პენიტენციური სააკაშვილის მიერ რუსთავის ციხის დატოვების კადრებს ავრცელებს. ვიდეო

საქართველოს პენიტენციური სამსახური საქართველოს ყოფილი პრეზიდენტის მიხეილ სააკაშვილის მიერ რუსთავის მე-12 დაწესებულების დატოვების კადრებს ავრცელებს.

„მაღალი საზოგადოებრივი ინტერესიდან გამომდინარე, ვასაჯაროებთ მე-12 პენიტენციური დაწესებულებიდან პატიმარ მიხეილ სააკაშვილის გასვლის კადრებს, სადაც ნათლად ჩანს, რომ პატიმარ მიხეილ სააკაშვილს არ დაუტოვებია პენიტენციური დაწესებულება მისი ნების საწინააღმდეგოდ”, – ნათქვამია განცხადებაში.

ვიდეომასალაში, რომელიც უწყებამ გაავრცელა, ჩანს როგორ ალაგებს ნივთებს და როგორ ტოვებს სააკაშვილი რუსთავის ციხეს.

სახალხო დამცველის ნინო ლომჯარიას განცხადებით, რომელმაც შეძლო გლდანის ციხეში გადაყვანილი მიხეილ სააკაშვილის მონახულება, ექს-პრეზიდენტს უთხრეს, რომ ის სამოქალაქო კლინიკაში უნდა გადაეყვანათ. შესაბამისად, ის აღნიშნულ შეთავაზებას დათანხმდა.

“პირადად ვნახე. ვისაუბრეთ, მოვლენებს აღწერს შემდეგნაირად. მისი განცხადებით მას უთხრეს, რომ შედგა კონსილიუმი და კონსილიუმმა გადაწყვიტა, რომ მულტიფუნქციურ კლინიკაში გადაეყვანათ”, – აცხადებს ლომჯარია.

უკვე რამდენიმე საათი გავიდა მას შემდეგ, რაც კატეგორიული წინააღმდეგობის მიუხედავად, საქართველოს ყოფილი პრეზიდენტი, პატიმრობაში მყოფი მიხეილ სააკაშვილი პენიტენციურმა სამსახურმა გლდანის ციხის N18 სამკურნალო დაწესებულებაში გადაიყვანა.

ვრცელდება ინფორმაცია, რომ ექს-პრეზიდენტს ფიზიკური დაზიანებები აქვს. იუსტიციის სამინისტრო კი აცხადებს, რომ პატიმარმა თავად მიაყენა შეურაცხყოფა გლდანის ციხის პერსონალს.

მიხეილ სააკაშვილის პირადი ექიმი, ნიკოლოზ ყიფშიძე ითხოვს, რომ მას პაციენტის მონახილების საშუალება მისცენ. ექს-პრეზიდენტის მონახულების უფლებას ითხოვს მისი ადვოკატი ნიკა გვარამიაც, თუმცა, მიიღებენ თუ არა ისინი ამ ნებართვას, ჯერჯერობით უცნობია.

ამ დრომდე მიხეილ სააკაშვილის მონახულება მხოლოდ ომბუდსმენის წარმომადგენელმა და თავად ომბუდსმენმა შეძლეს.

ბოლო რამდენიმე საათია, მას შემდეგ, რაც გლდანის ციხეში ექს-პრეზიდეტი სააკაშვილი გადაიყვანეს, ციხეში ხმაურია, პატიმრებმა ე.წ. “შუმოკი” მოაწყვეს. მათის საკნებიდან შეურაცხმყოფელი განცხადებები და გინება ისმის. გლდანის ციხესთან ახლა მობილიზებულია პოლიცია და სპეცრაზმი.

მიხეილ სააკაშვილი გლდანის ციხეში 8 ნოემბერს, საღამოს გადაიყვანეს.

სააკაშვილის გადაყვანის შესახებ უწყებას წინასწარ ინფორმაცია არ გაუვრცელებია. ამის შესახებ პირველად ექს-პრეზიდენტის დედის, გიული ალასანიასგან გახდა ცნობილი, რომელსაც შვილი ციხეში აღარ დახვდა.

სად და როგორ გადაიყვანეს პატიმარი ექს-პრეზიდენტი, რომელსაც 40-დღიანი შიმშილობის შემდეგ მძიმე ჯანმრთელობის მდგომარეობა აქვს, რამდენიმე საათის განმავლობაში იყო უცნობი.