ნიკა მელიამ საპატიმრო დატოვა - მას გირაო ევროკავშირმა გადაუხადა. პირველი კომენტარები
“ერთიანი ნაციონალური მოძრაობის” თავმჯდომარემ ნიკა მელიამ საპატიმრო დატოვა. მას გირაო, 40 000 ლარი ევროკავშირმა გადაუხადა.
პროცესს არ ესწრებოდა თავად ბრალდებული მელია, რადგან ის წინა სხდომაზე მოსამართლემ გააძევა.
მხარდამჭერები და მედია ნიკა მელიას ციხის მთავარ შესასვლელთან ელოდა, თუმცა ის სხვა გასასვლელიდან გამოიყვანეს.
“პრაქტიკულად სახურავიდან გადმომაძვრინეს, რომ ეს აურზაური მომხდარიყო”, – განაცხადა მელიამ.
მან განსაკუთრებული მადლობა გადაუხადა ევროკავშირის ელჩს კარლ ჰარცელს. მან ასევე მადლობა გადაუხადა ევროპული საბჭოს პრეზიდენტს შარლ მიშელს და ამერიკის ელჩს კელი დეგნანს.
მელიამ ხაზგასმით გადაუხადა მადლობა ლიეტუველ დეპუტატ ჟიგიმანტას პავილიონისს. მისი თქმით, ეს არის ადამიანი – ლიეტუვის საგარეო ურთიერთობათა კომიტეტის თავმჯდომარე – რომელმაც გადაჭარბების გარეშე გამოაღვიძა საერთაშორისო საზოგადოება:
“მაშინ, როდესაც ყველაზე მეტად მიჭირდა ბევრი თვალსაზრისით, ჩამოფრინდა ლიეტუვიდან საქართველოში და მოვიდა „ნაციონალური მოძრაობის“ ცენტრალურ ოფისში სოლიდარობის გამოსაცხადებლად და ამის შემდეგ უზარმაზარი შრომა გასწია, რომ საერთაშორისო საზოგადოების სწორი რეაქცია ყოფილიყო 23 თებერვლის შემდეგ.”
რაც შეეხება ჟურნალისტების კითხვას, აპირებს თუ არა ნიკა მელია თბილისის მერობას, მან უპასუხა:
“თუკი რამეზე ნაკლებად მიფიქრია აქ, მიფიქრია მერობის კანდიდატობაზე. უბრალოდ, მე არ მინდა ახლა მოკლე კომენტარით შემოვიფარგლო ამ საკითხზე. მინდა-არმინდა, პოზიცია გამიმრუდდება, ამას სჭირდება კარგი ინტერვიუ და ყველა კითხვაზე პასუხს გაგცემთ”.
რა მოხდა
ევროკავშირმა ნიკა მელიას გასათავისუფლებლად 40 000 ლარი გირაო 8 მაისს გადაიხადა.
“დღეს გადახდილი იყო 40 000 ლარის ოდენობის გირაო ბ-ნ მელიას წინასწარი პატიმრობიდან გასათავისუფლებლად, რაც 2021 წლის 19 აპრილს ევროკავშირის მედიაციით მიღებული შეთანხმების კონტექსტში პოლიტიკური პარტიების მიერ მიღწეულ ურთიერთგაგებას მოჰყვა. “, – წერია ევროკავშირის განცხადებაში.
ევროკავშირის მიერ გირაოს გადახდის საკითხი დღის წესრიგში მას შემდეგ დადგა, რაც ევროპული საბჭოს პრეზიდენტის, შარლ მიშელის 19 აპრილის დოკუმენტს ხელისუფლებამ და ოპოზიციონერი პოლიტიკოსების ნაწილმა ხელი მოაწერა.
ნიკა მელიამ 26 აპრილს მიმართვა გაავრცელა და მზადყოფნა გამოთქვა, დასთანხმდეს ევროკავშირის მიერ შემოთავაზებულ გირაოს იმ შემთხვევაში, თუ 2019 წლის 19-21 ივნისის მოვლენების ამნისტიის კანონის მიღება დღის წესრიგიდან მოიხსნება.
პარლამენტში ამჯერად ორი ამნისტიის კანონპროექტია დაინიცირებული, რომელიც შარლ მიშელის შეთანხმების ნაწილია. კონონპროექტი უკვე დააინიცირა ცალკე ხელისუფლებამ და ცალკე ოპოზიციამ.
რა წერია შარლ მიშელის დოკუმენტში
18 აპრილს ევროპული საბჭოს პრეზიდენტმა შარლ მიშელმა წინადადებების ახალი პაკეტი შესთავაზა საქართველოს პოლიტიკურ პარტიებს.
დოკუმენტს ჰქვია “სამომავლო გზა საქართველოსთვის” და იგი რამდენიმე მნიშვნელოვანი დეტალით განსხვავდება ბოლო დოკუმენტისგან, რომელიც შარლ მიშელის წარმომადგენელმა, ქრისტიან დანიელსონმა 31 მარტს წარუდგინა ოპოზიციას.
სიახლეები ეხება ორ ყველაზე მნიშვნელოვან და მხარეებს შორის ყველაზე შეუთანხმებელ პუნქტს – პოლიტიკური ნიშნით დაკავებულ ადამიანებს (ნიკა მელია და გიორგი რურუა) და ახალ საპარლამენტო არჩევნებს, რომელთა რიგგარეშე ჩატარებასაც ითხოვს ოპოზიცია.
ახალი წინადადების შესათანხმებლად 18 აპრილს ევროკავშირის დელეგაციის ოფისში მივიდა ყველა პარტიის წარმომადგენელი, მმართველი პარტიის გარდა. მოგვიანებით მმართველმა პარტიამ გაავრცელა განცხადება, სადაც წერია, რომ ხელისუფლება “მზად არის” მიშელის წინადადებების განსახილველად.
“საქართველოს გაუმარჯოს, ვულოცავ პოლიტიკურ ლიდერებს ხელმოწერას კრიზისიდან გამოსავლელად”, – დაწერა ევროპული საბჭოს პრეზიდენტმა შარლ მიშელმა ტვიტერზე მას შემდეგ, მხარეებმა დოკუმენტს ხელი მოაწერეს.
შეთანხმებაზე ხელი არ მოუწერია “ერთიან ნაციონალურ მოძრაობას” და “ევროპულ საქართველოს”, თუმცა ამ პარტიების ცალკეულმა თუ ყოფილმა წევრებმა შეთანხმებას ხელი მოაწერეს – ასეთია სალომე სამადაშვილი, ხათუნა სამნიძე და დავით ბაქრაძე.
________________________________
● გიორგი რურუა პრეზიდენტმა შეიწყალა. მან ციხე უკვე დატოვა
● კრიზისის დასასრული? ხელისუფლებამ და ოპოზიციის ნაწილმა შეთანხმებას ხელი მოაწერა
● მიხეილ სააკაშვილი: მას შემდეგ, რაც მელია ციხეს დატოვებს, ენმ-მ ხელი უნდა მოაწეროს დოკუმენტს
________________________________
ნიკა მელიას საქმე
ნიკა მელია ყოფილი მმართველი გუნდის, “ერთიანი ნაციონალური მოძრაობის” თავმჯდომარეა. ეს პარტია საქართველოს ექს-პრეზიდენტმა მიხეილ სააკაშვილმა დააფუძნა, რომელიც ამჟამად ქვეყანაში არ იმყოფება, რადგან მასზე რამდენიმე სისხლის სამართლის საქმეა აღძრული და დიდი ალბათობით, ქვეყანაში შემოსვლისთანავე დააკავებენ.
ნიკა მელიას ბრალად ედება 2019 წლის 20 ივნისს, რუსი დეპუტატის, სერგეი გავრილვის საქართველოში ვიზიტის გამო პარლამენტის წინ გამართულ აქციაზე ჯგუფური ძალადობის ხელმძღვანელობა და მასში მონაწილეობა.
2019 წელს სასამართლომ მელია არ დააკავა. ის 30 ათასი ლარი გირაოს გადახდის შემდეგ გაათავისუფლეს და ხელზე ელექტრონული სამაჯური გაუკეთეს, რომლის ტარების ვალდებულება ჰქონდა, რათა სამართალდამცავებს სცოდნოდათ თუ სად გადაადგილდებოდა იგი.
2020 წლის ნოემბერში, აქციაზე, რომელზეც ოპოზიცია საპარლამენტო არჩევნების შედეგებს აპროტესტებდა, მელიამ დემონსტრაციულად, პროტესტის ნიშნად მოიხსნა სამაჯური და მას უსამართლობის სიმბოლო უწოდა.
საპასუხოდ ოპოზიციონერს გირაოს თანხა კიდევ 40 ათასი ლარით გაუზარდეს, რომლის გადახდაზეც მან უარი თქვა. სწორედ გირაოს გადაუხდელობა გახდა ოფიციალური მიზეზი, რის გამოც ნიკა მელიას დაკავების შესახებ სასამართლომ გადაწყვეტილება მიიღო. მანამდე პარლამენტმა მას დეპუტატის უფლებამოსილება შეუჩერა.
არასამთავრობო ორგანიზაციები, ასევე სახალხო დამცველი და საქართველოს საერთშორისო პარტნიორები მუდმივად მიუთითებდნენ საქმეში არსებულ სამართლებრივ პრობლემებზე და საქმეს პოლიტიკურად მოტივირებულად მიიჩნევდნენ.
მელიას დაკავებამდე რამდენიმე დღით ადრე ქვეყანაში საქართველოს მეგობარი ქვეყნის და ევროატლანტიკურ სტრუქტურებში ინტეგრაციის დიდი მხარდამჭერის, ლიეტუვის პარლამენტის საგარეო ურთიერთობათა კომიტეტის თავმჯდომარე ჟიგიმანტას პავილიონისი იყო ჩამოსული, რომელიც მისი თქმით, ცდილობდა საქართველოს ხელისუფლება დაერწმუნებინა, რომ მელიას დაპატიმრებას უარყოფითი საერთაშორისო რეზონანსი მოჰყვებოდა.
ნიკა მელიას დაკავების შემდეგ, საქართველოში კიდევ უფრო გამწვავდა პოლიტიკური კრიზისი. პოლიტიკური ჩიხიდან გამოსავლის პოვნა ვერ შეძლეს ვერც ევროკავშირის მაღალჩინოსნებმა – საქართველოში ევროსაბჭოს პრეზიდენტი შარლ მიშელი იყო ჩამოსული, ასევე ბრიუსელში იყო მიწვეული ვითარების განსახილველად პრემიერი ღარიბაშვილი. ყველა შეხვედრა და რაუნდი უშედეგო აღმოჩნდა.
საქართველოში ჩამოვიდა მიშელის სპეციალური წარმომადგენელი კრისტიან დანიელსონიც, თუმცა მისი 5-დღიანი ვიზიტი ჩავარდა – ხელისუფლებამ და ოპოზიციამ შეთანხმებას ვერ მიაღწიეს.
დანიელსონი საქართველოში მეორეჯერაც ჩამოვიდა, თუმცა მოლაპარაკება ამჯერადაც უშედეგო აღმოჩნდა.
საბოლოოდ, ჩიხიდან გამოსავალი ისევ ევროპული საბჭოს პრეზიდენტმა, შარლ მიშელმა იპოვა – ამნისტია ან გირაო, რომელსაც ნიკა მელიას თავად ევროკავშირი გადაუხდის.
ასევე, დოკუმენტზე ხელმოწერიდან რამდენიმე დღეში, პრეზიდენტ სალომე ზურაბიშვილის შეწყალებით ციხე დატოვა “მთავარი არხის” მეწილემ, გიორგი რურუამ.
კომენტარები
ვიოლა ფონ კრამონი, ევროდეპუტატი: “ნიკა მელიას გათავისუფლებით 19 აპრილის შეთანხმების კიდევ ერთი მნიშვნელოვანი ეტაპი იქნა მიღწეული. ახლა გადამწყვეტი მნიშვნელობა აქვს სხვა საკითხებზე ყურადღების გამახვილებას, რაც მხარეებს შორის თანამშრომლობას მოითხოვს და ხელს შეუწყობს უფრო სამართლიან და გამჭვირვალე პარლამენტს საქართველოში. დანარჩენი ოპოზიცია მიწვეულია შეთანხმებაში შესასვლელად.”
დავით ბაქრაძე, დეპუტატი: “ეს ფაქტი, ისევე როგორ გიორგი რურუას გათავისუფლება, კიდევ ერთხელ ადასტურებს, რომ ბრძოლას ყოველთვის აქვს აზრი და ამ ბრძოლაში, გააზრებული სტრატეგიით და ჩვენი ევროპელი და ამერიკელი მოკავშირეების მხარდაჭერით, ყოველთვის შეიძლება შედეგის მიღწევა. დღევანდელი დღე არის ყველა იმ ადამიანის გამარჯვება, ვისაც სურს ჩვენს ქვეყანაში პოლიტიკური დევნის დასრულება.”
იაგო კაჭკაჭიშვილი, სოციოლოგი: “ნიკა მელია ნაკლები პოლიტიკური დანაკარგებით გამოვიდა ციხიდან – ის გამოდის ევროსტრუქტურების მიერ მხარდაჭერილი პოლიტიკოსი, რაც რეპუტაციას უდავოდ უძლიერებს. ნიკა მელია ნაკლები პოლიტიკური დანაკარგებით გამოვიდა ციხიდან, თანაც არა მხოლოდ „ნაციონალური მოძრაობის“ ლიდერი, მას ასევე აქვს გარკვეული ზეპარტიული ლიდერის შარმი.”
მიხეილ სააკაშვილი, საქართველოს მესამე პრეზიდენტი: “აღფრთოვანებული ვარ მისი პრინციპულობით და შეუვალობით. მიმაჩნია, რომ მისი გათავისუფლებით იწყება ქართველი ხალხის ბრძოლის მნიშვნელოვანი, ახალი ეტაპი.“
