პროევროპული უწყვეტი პროტესტის მე-15 დღე. დღის მნიშვნელოვანი მოვლენები - ონლაინ ტრანსლაცია
Live
-
ჰერჩინსკი - „სიტყვიდან მოქმედებაზე გადავალთ“
ევროკავშირის ელჩმა საქართველოში პაველ ჰერჩინსკიმ განაცხადა, რომ ევროკავშირი ინსტიტუტების ახალი ლიდერების მზად არიან საქართველოსთან დაკავშირებით „სიტყვიდან მოქმედებაზე გადავიდნენ“.
მისი თქმით, საქართველოში არსებული ვითარება 16 დეკემბერს ევროკავშირის საგარეო საქმეთა მინისტრების, შემდეგ კი ევროკავშირის საბჭოს სხდომაზე განიხილება.
ჰერჩინსკი კვლავ ამბობს, რომ ბრიუსელში ინტენსიური მოლაპარაკებები მიმდინარეობს, რათა საქართველოსთან მიმართებით “სხვადასხვა ზომები შეთანხმდეს”. ამ კონტექსტში, ის გარკვეული პასპორტების მფლობელებისთვის უვიზო მიმისვლის შეჩერებასა და სანქციების დაწესებაზე საუბრობს.
პაველ ჰერჩინსკის თქმით, სანქციების დაწესებას ერთსულოვნება სჭირდება და იმედს გამოთქვამს, რომ წევრი ქვეყნები შეთანხმდებიან, დაასანქცირონ ისინი, ვინც პასუხისმგებელია ადამიანის უფლებების უხეშ დარღვევებზე.
-
ოპოზიცია არ ცნობს საპრეზიდენტო არჩევნებს. ერთობლივი განცხადება
2024 წლის საპარლამენტო არჩევნებზე ბარიერგადალახული ოპოზიციური პარტიები „კოალიცია ცვლილებისთვის“, „ერთიანობა – ნაციონალური მოძრაობა“, „ძლიერი საქართველო“ და „გახარია საქართველოსთვის“ აცხადებენ, რომ პრეზიდენტის არჩევნები არალეგიტიმურად ტარდება.
მათ მიაჩნიათ, რომ „უმძიმესი პოლიტიკური კრიზისიდან არსებობს ერთადერთი გამოსავალი – ახალი და სამართლიანი არჩევნები“ – ეს არის მათი მთავარი მოთხოვნა.
განცხადებაში, რომელიც ოპოზიციის სახელით გავრცელდა, საუბარია, რომ “26 ოქტომბრის არჩევნებში გამარჯვებული პოლიტიკური პარტიები არ ვცნობთ და არ ვაღიარებთ თვითგამოცხადებულ ხელისუფლებას, მის არც ერთ შტოს, რადგან ივანიშვილმა არჩევნების ნაცვლად მოაწყო საკონსტიტუციო გადატრიალება საქართველოს მოქალაქეების, ჩვენი ქვეყნის ევროპული და ევროატლანტიკური მომავლის წინააღმდეგ…”
“არალეგიტიმურ პარლამენტს არ გააჩნია პრეზიდენტის არჩევის უფლებამოსილება, ამდენად სალომე ზურაბიშვილი რჩება საქართველოს პრეზიდენტად, საქართველოს თავდაცვის ძალების უმაღლეს მთავარსარდლად და ქვეყნის უმაღლეს წარმომადგენლად საგარეო ურთიერთობებში“, – წერია სამი პარტიის (კოალიცია ცვლილებისთვის“, „ერთიანობა – ნაციონალური მოძრაობა“, „ძლიერი საქართველო“) ერთობლივ განცხადებაში.
„გახარია საქართველოსთვის“ განცხადების სულისკვეთებას ასევე უერთდება. პარტიის არცერთი წარმომადგენელი არ მიიღებს საპრეზიდენტო არჩევნებში მონაწილეობას: „გახარია საქართველოსთვის“ არ მონაწილეობს პრეზიდენტის არჩევის უკანონო პროცესში და არ ცნობს დეფაქტო, არალეგიტიმური პარლამენტის მიერ განხორციელებულ ქმედებებსა და გადაწყვეტილებებს, მათ შორის – უკანონოდ არჩეულ პრეზიდენტს“.
-
ღარიბაშვილი გამოჩნდა
ირაკლი ღარიბაშვილი, რომელიც რამდენიმე დღის განმავლობაში კამერების წინ არ გამოჩენილა, დღეს გამოჩნდა. მან დაადასტურა ინფორმაცია, რომ ჰქონდა ტრავმა:
“მსუბუქი დაზიანება მივიღე ვარჯიშის დროს და ამაზრზენი ტყუილები გამოიგონა ერთ-ერთმა არარაობამ, მოღალატე ბაჩიაშვილმა – ცილისწამებაა ისიც, თითქოს პარტიას გავემიჯნე – ეს ჩემი ხელწერა არ არის,” – ასე უპასუხა ღარიბაშვილმა მისი ჯანმრთელობის შესახებ მედიაში გავრცელებულ ინფორმაციას.
“მთავარმა არხმა” 10 დეკემბერს გაავრცელა ინფორმაცია, რომ ღარიბაშვილს ფიზიკურად გაუსწორდნენ მისივე თანაგუნდელები.
„ვრცელდება ცნობები ოლიგარქის გუნდში სავარაუდო ფიზიკური დაპირისპირების შესახებ,” – იუწყებოდა მთავარი არხი.
-
ბრიტანეთის ელჩი: გადამეტებული ძალის გამოყენების შესახებ სწრაფი და დამოუკიდებელი გამოძიება უნდა ჩატარდეს
შოკირებულები ვართ იმ ძალადობით, რომელიც გამოიყენეს პოლიციამ და არაფორმალურმა ჯგუფებმა მომიტინგეების, ჟურნალისტებისა და ოპოზიციის წარმომადგენლების მიმართ, – განაცხადა ბრიტანეთის ელჩმა საქართველოში, გარეტ უორდიმ ქართულენოვან ვიდეომიმართვაში.
ელჩი აღნიშნავს, რომ პოლიციის მხრიდან გადამეტებული ძალის გამოყენების შესახებ სწრაფი და დამოუკიდებელი გამოძიება უნდა ჩატარდეს.
ელჩმა კიდევ ერთხელ გაიმეორა, რომ დიდი ბრიტანეთი აჩერებს საქართველოს მთავრობის პროგრამულ მხარდაჭერას:
“როგორც ჩვენმა საგარეო საქმეთა მინისტრმა აღნიშნა, ეს ძალადობა მიუღებელია და უნდა შეწყდეს. შესაბამისად, მინისტრმა ასევე შეზღუდა დიდ ბრიტანეთსა და საქართველოს შორის არსებული ორმხრივი თანამშრომლობა. ეს ნიშნავს, რომ ჩვენ ვაჩერებთ საქართველოს მთავრობის პროგრამულ მხარდაჭერას, როგორც საჯარო ადმინისტრაციის რეფორმისა და შერიგებისა და სამოქალაქო თანამშრომლობის სახელმწიფო აპარატის მშვიდობის ფონდის დაფინანსებას, ასევე, ვზღუდავთ სამხედრო სფეროში თანამშრომლობას, მაგალითად, აღარ ვეხმარებით საქართველოს თავდაცვის სამინისტროს კიბერუსაფრთხოების ცენტრის მშენებლობაში. ასევე, შევზღუდავთ პოლიტიკურ შეხვედრებს და ურთიერთობას. უორდროპის სტრატეგიულ დიალოგს ვერ განვაახლებთ ამ ვითარებაში”.
-
დღის აქციები რუსთაველზე
რუსთაველის გამზირზე დღეს რამდენიმე აქცია-მსვლელობა ერთდროულად გაიმართა. დედაქალაქში აქცია გამართეს IT/TECH სფეროს წარმომადგენლებმა. რამდენიმე ასეული ადამიანი ჯერ პარლამენტის შენობის წინ შეიკრიბა, შემდეგ კი მსვლელობა მოაწყო ცენტრალურ ქუჩებზე – რუსთაველის, მელიქიშვილისა და კოსტავას გამზირებზე.
ასევე საპროტესტო აქცია მიმდინარეობს თბილისის კონსერვატორიასთან – ქართული მუსიკალური სფეროს წარმომადგენლების მთავარი სლოგანია: „თავისუფლება რეჟიმის პატიმრებს“. აქციის მონაწილეები სხვა საკითხებთან ერთად კონსერვატორიის სტუდენტის ანრი კაკაბაძის გათავისუფლებას ითხოვენ.
ახალგაზრდა პიანისტი ანრი კაკაბაძე სხვა სამ სტუდენტთან და პროფესორთან ერთად ბათუმში დააკავეს. ისინი საპროტესტო აქციების აქტიური მონაწილეები იყვნენ.
13 დეკემბერს, 14:00 საათზე, დაგეგმილია მსვლელობა კონსერვატორიიდან კულტურის სამინისტროს შენობამდე.
პროტესტის 14 წლის განმავლობაში ეს პირველი შემთხვევაა, როდესაც მოქალაქეთა თვითორგანიზებულმა პროტესტმა რუსთაველის გამზირი არა მხოლოდ საღამოს საათებში, არამედ ღისითაც გადაკეტა.
