"გამოვრიცხავ ყველაფერს, გარდა ევროპული ძალების გამარჯვებისა" - პრეზიდენტის პრესკონფერენცია
პრეზიდენტის პრესკონფერენცია
პრეზიდენტის სასახლეში გამართულ პრესკონფერენციაზე პრეზიდენტმა სალომე ზურაბიშვილმა თქვა, რომ არჩევნებში გამორიცხავს ყველაფერს, გარდა პროევროპული ძალების გამარჯვებისა.
რა თქვა სალომე ზურაბიშვილმა
“გამოვრიცხავ ყველაფერს, გარდა ევროპული ძალების გამარჯვებისა”
“თუ-ზე არ ვსაუბრობ, გმადლობთ. […] გამოვრიცხავ ყველაფერს, გარდა ევროპული ძალების გამარჯვებისა და ევროპული საქართველოს გამარჯვებისა”. – თქვა ზურაბიშვილმა კითხვაზე, რა მოხდება იმ შემთხვევაში, თუ ბიძინა ივანიშვილი არჩევნებში გაიმარჯვებს.
ზურაბიშვილმა ასევე უპასუხა კითხვებს, რა იქნება არჩევნებში ივანიშვილის მარცხის შემთხვევაში ბერკეტები, რომელიც მას ძალაუფლებას დაათმობინებს და არსებობს თუ არა უსაფრთხოების კონკრეტული გარანტიები ივანიშვილისთვის. პრეზიდენტის თქმით, მთავარი ბერკეტი ახლა არჩევნებზე მაღალი აქტივობაა.
“მთავარი ბერკეტი, რაც არსებობს, არის ხალხი და ხალხის ნება, რომელიც გამოიხატება ამ არჩევნებზე დიდი აქტივობით და ნამდვილი, ნაღდი, ცხადი შედეგი არჩევნებში. მერე ყველაფერი ამას მოჰყვება, რაც საჭირო იქნება. ეს გამოცდილი არის საერთაშორისო დონეზე, რა შეიძლება გაკეთდეს იმისთვის, რომ მაქსიმალურად სტაბილურობა იყოს შენარჩუნებული. მაგრამ დღეს, ჯერ ხალხის ნება უნდა გამოიხატოს. […]
არაფერი კონკრეტიკა არ არის ამაში, ეს არის ჩვეულებრივი ფორმა, როცა ავტორიტარული რეჟიმები თავდება, რომ რაღაცა ფორმით გარანტიებზე შეიძლებოდეს საუბარი. მეტი კონკრეტიკა არ არსებობს და არც იარსებებს. დღეს მთავარია არჩევნების შედეგი და ეს იქნება მთავარი გარანტია სტაბილურობის და ყველას მომავლის. […]”. – თქვა ზურაბიშვილმა.
“თქვენი საუკეთესო დაცვა იქნება კოალიციური მმართველობა” – პრეზიდენტი საჯარო მოხელეებს მიმართავს
“უნდა იფიქროს არა მხოლოდ დღევანდელ შიშზე, არამედ იმაზე, რომ ეს ხელისუფლებაც შეიცვლება, არაფერია მუდმივი და მოვა ხელისუფლება, რომელიც არ დაემუქრება, რომელიც არ შეუწყვეტს დახმარებას და ეს არის ჩვენი მომავალი, რომ ვიცხოვროთ ამ შიშების გარეშე, ამ აგიტატორების გარეშე, ამ კოორდინატორების გარეშე, ამ მიკროავტობუსების გარეშე და საჯარო მოხელეებზე ზეწოლის გარეშე.
მე, როგორც პრეზიდენტმა, მინდა მივმართო საჯარო მოხელეებს და ვუთხრა, რომ სწორედ მათი ყველაზე კარგი დაცვა არის ის, რომ ჩვენ გადავდივართ ერთპარტიულობიდან მრავალპარტიულობაზე, კოალიციურ მმართველობაზე. ეს იმას ნიშნავს, რომ ერთი მმართველი აღარ იქნება, ერთის ხელში აღარ იქნება ეს ზეწოლები და ამდენად, ბევრად უფრო განთავისუფლებული იქნება გარემო.
“მხოლოდ იმისთვისაა, რომ ხალხი შეშინდეს” – პრეზიდენტი დღეს ჩატარებულ ჩხრეკებზე
“ეს არის ტიპიური ფსიქოლოგიური ზეწოლა” – ასე აფასებს პრეზიდენტი სალომე ზურაბიშვილი ფინანსური პოლიციის მიერ ჩატარებულ ჩხრეკებს. მისი აზრით, ეს საქართველოში აღარ იმუშავებს, რადგან მოსახლეობა უკვე “საკმაოდ” მიჩვეულია.
“ვიცით, რომ ეს ხდება, ვიცით, რომ ამას უნდა გავუძლოთ, ამით არ უნდა შევშინდეთ. ეს არის მხოლოდ ამისთვის, რომ ხალხი შეშინდეს, ვიღაცა არ წავიდეს არჩევნებზე, ვიღაცას შეეშინდეს თავისი ხმის იმ ფორმით ჩაყრა, როგორაც თვითონ ფიქრობს. ეს ყველაფერი არის მხოლოდ ფსიქოლოგიური მანიპულაციები, რომელიც მგონი, საქართველოს მოსახლეობაზე, რომელიც გამოცდილია, არ მუშაობს, აღარ მუშაობს და აღარ იმუშავებს.
დავამატებ, რომ გადასვლა იმ ახალ ეტაპზე, კოალიციურ მთავრობაზე, პროევროპულ მთავრობაზე ჩვენი ახალი პოლიტიკური რეალობა სწორედ ის უნდა იყოს მომავალში, რომ აღარ იყოს საარჩევნო ზეწოლა და საარჩევნოდ ადამიანების ამ ფორმით გამოყვანა მაგალითად, მიტინგებზე ძალით, ხვეწნით, ფულით თუ რაც იქნება, ეს უნდა ჩაბარდეს წარსულს და დარწმუნებული ვარ, ჩაბარდება” – ამბობს პრეზიდენტი პრესკონფერენციაზე.
დღეს დილიდან ფინანსური პოლიცია სხვადასხვა ადამიანის სახლებს ჩხრეკს. მათ შორის, საგამოძიებო სამსახური შევიდა Atlantic Council-ის ორი თანამშრომლის, ეთო ბუზიაშვილისა და სოფო გელავას სახლებში. ატლანტიკური საბჭო 1961 წელს დაფუძნებული ამერიკული კვლევითი ცენტრია, ხოლო ბუზიაშვილი და გელავა ატლანტიკური საბჭოს ორგანიზაცია “ციფრული ექსპერტიზის კვლევითი ლაბორატორიის” მკვლევრები არიან.
საქართველოს ფინანსთა სამინისტროს საგამოძიებო სამსახურის განცხადებით, წარმოებაში არსებულ სისხლის სამართლის საქმესთან დაკავშირებით მიღებული ოპერატიული ინფორმაციის შესაბამისად, “სამ სავარაუდო ე. წ. ქოლცენტრში ჩატარდა საგამოძიებო მოქმედებები და მოსამართლის განჩინების საფუძველზე გაიჩხრიკა მითითებული ობიექტები”.
პრეზიდენტი ოკუპირებულ ტერიტორიაზე მცხოვრებებზე: “ჩვენი ევროპული გზა მათი ევროპული გზაც არის”
“გზავნილი იქნება ის, რომ დელიმიტაციის ხაზი იქნება გადაკვეთილი ამ დღეებში და ვინც საქართველოს მოქალაქეა, ვერ შეძლებს არჩევნებში მონაწილეობას.
მაგრამ მე იმასაც გავიმეორებ, რასაც რამდენიმე წელია ვიმეორებ: ჩვენი ევროპული გზა, არის მათი ევროპული გზაც და ეს არის ყველაზე ნაღდი, ერთობლივი გზა, რომელიც დაგვაახლოებს ჯერ და მერე მიგვიყვანს ერთად იმ სივრცეში, რომელიც არის მშვიდობიანი, სადაც სამხედრო ბაზებს სხვა ქვეყნების, ადგილი არ აქვს.
