედეგი გამოიღო. ოცნებას არ აქვს ლეგიტიმურობა არც ქვეყნის შიგნით, არც ქვეყნის გარეთ, საქართველოს პარტნიორები კვლავ საქართველოს პარტნიორები არიან, ოღონდ გადაიქცნენ “ქართული ოცნების” მოწინააღმდეგეებად. ქართველ ხალს ჰყავს ძალიან ძლიერი მოკავშირეები.
გაგრძელდება ორმაგი წნეხი: აქციები შიგნით და სანქციები გარეთ – რომელთა ძალა და მოცულობა გაფართოვდება. გაგრძელდება რეჟიმიდან გამოქცეული ჩინოვნიკების აღიარებები.
მაგრამ არ უნდა გვქონდეს იმის ილუზია, რომ ოცნების ჩამოშლა იქნება ადვილი – ამას დასჭირდება სიმტკიცე და დრო. რამდენი დრო, ძნელი სათქმელია, მაგრამ მზად უნდა ვიყოთ ხანგრძლივი ალყისათვის. შედეგიანი იქნება აქციების გაფართოება და პოლიტიკური და ეკონომიკური ეფექტის მქონე გაფიცვები.”
თამთა მიქელაძე:
“მე მგონია, რომ ქართული ოცნების პროპაგანდას უფრო სერიოზულად უნდა მოვეკიდოთ. მათი პრიმიტიული მითოლოგემები და შეთქმულების თეორიები საზოგადოების ნაწილში “მუშაობს” და ამას სჭირდება არა დაცინვა, არამედ მუშაობა ჩვენი მხრიდან.
— რა არის იმის სისტემური მიზეზები, რომ ეს პროპაგანდა მუშაობს?
კრიზისში მყოფი განათლების სისტემა და პოლიტიკური ელიტების დაინტერესება, რომ ჩვენი მოსახლეობის დიდი ნაწილი დატოვონ უმეცრებაში და უთანასწორობაში;
არაერთი რეგიონის კულტურული გამოფიტვა და იქ საბაზისო კულტურული ინფრასტრუქტურისა და პრაქტიკების არარსებობა;
წლების განმავლობაში ეკლესიებში ნაწარმოები იდეოლოგია, რომელიც ესქატოლოგიურ შიშებზე, შეთქმულების თეორიებზე, დასავლეთის გახრწნილებისა და აღმოსავლურ ქრისტიანობის სიწმინდის იდეებზე დგას;
კულტურული ტრავმები, რომლებიც ომს, კონფლიქტებს უკავშირდება და ამ ტრავმების ეფექტიანი ინსტრუმენტალიზება პროპაგანდის მიერ;
უნდობლობა მეინსტრიმული მედიისა და აზრის შემქმნელების მიმართ, ასევე პოლარიზაციის სტრატეგიის ორმხრივი გამოყენება, რამაც შეუძლებელი გახადა დიალოგი, ნდობის შენება და ერთმანეთზე გავლენის მოხდენის, ტრანსფორმაციის შესაძლებლობები სხვადასხვა პოლუსების გარშემო ორგანიზებული საზოგადოებების მიმართ;
– ამ სისტემური მიზეზების დაძლევა აქ და ახლა რთულია,
მაგრამ მინიმუმ რისი გაკეთება შეიძლება მალევე:
საზოგადოებრივი მაუწყებლისთვის ბრძოლა უნდა გაგრძელდეს და ჩვენ უნდა მოვახერხოთ ამ რესურსის საზოგადოების ინტერესებში ჩართვა;
ოპოზიციურმა ტელევიზიებმა მათი სივრცეები უნდა გახსნან საზოგადოებისთვის მნიშვნელოვანი საკითხებისა და შინაარსებისთვის. სივრცე უნდა დაეთმოს სხვადასხვა სოციალური ჯგუფის წარმომადგენლებს და დისკუსია გახადონ უფრო ინკლუზიური, სანდო და საზოგადოებრივი;
პოლიტიკურმა პარტიებმა და ლიდერებმა, ასევე აზრის ლიდერებმა უნდა ილაპარაკონ, ახსნან პროცესები და არა გაიმეორონ ერთი და იგივე მოწოდებები, რომლებიც შინაარსისგან არის დაცლილი;
ომის შიშების საპასუხოდ უნდა დამუშავდეს ნამდვილი მშვიდობისა და უსაფრთხოების სტრატეგია და კონცეფციები და ამის შესახებ სერიოზულად უნდა საუბრობდნენ პარტიები, ექსპერტები და ა.შ. მაგრამ კიდევ ერთხელ, პასუხები და გზავნილები ჯერ კარგად უნდა დამუშავდეს.
აქვე არ დაგვავიწყდეს ქართული ოცნების ინტელექტუალების პასუხისმგებლობის საკითხი, მათ რიგებშია მაგალითად ზაზა შათირიშვილი, რომელიც ყოველთვის იყო შარლატანი, ვითომ პლატონისტი, რომელსაც ალბათ გონია, რომ ის როგორც ნამდვილი ფილოსოფოსი ახლა მართავს პოლიტიკას და საკუთარი წვლილი შეაქვს საქართველოს მშვიდობის და ნამდვილი ქრისტიანობის ქრონოტოპოსად ქცევაში.
ნუ სინამდვილეში ვინ არის ეს კაცი ძალიან აშკარაა, მაგრამ მასაც სჭირდება პასუხის გაცემა.”
თენგიზ ფხალაძე:
“ოცნების“ განცხადების შესაბამისად: 1. გვებრძვის ყველა, გარდა რუსეთისა! ყველას ჩვენი ჩაყლაპვა სდომებია, „ერთმორწმუნე“ ოკუპანტის გარდა! 2. „დიფ სთეითს“ და გლობალურ ომის პარტიას დაუმორჩილებიათ ამერიკაც და ევროკავშირიც. თურმე მთელი მსოფლიო მათ ხუშტურზე ტრიალებს, მაგრამ აი, „ქართულ ოცნებასთან“ ვერაფერს გახდნენ! 9,5 მილიარდი დოლარის ბიუჯეტით და 25 მილიარდი დოლარის საგარეო ვალით (რომელიც, სხვათა შორის, სწორედ ამ „დიფ სთეით“, გლობალური ომის პარტიით მართული ქვეყნებისა გვმართებს) სულ კუდით ქვა ასროლინეს თურმე მსოფლიოს ამრევებს! 3. როგორც ჩანს, მასონები საბოლოოდ დავამარცხეთ. მათზე განცხადებაში არაფერია ნათქვამი.“
