საქართველოს პარლამენტის პირველი სხდომა მასშტაბური პროტესტის ფონზე მიმდინარეობს. ოპოზიცია პარლამენტში არ შედის - „ოცნება“ იქ მარტოა
პარლამენტის პირველი სხდომა
საქართველოს მმართველი პარტიამ საქართველოს ახალ მთავრობაში სამი მინისტრი შეცვალა.
26 ოქტომბრის არჩევნების შემდეგ დღეს, 25 ნოემბერს საქართველოს ახალი, მეთერთმეტე მოწვევის პარლამენტი პირველად იკრიბება.
პარლამენტის სხდომას მხოლოდ “ქართული ოცნების” დეპუტატები ესწრებიან, რადგან ოპოზიცია ბოიკოტს უცხადებს არჩევნების შედეგებს.
26 ოქტომბრის საპარლამენტო არჩევნებში ოფიციალური მონაცემებით “ოცნებამ” ხმების 54 პროცენტი მიიღო. არჩევნებს გაყალბებულს უწოდებს ოპოზიცია და სამოქალაქო საზოგადოების ყველაზე აქტიური ნაწილი. მრავალრიცხოვანი დარღვევების გამო, არჩევნების შედეგები ამ დრომდე არ აღიარა არც ერთმა ევროპულმა ქვეყანამ, უნგრეთის გარდა. ასევე არც აშშ-მ და კანადამ. საქართველოს დასავლელი პარტნიორები საქართველოს ხელისუფლებას გაყალბების მრავალრიცხოვანი ფაქტების საერთაშორისო გამოძიებას სთხოვს, თუმცა “ქართული ოცნება” ამ წინადადებაზე უარს ამბობს.
პირველი სხდომაზე “ოცნების” დეპუტატები სამართალდამცავთა კორდონის დახმარებით, სპეცშესასვლელებიდან შეიყვანეს, რადგან პარლამენტთან ხალხმრავალი საპროტესტო აქცია მიმდინარეობს.
აქციის მონაწილეების ნაწილმა ღამე პარლამენტთან გაათენა. მათი ამოცანაა, კიდევ ერთხელ დააფიქსირონ, რომ არჩევნები არალეგიტიმურია, შესაბამისად, არალეგიტიმურია ახალი პარლამენტიც.
პარლამენტის გარშემო პერიმეტრი და თბილისის ცენტრის მთელი სამთავრობო კვარტალი სამართალდამცავთა ალყაშია მოქცეული. აქ არიან როგორც საპოლიციო დანაყოფები, ასევე სპეცრაზმის თანამშრომლები. პარლამენტთა დგანან წყლის ჭავლის მანქანებიც.
სახელისუფლებო პარტია დაბრკოლებად არ განიხილავს პრეზიდენტ სალომე ზურაბიშვილის გადაწყვეტილებას – არ დანიშნოს ახალი პარლამენტის პირველი სხდომა, როგორც ამას კონსტიტუცია მოითხოვს და არც იმას, რომ არჩევნების შედეგების არაკონსტიტუციურად ცნობის სარჩელით პრეზიდენტმა და ოპოზიციონერმა დეპუტატებმა საკონსტიტუციო სასამართლოს მიმართეს.
პარლამენტის პირველი სხდომა დღეს იმითაც არის გამორჩეული, რომ მას არ ესწრებიან დიპლომატიური კორპუსის წარმომადგენლები – “ქართულმა ოცნებამ” ელჩების დაპატიჟება მიზანშეწონილად არ ჩათვალა. ტრადიციულად, პარლამენტის პირველ სხომას ყოველთვის ესწრებოდნენ დიპკორპუსის წარმომადგენლები, ასე იყო წინა მოწვევის პარლამენტების შემთხვევაში.
პრემიერმა კობახიძემ უკვე დაასახელა ახალი კაბინეტი
კაბინეტს ნდობა უნდა გამოუცხადის ახალმა პარლამენტმა. მასში სამი ცვლილებაა:
საქართველოს საგარეო საქმეთა სამინისტროს მაკა ბოჭორიშვილი უხელმძღვანელებს; იუსტიციის ახალი მინისტრი ანრი ოხანაშვილი გახდება; გარემოს დაცვისა და სოფლის მეურნეობის სამინისტროს დავით სონღულაშვილი უხელმძღვანელებს.
რაც შეეხება ყოფილ მინისტრებს – რატი ბრეგაძეს, ილია დარჩიაშვილსა და ოთარ შამუგიას, კობახიძის თქმით, ისინი მაღალ პოლიტიკურ თანამდებობებს დაიკავებენ.
ყველა სხვა მინისტრი თავის ადგილზე რჩება. პრემიერიც კვლავ ირაკლი კობახიძეა.
- ვიცე-პრემიერი, საქართველოს ეკონომიკისა და მდგრადი განვითარების მინისტრი – ლევან დავითაშვილი;
- საქართველოს ფინანსთა მინისტრი – ლაშა ხუციშვილი;
- საქართველოს რეგიონული განვითარებისა და ინფრასტრუქტურის მინისტრი – ირაკლი ქარსელაძე;
- საქართველოს თავდაცვის მინისტრი – ირაკლი ჩიქოვანი;
- საქართველოს შინაგან საქმეთა მინისტრი – ვახტანგ გომელაური;
- საქართველოს განათლების, მეცნიერებისა და ახალგაზრდობის მინისტრი – ალექსანდრე წულაძე;
- მიგრანტთა, შრომის, ჯანმრთელობისა და სოციალური დაცვის მინისტრი – მიხეილ სარჯველაძე;
- შერიგებისა და სამოქალაქო თანასწორობის საკითხებში სახელმწიფო მინისტრი – თეა ახვლედიანი;
- საქართველოს კულტურისა და სპორტის მინისტრი – თინათინ რუხაძე
