"მზია ამაღლობელს ჰქონდა ჯანმრთელობის პრობლემები, შიმშილობის ფონზე არსებობს გართულების რისკი" - ომბუდსმენი
მზია ამაღლობელი შიმშილობს
საქართველოს სახალხო დამცველი ავრცელებს განცხადებას “ბათუმელებისა” და “ნეტგაზეთის” დამფუძნებლის, სინდისის პატიმარ მზია ამაღლობელის ჯანმრთელობის მდგომარეობის შესახებ, რომელიც უკვე 20 დღეა შიმშილობს.
განცხადებაში ნათქვამია, რომ მზია ამაღლობელის ჯანმრთელობის მდგომარეობა ამ ეტაპზე დამაკმაყოფილებელია. თუმცა, აღნიშნულია, რომ “მას დაკავებამდე ჰქონდა ჯანმრთელობის კონკრეტული პრობლემები და შიმშილობის ფონზე არსებობს მისი გართულების რისკი”.
დამოუკიდებელი ონლაინ გამოცემების, “ბათუმელებისა” და “ნეტგაზეთის” დამფუძნებელი და მედიამენეჯერი მზია ამაღლობელი 11-12 იანვრის ღამეს, ბათუმში, პოლიციის სამმართველოსთან მიმდინარე აქციაზე დააკავეს. დაკავების დღიდან ის შიმშილობს, მხოლოდ წყალს იღებს.
გუშინ, 30 იანვარს, საქართველოს ახალგაზრდა იურისტთა ასოციაციამ, რომელიც მზია ამაღლობელის ინტერესებს იცავს, განაცხადა, რომ მას უკვე უჭირს ადვოკატებთან შესახვედრად საჭირო მანძილის გავლა.
31 იანვარი მზია ამაღლობელის შიმშილობის მე-20 დღეა და ამ დრომდე უცნობია კონკრეტული მონაცემები მისი ჯანმრთელობის მდგომარეობის შესახებ. მისმა ახლობლებმა არ იციან, რა ტიპის სამედიცინო კვლევები უტარდება უკანონოდ დაკავებულ მზია ამაღლობელს, როგორია მაჩვენებლები. ეს იმ ფონზე, როდესაც, მათი თქმით, პატიმარს რამდენიმე ქრონიკული დაავადება აქვს.
ამ მოცემულობის გამო, ბოლო რამდენიმე დღეა მზია ამაღლობელის მეგობრები, კოლეგები, სხვადასხვა ორგანიზაციები ითხოვენ, სახალხო დამცველის აპარატმა შექმნას ექიმთა კონსილიუმი, პენიტენციურმა სამსახურმა კი ჩაუტაროს სათანადო გამოკვლევები.
ამ მოთხოვნების პასუხად, სახალხო დამცველის განცხადებაში ნათქვამია, რომ ექიმი გაესაუბრა მზია ამაღლობელს, გაეცნო მის სამედიცინო დოკუმენტაციას და გაესაუბრა პენიტენციური დაწესებულების სამედიცინო პერსონალს.
“მზია ამაღლობელის ჯანმრთელობის მდგომარეობა ამ ეტაპზე დამაკმაყოფილებელია. ამავდროულად, უნდა აღინიშნოს, რომ მას დაკავებამდე ჰქონდა ჯანმრთელობის კონკრეტული პრობლემები და შიმშილობის ფონზე არსებობს მისი გართულების რისკი“, – ვკითხულობთ განცხადებაში.
უწყება წერს, რომ მზია ამაღლობელს უტარდება სამედიცინო კვლევები და იმყოფება ინტენსიური სამედიცინო მეთვალყურეობის ქვეშ.
ომბუდსმენის განცხადებიდან ვიგებთ, რომ სახალხო დამცველის აპარატმა მიიღო მიმდინარე კვირაში ჩატარებული უახლესი გამოკვლევების შედეგები, რაც დაცვის მხარეს გადაეცა.
რაც შეეხება სამედიცინო კონსილიუმის შექმნას, სახალხო დამცველი წერს, რომ არც თავად მზია ამაღლობელს, არც მის ოჯახს და არც მის კანონიერ წარმომადგენლებს, მსგავსი მოთხოვნა არ დაუყენებიათ.
“სახალხო დამცველი განიხილავს, კანონმდებლობით მისთვის მინიჭებული მანდატის ფარგლებში, დამატებითი სპეციალისტების მოწვევის საკითხს, ასეთის აუცილებლობის გამოვლენის შემთხვევაში“, – ნათქვამია განცხადებაში.
სახალხო დამცველი განმარტავს, რომ უწყება არ ერთვებოდა და არ ერთვება პატიმრების მკურნალობის პროცესში. წერს, რომ მათი მანდატი პატიმრისთვის სამედიცინო მომსახურების მიწოდებაზე მონიტორინგია.
იქვე ნათქვამია, რომ თუ დაცვის მხარე მოითხოვს დამატებით კვლევებს, “სახალხო დამცველის აპარატი მოახდენს დამატებით რეაგირებას კომპეტენციის ფარგლებში“.
“სახალხო დამცველის აპარატი ინტენსიურად გააგრძელებს სპეციალური პენიტენციური სამსახურიდან მზია ამაღლობელისთვის გაწეული სამედიცინო მომსახურების დოკუმენტების გამოთხოვას და პერიოდულად მოინახულებს მოშიმშილე ჟურნალისტს, შედეგების შესახებ კი, განსაკუთრებული კატეგორიის პერსონალური ინფორმაციის დაცვის ფარგლებში, ვაცნობებთ საზოგადოებას“, – ნათქვამია განცხადებაში.
მზია ამაღლობელის საქმე
დამოუკიდებელი ონლაინ გამოცემების, “ბათუმელებისა” და “ნეტგაზეთის” დამფუძნებელი და მედიამენეჯერი მზია ამაღლობელი 11-12 იანვრის ღამეს, ბათუმში, პოლიციის სამმართველოსთან მიმდინარე აქციაზე ორჯერ დააკავეს.
თავდაპირველად იგი დააკავეს პოლიციის შენობაზე სტიკერის გაკვრისთვის, რომელზეც ეწერა – “იფიცება საქართველო”. რამდენიმე საათში იგი გაათავისუფლეს ხელწერილის საფუძველზე. მაგრამ, მალევე მზია ამაღლობელი კვლავ დააკავეს პოლიციის უფროს ირაკლი დგებუაძისთვის სილის გაწვნის ფაქტზე. ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.
მზია ამაღლობელს სისხლის სამართლის დანაშაულს, პოლიციელზე თავდასხმას ედავებიან. მას 4-დან 7 წლამდე პატიმრობა ემუქრება. აღკვეთის ღონისძიების სახით მზია ამაღლობელს წინასწარი პატიმრობა აქვს შეფარდებული.
დაკავების დღიდან ის შიმშილობს. მხოლოდ წყალს იღებს.
მზია ამაღლობელი შიმშილობს