ლევან ვარშალომიძე ბათუმში ენმ-ს მაჟორიტარი დეპუტატობის კანდიდატი იქნება

აჭარის მთავრობის ყოფილი თავმჯდომარე და ამჟამად უკრაინის პრეზიდენტის ადმინისტრაციასთან არსებული საინვესტიციო საბჭოს მდივანი, ლევან ვარშალომიძე 2020 წლის ოქტომბრის საპარლამენტო არჩევნებში “ერთიანი ნაციონალური მოძრაობის” სახელით ბათუმის მაჟორიტარი დეპუტატობისთვის იბრძოლებს. 

“თუ ვინმეს ეგონა, უკრაინაში მაღალი პოზიციის გამო საქართველოს ბედზე ხელს ჩავიქნევდი და ამ საბედისწერო  მომენტში პირად კომფორტს ვამჯობინებდი, ძალიან შეცდა. მე ახლა ვარ ტრაბზონში და ზუსტად ორ საათში ჩემს საყვარელ ბათუმში, თქვენთან ერთად ვიქნები, რათა ერთად მოვიშოროთ თავსმოხვეული რუსული ოცნება, შევწყვიტოთ ეკონომიკის უკუსვლა და სახელმწიფო ინსტიტუტების ნგრევა,” – ამბობს ვარშალომიძე ვიდეოში, რომელიც სოციალურ ქსელში 30 სექტემბერს, ტრაბზონიდან თავად გაავრცელა.

ვარშალომიძე აცხადებს, რომ საპარლამენტო არჩევნებში “ერთიანი ნაციონალური მოძრაობის” მაჟორიტარი დეპუტატობის კანდიდატი იქნება ბათუმში. 

“ეს იყო ჩვენი გუნდის ერთიანი გადაწყვეტილება, რომ დავმდგარიყავი მაჟორიტარად და შევიდეთ პარლამენტში. უმრავლესობის მოპოვების შემთხვევაში იქნება ერთიანი მთავრობა, რომელიც იფიქრებს მხოლოდ და მხოლოდ ხალხზე. დღეს ბრძოლა არის არა თანამდებობისთვის, არამედ ბრძოლა არის საქართველოს გადარჩენისთვის,” – ამბობს ის.

ლევან ვარშალომიძე უკრაინის ეროვნული საინვესტიციო საბჭოს ხელმძღვანელად 2020 წლის 21 მაისს დაინიშნა. 

მას საინვესტიციო საბჭოსთვის 2020 წლის სექტემბრიდან უნდა ეხელმძღვანელა. 

დატოვა თუ არა ვარშალომიძემ თანამდებობა უკრაინაში, ჯერჯერობით, უცნობია.

• რაზე შეთანხმდნენ 8 მარტს ოპოზიცია და ხელისუფლება. რას ნიშნავს მოდელი 120/30?

ამჟამად ის უკვე ბათუმშია და ბათუმის ერთ-ერთ სასტუმროში 2-კვირიან სავალდებულო კარანტინს გადის. 

“ნაციონალური მოძრაობის” ერთ-ერთი ლიდერი და ექსპრეზიდენტ მიხეილ სააკაშვილის უახლოესი მეგობარი, ლევან ვარშალომიძე 2004-2012 წლებში აჭარის ავტონომიური რესპუბლიკის მთავრობის თავმჯდომარე იყო. 

2015 წელს, მაშინ, როდესაც მიხეილ სააკაშვილი ოდესის ოლქის გუბერნატორი იყო, ლევან ვარშალომიძე პრეზიდენტმა პეტრო პოროშენკომ მრჩევლად დანიშნა.

2020 წლის 8 მარტს, ხელისუფლებასა და ოპოზიციას შორის მიღწეული შეთანხმების თანახმად, ოქტომბრის საპარლამენტო არჩევნები 120/30 მოდელით ჩატარდება: ამომრჩეველი 120 დეპუტატს პროპორციული წესით აირჩევს, ხოლო 30-ს – მაჟორიტარულ ოლქებში.