"მოგვხედეთ, ჩვენც აქ ვართ" - ამჯერად საქართველოს მთავრობას ფიტნეს-ცენტრები და ქორეოგრაფები მიმართავენ
საქართველოს ფიტნეს-ცენტრების წარმომადგენლები ამბობენ, რომ ხვალ შეზღუდვები რომც მოიხსნას, ისინი მაინც ვერ გაიხსნებიან, რადგან ფაქტობრივად გაკოტრების პირას არიან.
საგანგებოდ მოწყოფილ პრესკონფერენციაზე ფიტნეს-ცენტრებმა მთავრობისგან არა გახსნის თარიღის გადმოწევა, არამედ სესხის პროცენტის სუბსიდირებას და საგადასახადო შეღავათებს ითხოვს.
“წინააღმდეგ შემთხვევაში უბრალოდ ვერ გავიხსნებით. მოგვხედონ, ჩვენც აქ ვართ,” – უთხრა ონლაინ-გამოცემა BM.GE-ს “სნეპ-ფიტნესის” ქსელის დირექტორმა სოფო სოლოთაშვილმა.
მისი თქმით, დარგის ზუსტი ზარალი დათვლილი არ არის, “თუმცა იგი ათეულობით მილიონია”.
საქართველოში ფიტნეს-ცენტრები უკვე ცხრა თვეა არ მუშაობენ.
ბოლო წლებში ეს სფერო საქართველოში, კერძოდ კი, დიდ ქალაქებში აღმავლობას განიცდიდა. გაიხსნა ბევრი პატარა და დიდი, ქსელური ფიტნეს- კლუბი და სპორტული დარბაზი, სადაც ათასობით ადამიანი იყო დასაქმებული.
“მხოლოდ ჩვენს ქსელში დასაქმებული 150-მდე ადამიანი უმუშევრად არის დარჩენილი,” – ამბობს სოლოთაშვილი.
კიდევ ერთი მსხვილი ფიტნეს-ქსელის „ოქტოპუსის“ ხელმძღვანელმა გიორგი ასათიანმა გადაცემა „საქმის კურსში“ ასევე განაცხადა რომ ფიტნეს-კლუბებს აღარ გააჩნიათ იმის რესურსი, რომ ვალდებულებები გაისტუმრონ.
„ჩვენ წლების განმავლობაში ვახორციელებდით ამ დარგში ათობით მილიონი ლარის ინვესტიციას. ვავითარებდით დარგს, ჩვენი წვლილი ქვეყნის ეკონომიკაში შეგვქონდა და რეალურად პოპულარიზაციას ვუწევდით ჯანსაღი ცხოვრების წესს. თუმცა, დღეს ვართ იმ რეალობაში, რომ ჩვენი რესურსით ფუნქციონირების გაგრძელებას ვერ შევძლებთ“, – განაცხადა გიორგი ასათიანმა.
განათლების სამინისტროს მიმდებარე ტერიტორიაზე აქცია-პერფომანსით კოვიდშეზღუდვები გააპროტესტეს ქორეოგრაფებმაც.
მათ სამინისტროსთან ქართული ცეკვის ფორმები მიიტანეს.
ქორეოგრაფების თქმით, მთავრობის მიერ დაწესებული შეზღუდვები დამაზიანებელია როგორც ეკონომიკური მდგომარეობისთვის, ისე მათი მოსწავლეების სულიერი და ფიზიკური ჯანმრთელობისთვის.
“გარდა იმისა, რომ უმუშევრად ვართ დარჩენილები ხელოვანები… ბავშვები არიან ძალიან ცუდ მდგომარეობაში, მივიღებთ ძალიან ცუდ შედეგებს…ვხედავთ რა მდგომარეობაში არიან ისინი, როგორც ფიზიკურად, ასევე სულიერად”, – ამბობს აქციის მონაწილე ტელეკომპანია “მთავართან” ინტერვიუში.
საქართველოს მთავრობას ფიტნეს-კლუბების და ქორეოგრაფიული სტუდიების გახსნასთან დაკავშირებით გეგმები ჯერჯერობით არ აქვს.
ზაფხულში ისინი რეგულაციებით მუშაობდნენ – რეგლამენტირებული იყო ერთდროულად დარბაზში მყოფ ადამიანთა რაოდენობა, გაადგილებული იყო ინვენტარი, რომ დისტანცია დაეცვათ. ასევე გამკაცრებული იყო სხვა სანიტარული ზომები.
