ნიკა მელია უკრაინელებს: საქართველო არ არის ღარიბაშვილი. გვრცხვენია და ბოდიშს ვიხდით

ნიკა მელია უკრაინელებს

ოპოზიციური პოლიტიკური პარტიის, „ერთიანი ნაციონალური მოძრაობის“ თავმჯდომარემ ნიკა მელიამ, ქართველი ხალხის სახელით უკრაინელებს ბოდიში მოუხადა ქვეყნის პრემიერის, ირაკლი ღარიბაშვილის განცხადებების გამო.

საქართველოს პრემიერმინისტრმა ირაკლი ღარიბაშვილმა დღეს, 25 თებერვალს, განაცხადა, რომ უკრაინამ ომი ვერ აიცილა და ამის გამო ყველაზე მეტად უკრაინელი ხალხი, სახელმწიფო დაზარალდება. მანვე თქვა, რომ საქართველო არ მიუერთდება იმ სანქციებს, რომელიც რუსეთს დასავლეთმა დაუწესა.

„ძვირფასო უკრაინელებო, იცოდეთ რომ საქართველო არ არის ირაკლი ღარიბაშვილი და ბიძინა ივანიშვილი. საქართველო არის ის ათასობით ახალგაზრდა, ვინც გუშინ თბილისის ქუჩები გაავსო. ის ჩვეულებრივი ქართველია,  რომელიც ტირის ტელეეკრანებთან, რომელიც მზად არის ბოლო თეთრი გაიღოს უკრაინელი ძმისა და დის დასახმარებლად.

და თუკი მაინც, ვინმესთვის უკრაინაში, საქართველო არის ირაკლი ღარიბაშვილი და ბიძინა ივანიშვილი, ჩენ გვრცხვენია და ამისთვის ვიხდით დიდ ბოდიშს“, – განაცხადა ნიკა მელიამ სპეციალურ ბრიფინგზე.

• LIVE: რუსეთი უკრაინაში შეიჭრა. დღე მეორე. განახლებადი ინფორმაცია
• რატომ არის პუტინის ომი დასავლეთის ყველაზე დიდი გამოცდა მეორე მსოფლიო ომის შემდეგ

ირაკლი ღარიბაშვილმა განაცხადა, რომ მას თავისი საქმე აქვს, , პარლამენტს – თავისი, ომი უკრაინაში მიმდინარეობს. უკრაინაში „ჩასვლა ჩასვლისთვის არაფრის მომცემი არ არის“ და ამას არ გეგმავს.

„ომია, და სამწუხაროდ, ეს ომი სადღაც კი არ არის, რომ გულგრილად თქვა, რომ ეს ომი სადღაც არის და მე სხვა საქმე მაქვსო, ეს არის ყველაზე უღირსი პოზიცია, რომელიც ქართველმა ადამიანმა შეიძლება დააფიქსიროს. მითუმეტეს, როგორ შეიძლება ეს თქვას უკრაინელი, გმირი ხალხის მეგობარი ქართველი ხალხის მეთაურმა.

მე მრცხვენია ამისი და ბოდიში უკრაინელ ძვირფას მეგობრებს, დებს და ძმებს, ბოდიში იმ ჯარისკაცებს, რომლებიც ახლა ფრონტის წინა ხაზზე არიან, ბოდიში იმ ქართველი ოჯახის წევრებს, ვისი სახელი და გვარებიც ამოტვიფრულია გმირთა მემორიალზე, დიდი ბოდიში იმ ქართველ ჯარისკაცებს, რომლებმაც ყველაზე ძვირფასი, რაც კი ჰქონდათ მათ, სიცოცხლე, დათმეს სოხუმისა და გაგრის მისადგომებთან“, – თქვა ნიკა მელიამ.

• კვება, მგზავრობა, ღამის გასათევი – საქართველოში ჩარჩენილ უკრაინელებს დახმარებას სთავაზობენ
• თბილისში უკრაინის მხარდასაჭერი აქცია მიმდინარეობს. ფოტო

მან ბოდიში მოუხადა ყველა იმ ქართველ ჯარისკაცს, ვინც ახლა უკრაინაში იბრძვის. უკრაინელებს, ვინც 1993 წელს საქართველოს ეხმარებოდა, უკრაინის მოქმედ და ყოფილ პრეზიდენტს, რომელიც 2008 წელს საქართველოში, რუსთველის გამზირზე იდგა:

“‘დიდი ბოდიში იმისათვის, რომ არ შეუერთდა ჩვენი ქვეყნის მთავრობა იმ სანქციებს, რომლებსაც ცივილიზებული სამყარო უერთდება. მაგრამ, ქართველი ხალხი სანქციებს კი არა, ჩვენს სულს და გულს უერთებს თქვენს ბრძოლას.

დიდი მადლობა, ქართველი ხალხი თქვენთან ერთად არის” – მიმართა ნიკა მელიამ უკრაინელებს.

გუშინ “ქართულმა ოცნებამ” განაცხადა, რომ რიგგარეშე სხდომას, რომელიც უკრაინის საკითხზე ოპოზიციის თხოვნით პრეზიდენტმა მოიწვია, არ დაესწრებიან. დღეს კი მმართველი პარტიის წევრები პარლამენტში საერთოდ არ გამოჩენილან. მმართველი პარტიის დეპუტატმა გივი მიქანაძემ, რიგგარეშე სხდომის მოწვევას შოუ უწოდა.

უკრაინის საკითხზე რიგგარეშე სხდომის მოწვევის თხოვნით პრეზიდენტს 41-მა ოპოზიციონერმა დეპუტატმა მიმართა. მათ განაცხადეს, რომ საქართველოს ხელისუფლების დუმილი საქართველოს სერიოზული ფასი დაუჯდება. ოპოზიციამ ხელისუფლებისგან ახალი რეზოლუციის მიღება მოითხოვა.საქართველოს პრეზიდენტმა სალომე ზურაბიშვილმა ოპოზიციის ეს მოთხოვნა დააკმაყოფილა.

2022 წლის 24 თებერვლის დილით, რუსეთმა უკრაინის დაბომბვა დაიწყო. დონბასისა და ლუგანსკის სეპარატისტული რეგიონების დაცვის საბაბით უკრაინაში პრეზიდენტმა პუტინმა „სამხედრო ოპერაციის“ დაწყების შესახებ განაცხადა.

ამ განცხადებიდან მალევე სტრატეგიული ობიექტების დაბომბვა დაიწყო უკრაინის ქალაქების შემოგარენში, მათ შორის, კიევში.