ოპოზიციამ საქართველოს ქალაქებში საპროტესტო აქციები დაიწყო
„არა გაყალბებულ არჩევნებს“, „თავისუფლება მიშას“ – ამ სლოგანებით საქართველოში ოპოზიციამ პერმანენტული საპროტესტო აქციები დაიწყო.
ამ აქციებით ოპოზიცია აპროტესტებს თვითმმართველობის არჩევნების შედეგებს და ასევე, ითხოვს, საქართველოს მესამე პრეზიდენტის, პატიმარი მიხეილ სააკაშვილის გათავისუფლებას.
პერმანენტული საპროტესტო აქციები საქართველოს ქალაქებში, ოპოზიციამ, არჩევნების მეორე ტურის დასრულების შემდეგ, 31 ოქტომბერს, თბილისში, სპონტანურად გამართულ მიტინგზე დააანონსა.
ამ აქციაზე ოპოზიიციის ლიდერებმა ხელისუფლებას, რომელმაც, მათი თქმით, „არჩევნები მიიტაცა“, უთხრეს, რომ ბევრი სიურპრიზისთვის უნდა მოემზადოს.
● მოსყიდვა, დაშინება, ამომრჩეველთა ნების კონტროლი – როგორი იყო არჩევნების დღე საქართველოში
პირველი საპროტესტო გამოსვლები საქართველოს ორ დიდ ქალაქში, რუსთავსა და ბათუმში, პარალელურ რეჟიმში, 2 ნოემბერს, შედგა. ორივე ქალაქში აქციები საღამოს, ერთდროულად დაიწყო.
რუსთავში აქციის მონაწილეები სასჯელაღსრულების დაწესებულებასთან შეიკრიბნენ. ციხის მე-12 საკანში უკვე 33 დღეა შიმშილობს საქართველოს მესამე პრეზიდენტი, პატიმარი მიხეილ სააკაშვილი.
„დღეს დღის წესრიგში დგას ერთადერთი მოთხოვნა, თავისუფლება მიშა სააკაშვილს! მიხეილ სააკაშვილის თავისუფლებაზე გადის ჩვენი ბრძოლის ხაზი და ის, თუ როგორ წარიმართება პოლიტიკური პროცესები საქართველოში“, – მიმართა რუსთავიც ციხესთან შეკრებილებს “ნაციონალური მოძრაობის” წევრმა, ზაალ უდუმაშვილმა.
მან თქვა, რომ „ახლა არ არის ტელევიზორთან ჯდომის და “ფეისბუკზე” პოსტების წერის დრო. მისივე თქმით, რუსთავის ციხესთან აქციები ყოველდღე გაიმართება.
![](https://jam-news.net/app/uploads/2021/11/აქცია_რუსთავი_ზაალ_უდუმაშვილი.jpg)
ბათუმში აქცია მთავრობის სახლთან გაიმართა. 2 ნოემბრის აქციას გაერთიანებული ოპოზიციის წარმომადგენლები ბათუმში შეუერთნენ.
მათ შორის, „ერთიანი ნაციონალური მოძრაობის“ ლიდერი ნიკა მელია, პარტია „ლელოს“ ერთ-ერთი ლიდერი მამუკა ხაზარაძე, „გირჩი – მეტი თავისუფლების“ ლიდერი ზურაბ ჯაფარიძე და „დროას“ ლიდერი ელენე ხოშტარია. ისინი ერთად იბრძოდნენ არჩევნების მეორე ტურში და ამბობენ, რომ ეს კოალიცია არ იშლება, პირიქით, ის გაძლიერდება და გაფართოვდება.
![](https://jam-news.net/app/uploads/2021/11/ენმ_01-1024x766.jpg)
ნიკა მელიამ აქციის მონაწილეებს პირველმა მიმართა. მან თქვა, რომ ბრძოლა ახლა იწყება და აქციები არ შეწყდება იქამდე, ვიდრე “სიმართლე არ გაიმარჯვებს” და საქართველოს მესამე პრეზიდენტი არ გათავისუფლდება.
„ჩვენ მოგვპარეს არჩევანი. და რახან ბიძინა ივანიშვილმა გვითხრა, არჩევნების წესით თვალს რეალობას არ გავუსწორებო, მაშინ ჩვენ უნდა ვაიძულოთ, რომ დიახაც, შემოვიდეს ხალხის ნებასთან დაპირისპირებაში და ამისთვის მზად ვართ ყველა ქალაქში“.
მელიამ კიდევ ერთხელ გაიმეორა, რომ აქციები იქნება პერმანენტული და იქნება ბევრ ქალაქში:
„არ ჩათვალო მუქარად, ბიძინა ივანიშვილო. უბრალოდ, ეს არის ქართველი ხალხის დაკვეთა, რომ ჩვენ ძალიან მჭიდრო დაპირისპირებაშიც კი შემოვიდეთ, საჭიროების შემთხვევაში, მშვიდობიანად და ხელებაწეულები. სიმრავლით დაგამარცხებთ. თქვენ ხართ დიქტატორი, ადამიანი, რომელიც აბუჩად გვიგდებთ, მაგრამ ამას ვეღარ გააგრძელებთ. სიურპრიზებსაც მოგიმზადებთ, ისეთ სიურპრზებს მოგიმზადებთ, რომლებიც გაგაკვირვებთ და რომელიც გაახარებს ამ ქვეყნის და სახელმწიფოს ბევრ ქომაგს. გამარჯვება არის გარდაუვალი. უკან დახევა არ იქნება, ხალხო“.
მამუკა ხაზარაძე ბათუმიდან მიხეილ სააკაშვილის ჯანმრთელობის მდგოამრეობის თემას გამოეხმაურა.
მან თქვა, რომ მიხეილ სააკაშვილს სამეციდინო მომსახურება ეკუთვნის, რადგან მისი სიცოცხლე საფრთხის ქვეშაა. მანვე, ხაზი გაუსვა, რომ რომ მოცემულ ვითარებაში მნიშვნელობა არ აქვს, ვის რა დამოკიდებულება აქვს მიხეილ სააკაშვილის მიმართ:
„ის იყო საქართველოს პრეზიდენტი, არის პრეზიდენტი და მას ეკუთვნის ისეთი სამედიცინო მომსახურება, რომ ჩვენ ფატალურ შეცდომამდე არ მიგვიყვანოს“.
როდის და რომელ ქალაქში გაგრძელდება აქციები, დღეს ლიდერებს არ უთქვამთ. ფაქტი ისაა, რომ ოპოზიციამ დაანონსებული საპროტესტო აქციები უკვე დაიწყო და ეს აქციები არ შეწყდება.
ასევე, ცნობილია, რომ “ნაციონალური მოძრაობა” გეგმავს აქციები გამართოს დიდ ქალაქებში, მათ შორის ქუთაისში და თბილისშიც. თბილისში აქცია 6 ნოემბერს არის დაგეგმილი.
30 ოქტომბერს საქართველოში არჩევნების მეორე ტური იყო. 5 თვითმმართველ ქალაქსა და 15 მუნიციპალიტეტში მერს ირჩევდნენ, 24 მუნიციპალიტეტის 42 ოლქში კი მაჟორიტარ დეპუტატს.
ცესკოს წინასწარი მონაცემებით, ყველგან, წალენჯიხის გარდა, მერის არჩევნებში მმართველი პარტიის კანდიდატმა გაიმარჯვა.
რაც შეეხებათ მაჟორიტარებს, 42 მაჟორიტარული ოლქიდან „ქართული ოცნების“ კანდიდატებმა გაიმარჯვეს 27 ოლქში, ოპოზიციამ კი 15 სამაჟორიტარო ოლქი მოიგო.
ოპოზიცია ადგილობრივი თვითმმართველობის არჩევნების ამ შედეგს არ აღიარებს და ამბობს, რომ „მმართველმა გუნდმა“ არჩევნები გააყალბა. სწორედ ამიტომ დააანონსდა აქციების სერია საქართველოს ქალაქებში.
აქციების პარალელურად, ოპოზიცია აპირებს ოლქებსა და შემდეგ სასამართლოებში გაასაჩივროს ყველა საარჩევნო დარღვევა.