“ქართული ოცნება” ევროპის სოციალ-დემოკრატიულ პარტიას ტოვებს
მმართველი პარტია “ქართული ოცნება” ევროპის სოციალ-დემოკრატიულ პარტიას (PES) გარიცხვამდე თავად ტოვებს, რაც ნიშნავს იმას, რომ ოცნებას ევროპარლამენტში მოკავშირე პოლიტიკური ძალა ოფიციალურად აღარ ეყოლება.
სპეციალურ ბრიფინგზე “ქართული ოცნების” თავმჯდომარემ, ირაკლი კობახიძემ განაცხადა, რომ პარტიის დატოვების შესახებ გადაწყვეტილება პოლიტსაბჭოს სხდომაზე ერთობლივად მიიღეს. მისივე თქმით, PES-ი ღმერთის, სამშობლოს და ოჯახის პატივისცემის გამო მმართველ პარტიას გარიცხვით დაემუქრა.
“კონსერვატიული პოლიტიკური მოქმედების ჩვენი მოქმედება კრიტიკულად შეფასდეს იმ ევროპელი პოლიტიკური პარტიის ხელმძღვანელმა თანამდებობის პირებმა, რომლის დამკვირვებელი წევრიც არის ქართული ოცნება. მეტიც, მათი მხრიდან გაისმა მუქარა თანამშრომლობის გადახედვის შესახებ, რასაც წინ არ უძღოდა ორმხრივი კომუნიკაცია. ამგვარი ქმედება და დამოკიდებულება ჩვენთვის პრინციპულად მიუღებელია. ჩვენი პარტია 2015 წლიდან არის ევროპის სოციალისტური პარტიის დამკვირვებელი წევრი. სამწუხაროდ, 2015 წლიდან დღემდე ევროპის სოციალისტურ პარტიას არ გაუკეთებია არც ერთი ხმამაღალი განცხადება ოცნების მხარდასაჭერად, მეტიც, რეგულარულად უერთდებოდნენ რადიკალური ოპოზიციის მხარდამჭერ პოლიტიკურ კამპანიებს.” – განაცხადა კობახიძემ.
როგორც მმართველი პარტიის თავმჯდომარემ აღნიშნა, შარშან და წელს რამდენიმე ათეულმა ევროპარლამენტარმა ევროპის სოციალისტური პარტიიდან მხარი დაუჭირა “აბსურდულ რეზოლუციებს”, რომლებითაც ევროპარლამენტი პარტიის დამფუძნებლისთვის, ბიძინა ივანიშვილისთვის სანქციების დაწესებას და “ორი დამნაშავის” – მიხეილ სააკაშვილისა და ნიკა გვარამიას გათავისუფლებას და “კიდევ ერთი დამნაშავის” – დავით კეზერაშვილის წინააღმდეგ სისხლისსამართლებრივი დევნის შეწყვეტას ითხოვდა. კობახიძის განმარტებით, ასეთ პირობებში, ევროპის სოციალისტურ პარტიაში “ქართული ოცნების” წევრობა საქართველოს ევროპული ინტეგრაციის გზაზე, “არა თუ დადებით როლს არ ასრულებდა, პირიქით”, სრულიად კონტრპროდუქტიული იყო.
“გასული წლების განმავლობაში აღნიშნული პარტია სულ უფრო შორდებოდა კლასიკურ, სოციალ-დემოკრატიულ იდეოლოგიას და გადადიოდა ფსევდოლიბერალურ პლატფორმაზე. ევროპის სოციალისტური პარტიის ამგვარი იდეოლოგიური ტრანსფორმაცია ჩვენთვის მიუღებელია და შეუთავსებელია ჩვენი პარტიის, ისევე როგორც ქართული საზოგადოების ხედვებთან. ყოველივე ზემოაღნიშნულის გათვალისწინებით, მივიღეთ გადაწყვეტილება დავტოვოთ ევროპის სოციალისტური პარტიის დამკვირვებელი ქვეყნის სტატუსი და ევროპის სოციალისტურ პარტიასთან დაკავშირებული სხვა გაერთიანებები, რასთან დაკავშირებითაც დაუყოვნებლივ გაეგზავნება ჩვენი წერილობითი განცხადება“, – აღნიშნა კობახიძემ.
8 მაისს ევროპის სოციალისტური პარტიის ვიცე-პრეზიდენტმა, კეტი პირიმ განაცხადა, რომ პოლიტიკურ გაერთიანებაში “ქართული ოცნებისთვის” სტატუსის შეჩერებაზე ერთსულოვნებაა და ოცნებას არავინ უჭერს მხარს.
საქართველოს მმართველი პარტიის გარიცხვასთან დაკავშირებით კომენტარი გააკეთა ევროპის სოციალისტური პარტიის კიდევ ერთმა წევრმა, ევროპარლამენტარმა ტეის როიტენმა. მან იმედი გამოთქვა, რომ “ქართული ოცნება” ორბანის და პუტინის მიმართულებას აღარ აირჩევს და აღნიშნა, რომ დღეს საქართველოს ხელისუფლება ასოცირდება ორბანთან და მემარჯვენე ძალებთან. მისი თქმით, ეს არ არის ის ადგილი, სადაც საქართველო და საქართველოს მთავრობა უნდა იმყოფებოდეს.
პრემიერმინისტრი ირაკლი ღარიბაშვილი ევროპის სოციალისტური პარტიის ვიცე-პრეზიდენტის, კეტი პირის განცხადებებს გამოეხმაურა. როგორც ღარიბაშვილი ამბობს, დასკვნებს პარტიაშიც გააკეთებენ, “შეიძლება იმაზე ადრე, ვიდრე სოციალისტები შეიკრიბებიან ივნისში”.
“ქართული ოცნება” ევროპარლამენტის ევროპელი სოციალისტების ალიანსის წევრი იყო.
კეტი პირის განცხადებამდე რამდენიმე დღით ადრე, უნგრეთში ირაკლი ღარიბაშვილის გამოსვლა დაგმო ევროპელი სოციალისტების პარტიამ და აღნიშნა, რომ მომავალ სხდომაზე ქართული ოცნებისთვის სტატუსის შეჩერებას განიხილავენ, რაც “აუცილებელი ნაბიჯია”.
საქართველოს პრემიერმინისტრმა ირაკლი ღარიბაშვილმა ბუდაპეშტში კონსერვატიული პოლიტიკური მოქმედების ყოველწლიურ კონფერენციაზე სიტყვით გამოსვლისას განაცხადა, რომ უნგრელ ხალხს ძალიან გაუმართლა, რომ “ასეთი ბრძენი და შორსმჭვრეტელი” ლიდერი ჰყავს. მისივე თქმით, სიმართლესთან დაპირისპირებული ძალები მიზნების მიღწევას ლგბტ პროპაგანდით ცდილობენ.
ღარიბაშვილის განმარტებით, საქართველოს საზოგადოების უდიდესი უმრავლესობა ტრადიციულ, კონსერვატიულ ოჯახურ ღირებულებებს იზიარებს და ეს ფასეულობები მხოლოდ წარსული მემკვიდრეობა არ არის. ღარიბაშვილის თქმით, იგი ცოცხალი დღევანდელობაა – გარემო, რომელშიც “ჩვენ გავიზარდეთ და გვსურს ჩვენი შვილები აღვზარდოთ.”
