“ბიძინა ივანიშვილის როლი არის ჩვენი ქვეყნის გადარჩენა”. “ოცნება” ივანიშვილის დაბრუნებაზე
“ოცნება” ივანიშვილის დაბრუნებაზე
“ისეთი ვითარებაა ქვეყანასა და მსოფლიოში, რომ ბიძინა ივანიშვილის პოლიტიკაში დაბრუნება აუცილებელი იყო. მისი როლი არის ჩვენი ქვეყნის გადარჩენა”,- ასე გამოეხმაურა ივანიშვილის დაბრუნებას საქართველოს პრემიერ-მინისტრი ირაკლი ღარიბაშვილი.
პარტია “ქართული ოცნების” სხვა წევრები ამბობენ, რომ ივანიშვილის დაბრუნება მნიშვნელოვანი მოვლენაა ქვეყნის ცხოვრებაში.
“ქართულმა ოცნებამ” წლის შემაჯამებელ ყრილობაზე პარტიის დამფუძნებელი, ბიძინა ივანიშვილი საპატიო თავმჯდომარედ აირჩია. ეს ივანიშვილის მესამე ოფიციალური დაბრუნებაა პოლიტიკაში.
ირაკლი ღარიბაშვილი: აუცილებელი იყო ბატონი ბიძინას პოლიტიკაში დაბრუნება“
ირაკლი ღარიბაშვილმა თქვა, რომ იმ ურთულეს გეოპოლიტიკურ ვითარებაში რაც ახლაა მსოფლიოში, ივანიშვილის დაბრუნება აუცილებელი იყო.
მან ილაპარაკა იმაზე, რამდენად დიდია ივანიშვილის როლი ქვეყნის გადარჩენის საქმეში.
„ყველას კარგად მოეხსენება ბატონი ბიძინა ივანიშვილის უნიკალური როლი ჩვენი ქვეყნის გადარჩენის საქმეში. 2012 წელს ბატონი ბიძინა რომ არ მოსულიყო პოლიტიკაში, დღეს ქვეყანა შეიძლება საერთოდ აღარ გვქონოდა. 2012 წელს წინა, მჩაგვრელი, კრიმინალი ხელისუფლება რომ დარჩენილიყო, დღეს ქვეყანა ომში ჩაბმული იქნებოდა. შეიძლება დაგვეკარგა სუვერენიტეტი და ბოლომდე განადგურებულიყო ჩვენი ქვეყანა.
თქვა, რომ ყველა გამარჯვებაში, რომელიც ქვეყანამ 2012 წლის შემდეგ მოიპოვა, ივანიშვილის ლომის წვლილი აქვს, “მთავარი, უნიკალური როლი”.
ღარიბაშვილმა ახსენა შეცვლილი გეოპოლიტიკური ვითარება, შეცვლილი მსოფლიო წესრიგი და თქვა, რომ ასეთ ურთულეს გეოპოლიტიკურ ვითარებაში ივანიშვილის როლი ისევ გადამწყვეტი იქნება:
“მომდევნო 10 წელი ძალიან რთული პერიოდი იქნება არა მხოლოდ რეგიონში, არამედ მთელ მსოფლიოში. ამიტომ, ისეთი ვითარებაა დღეს ქვეყანასა და მსოფლიოში, რომ აუცილებელი იყო ბატონი ბიძინას პოლიტიკაში დაბრუნება“
ირაკლი კობახიძე: ეს არის ძალიან მნიშვნელოვანი მოვლენა ჩვენს პოლიტიკურ ცხოვრებაში”
პარტია “ქართული ოცნების” თავმჯდომარემ, ირაკლი კობახიძემ თქვა, რომ ივანიშვილმა პოლიტიკაში დაბრუნების გადაწყვეტილება გამოწვევებზე საპასუხოდ მიიღო.
„ეს არის ძალიან მნიშვნელოვანი მოვლენა ჩვენს პოლიტიკურ ცხოვრებაში. ძალიან მნიშვნელოვანი სიახლეა, რაც კიდევ უფრო გააძლიერებს არამარტო ჩვენს გუნდს, არამედ ჩვენს ქვეყანას, მისცემს შესაძლებლობებს რომ დიდ წარმატებებს მიაღწიოს შემდგომში. მადლობა უნდა გადავუხადოთ ივანიშვილს ასეთი გადაწყვეტილებისთვის”.
მან თქვა, რომ პარტიის ყველა წევრი და მხარდამჭერი ამ მადლობას იზიარებს.
კობახიძემ თქვა, რომ მისი დაბრუნების მიზეზი არ არის გუნდის სისუსტე.
“პირიქით, თავად ივანიშვილმა აღნიშნა, რომ დღეს გუნდს ძალიან ძლიერი პოზიციები აქვს. მის სიტყვაში იყო ნათქვამი, ხვალ რომ საპარლამენტო არჩევნები ჩატარდეს 90-100 მანდატის აღება კამპანიის გარეშეც არ გაგვიჭირდებოდა. თუმცა, იმ პირობებში, რაზეც ბიძინა ივანიშვილი საუბრობდა, რომ ოპოზიცია სრულად მოშლილია და განადგურებული, სხვა გამოწვევებია, სწორედ ამ გამოწვევებზე საპასუხოდ მიიღო ეს გადაწყვეტილება”.
კობახიძე გამოეხმაურა არაფორმალურ მმართველობაზე საუბარსას და თქვა, რომ რჩევების მიცემა ჯანსაღი მოვლენაა:
“თუ არაფორმალური მმართველობა იყო დაბრუნება რატომ სჭირდებოდა? დღევანდელი გადაწყვეტილებით დადასტურდა, რომ არავითარ არაფორმალურ მმართველობას არ ჰქონია ადგილი ჩვენს ქვეყანაში. რაც შეეხება რჩევების მიცემას, ეს ჯანსაღი მოვლენაა, ნებისმიერ ქვეყანაში ხდება ეს. რჩევების მიცემა არ ნიშნავს არაფორმალურ მმართველობას“,- აღნიშნა კობახიძემ.
შეგახსენებთ, დღეს ივანიშვილმა თქვა, რომ პოლიტიკიდან მეორედ წასვლის შემდეგ, ის გუნდის 2-3 წევრს რჩევებს აძლევდა.
შალვა პაპუაშვილი: პოლიტიკაში ბიძინა ივანიშვილის ყოფნა გულისხმობს უფრო მეტ კონსოლიდირებას
“პოლიტიკაში ბიძინა ივანიშვილის ყოფნა გულისხმობს მეტ კონსოლიდირებას როგორც „ქართული ოცნების“ გუნდის, ისე მთლიანად საზოგადოების”, – ეს განცხადება პარლამენტის თავმჯდომარეს შალვა პაპუაშვილს ეკუთვნის.
პაპუაშვილმაც გაიმეორა მისი თანაპარტიელების სიტყვები, რომ “განადგურებული ოპოზიცია თავის თავში რისკებსაც შეიცავს”:
„ვინაიდან სუსტი და უუნარო ოპოზიცია, ზოგადად, ჯგუფები, როგორც წესი, ამ დროს გადადიან ისეთ ქმედებებზე, რომელიც საფრთხეს უქმნის ქვეყანას. ამიტომ, ახლა განსაკუთრებით მნიშვნელოვანია, რომ მთლიანად გუნდი და საზოგადოება შეიკრას ერთ გუნდად. რათა, ყველა ის ხიფათი, რომელიც საქართველოს ქვეყნის შიგნით თუ გარედან ელოდება, ავიცილოთ. და, მომავალი წლის ბოლოს, ამ დროს ყველამ ერთად აღვნიშნოთ საქართველოს გამარჯვება“
შეგახსენებთ, პარტია “ქართული ოცნების” დამფუძნებელი ბიძინა ივანიშვილი, უკვე მესამედ, ოფიციალურად დაბრუნდა პოლიტიკაში. დაბრუნებიდან პირველ განცხადებაში, მან ისაუბრა გლობალურ გამოწვევებზე, როგორც მისი დაბრუნების ერთ-ერთ მიზეზზე. მიანიშნა, რომ არსებობს გუნდის შიგნით დაპირისპირების საფრთხე და გუნდი არ არის გამართული. ასევე თქვა, რომ მისი დაბრუნების ერთ-ერთი მიზეზი “ფაქტობრივად განადგულებული ოპოზიციაა”, რომელიც ვეღარ უწევს ოპონირებას ხელისუფლებას.
2012 წელს, საპარლამენტო არჩევნებში გამარჯვების შემდეგ, პარტიის დამფუძნებელი საქართველოს პრემიერ-მინისტრად აირჩიეს. ივანიშვილმა თანამდებობა 2013 წლის ნოემბერში დატოვა. ხუთი წლის შემდეგ, პოლიტიკაში კვლავ დაბრუნდა და “ქართული ოცნების” თავმჯდომარე გახდა. 2018 წელიც არჩევნების წელი იყო – ქვეყანაში საპრეზიდენტო არჩევნები ტარდებოდა. 2021 წელს მან პოლიტიკიდან წასვლის შესახებ განაცხადა.
ოპოზიციასა და სამოქალაქო სექტორს მიაჩნია, რომ ივანიშვილი პოლიტიკიდან არ წასულა. ისინი ამბობენ, რომ ივანიშვილი პარტიას კულისებიდან მართავდა და მნიშვნელოვანი გადაწყვეტილებებს ის იღებდა.
2024 წელს საქართველოში მნიშვნელოვანი საპაროლამენტო არჩევნებია.
“ოცნება” ივანიშვილის დაბრუნებაზე
