"ქართული ოცნება" კანაფთან და მარიხუანასთან დაკავშირებულ ქმედებებზე პასუხისმგებლობას ამკაცრებს
მარიხუანის და კანაფის რეგულაცია
“ინტერპრესნიუსის” ინფორმაციით, “ქართული ოცნება” ნარკოტიკებთან, მათ შორის მცენარე კანაფთან და მარიხუანასთან დაკავშირებულ ქმედებებზე პასუხისმგებლობის გამკაცრებას გეგმავს.
კერძოდ, პარლამენტში წარდგენილია რვა სხვადასხვა კანონში ცვლილება – მათ შორის არის სისხლის სამართლის კოდექსში, ადმინისტრაციულ სამართალდარღვევათა კოდექსსა და ორგანიზებული დანაშაულისა და რეკეტის შესახებ კანონებში ცვლილებები.
რას გულისხმობს ცვლილებები
● სისხლის სამართლის კოდექსს ემატება ნორმები, რომლითაც დგინდება სისხლის სამართლებრივი პასუხისმგებლობა ისეთი ქმედებისთვის, როგორიც არის:
- ნარკოტიკული საშუალების, მისი ანალოგის, პრეკურსორის ან ახალი ფსიქოტროპული ნივთიერების უკანონო დამზადება, წარმოება, გადაზიდვა ან გადაგზავნა;
- ფსიქოტროპული ნივთიერების, მისი ანალოგის ან ძლიერმოქმედი ნივთიერების, მცენარე კანაფის ან მარიხუანის, სხვა ნარკოტიკული საშუალების, მისი ანალოგის, პრეკურსორის ან ახალი ფსიქოტროპული ნივთიერების გასაღება;
- ფსიქოტროპული ნივთიერების, მისი ანალოგის ან ძლიერმოქმედი ნივთიერების, მცენარე კანაფის ან მარიხუანის, სხვა ნარკოტიკული საშუალების, მისი ანალოგის, პრეკურსორის ან ახალი ფსიქოტროპული ნივთიერების გაყიდვა;
- ფსიქოტროპული ნივთიერების, მისი ანალოგის ან ძლიერმოქმედი ნივთიერების უკანონო დამზადება, წარმოება, გადაზიდვა ან გადაგზავნა.
● ასევე მკაცრდება ადმინისტრაციული პასუხისმგებლობა ნარკოტიკული საშუალების, მისი ანალოგის ან პრეკურსორის მცირე ოდენობით უკანონო დამზადებისთვის, შეძენისთვის, შენახვისთვის, გადაზიდვისთვის, გადაგზავნისთვის ან ექიმის დანიშნულების გარეშე მოხმარებისთვის.
● განისაზღვრება ნარკოვაჭრობისა და ნარკომოვაჭრის ცნება. აგრეთვე განისაზღვრება თუ ვინ შეიძლება იყოს ნარკომოვაჭრის ოჯახის წევრი, ახლო ნათესავი და დაკავშირებული პირი. დგინდება, თუ რა ჩაითვლება ნარკომოვაჭრის ქონებად.
● ამავე პროექტით, ადმინისტრაციულ სამართალდარღვევათა კოდექსის კონკრეტული მუხლებით გათვალისწინებულ შემთხვევაში, პირს 5 წლამდე ვადით შეეზღუდება სატრანსპორტო საშუალების მართვის, საჯარო სამსახურში საქმიანობის და იარაღის დამზადება, შეძენა, შენახვისა და ტარების უფლება.
“ქართული ოცნების” აღმასრულებელმა მდივანმა, მამუკა მდინარაძემ ბრიფინგზე განაცხადა, რომ “საზოგადოებისთვის მიცემული დაპირების შესაბამისად”, შემუშავდა ანტინარკოტიკული რეფორმა და საქართველოში ნარკოპოლიტიკა გამკაცრდება.
“ბოლო წლების განმავლობაში თავს მოხვეული ფსევდოლიბერალური იდეოლოგიის და გარედან თავსმოხვეული მიდგომების ნაწილი იყო ე.წ. ლიბერალური ნარკოპოლიტიკა, რომელიც აზიანებს განსაკუთრებით ახალგაზრდა ადამიანებს, გენოფონდს და არაფერია უფრო ანტიქართული, ვიდრე ლიბერალური ნარკოპოლიტიკით გამოწვეული შედეგები.
შევიმუშავეთ ანტინარკოტიკული რეფორმა, რომელსაც ვიწყებთ, ერთ-ერთი მთავარი ინიციატორი გახლავთ პრეზიდენტი მიხეილ ყაველაშვილი, ასევე ჩართული იყო უმრავლესობა და საპარლამენტო ოპოზიციაც.
ნარკორეალიზატორებისთვის არა თუ განსაკუთრებით დიდი ან დიდი ოდენობის ნარკოტიკის, არამედ მცირე ოდენობით ნარკოტიკის გაყიდვისთვისაც კი სასჯელი 12-დან 20 წლამდე ან უვადო პატიმრობა იქნება.
“ორგანიზებული დანაშაულისა და რეკეტის შესახებ” საქართველოს კანონის პროექტით განისაზღვრება ნარკოვაჭრობისა და ნარკომოვაჭრის ცნება და მოწესრიგდება მათთან დაკავშირებული ცალკეული საკითხები. კერძოდ, განისაზღვრება, ვინ შეიძლება იყოს ნარკომოვაჭრის ოჯახის წევრი, ახლო ნათესავი და დაკავშირებული პირი. ამასთანავე, დადგინდება, თუ რა ჩაითვლება ნარკომოვაჭრის ქონებად.
დაიხვეწება საკანონმდებლო ჩარჩო, რითაც შესაძლებელი გახდება ნარკორეალიზატორისთვის ან ნარკოტიკების გავრცელებაში ხელშემწყობი პირისთვის მის საკუთრებაში არსებული უძრავ-მოძრავი ქონების ჩამორთმევა და სახელმწიფოსთვის გადაცემა.
2025 წლის პირველი ივნისიდან, იმ შემთხვევაში, თუ პირს დაუდასტურდება ნარკოტიკის მოხმარების ფაქტი ან თუ პირი თავს აარიდებს ნარკოლოგიურ შემოწმებას, მას სამი წლით ჩამოერთმევა ნებისმიერი სახის სატრანსპორტო საშუალების მართვის უფლება.
ხუთი წლით ჩამოერთმევა საჯარო სამსახურში, პედაგოგიურ და საგანმანათლებლო დაწესებულებებში საქმიანობის უფლება, ასევე იარაღთან დაკავშირებული უფლებები. ცვლილებები, გამკაცრების მიმართულებით, შეეხება სისხლის სამართლის, ადმინისტრაციულ სამართალდარღვევათა კოდექსის, ნარკოტიკული დანაშაულის წინააღმდეგ ბრძოლის შესახებ კანონის სხვა შესაბამის ნორმებსაც.
აქვე, მივმართავთ კერძო სექტორის წარმომადგენლებს, რომ გაიზიარონ ეს მიდგომები და სახელმწიფოს ამოუდგნენ გვერდში ანტინარკოტიკული კამპანიის წარმოებაში და ჯანსაღი ცხოვრების წესის პოპულარიზაციაში. მომავალი თაობების გადარჩენისთვის ჩვენ ვაპირებთ ეს საკითხი – ანტინარკოტიკული რეფორმა, ანტინარკოტიკული კამპანია და ჯანსაღი ცხოვრების წესის პოპულარიზაცია ვაქციოთ განსაკუთრებულ ეროვნულ პრიორიტეტად”. – თქვა მდინარაძემ.
2018 წლის 30 ივლისს საქართველოს საკონსტიტუციო სასამართლომ მარიხუანის მოხმარებაზე ადმინისტრაციული ჯარიმა გააუქმა. რაც იმას ნიშნავს, რომ საქართველოში მარიხუანის მოხმარება სრულად ლეგალური გახდა. გადაწყვეტილება არ ეხება მარიხუანის მოყვანას, ფლობას ან გაყიდვას.
მარიხუანის რეგულირებაზე საქართველომ კანონი 2019 წელს მიიღო. პარლამენტის მიერ მიღებული საკანონმდებლო ცვლილებები, საქართველოში მარიხუანის მოხმარებას მკაცრ სამართლებრივ ჩარჩოებში აქცევს.
შს სამინისტროს მიერ ინიცირებულ კანონპროექტში, მკაცრადაა რეგულირებულია თუ ვინ, სად და როდის შეიძლება მოიხმაროს მარიხუანა ისე, რომ კანონი არ დაარღვიოს.
ამავე დროს, ახალი კანონი ბევრ პასუხგაუცემელ კითხვას ტოვებს. მაგალითად, გაუგებარია როგორ უნდა მოწიოს ადამიანმა მარიხუანა, თუკი მისი შეძენა-შენახვა-კულტივირება ნებისმიერ შემთხვევაში დასჯადია.
გაიზარდა სანქცია ნარკოტიკული საშუალების, მათ შორის, მარიხუანის მოხმარების პოპულარიზაციის ან რეკლამირებისთვის. თუ მანამდე ამ საქმიანობისთვის ფიზიკურ პირებს 500 ლარით (187 $), ხოლო იურიდიულ პირებს 5 ათასი ლარით (1 800 $) აჯარიმებდნენ, ახლა ჯარიმა რიგითი მოქალაქეებისთვის 5-დან 10 ათას ლარამდე (1 800- 3 700 $) გაიზარდა, ხოლო იურიდიული პირებისთვის 10-დან 20 ათასამდე ლარი გახდა (7 400 $).
როგორ რეგულირდება კანაფის მოხმარება საქართველოში, შეგიძლიათ ნახოთ აქ.
