8-9 მარტის აქციების მონაწილე ლაზარე გრიგორიადისი მამის, ბექა გრიგორიადისის დაჭრის ძველ საქმეზე თბილისის საქალაქო სასამართლომ დამნაშავედ ცნო და 1 წლით და 6 თვით თავისუფლების აღკვეთა მიუსაჯა.
“ორი წელი თაროზე შემოდებული საქმე ეხლა გააცოცხლეს, ეს რა საგიჟეთია?”, – ასე ეხმაურება ლაზარე გრიგორიადისის მამა ბექა გრიგორიადისი თბილისის საქალაქო სასამართლოს გადაწყვეტლებას.
პოლიციამ 21 წლის ლაზარე გრიგორიადისი 29 მარტს დააკავა. პროკურატურის მტკიცებით, რუსული კანონის საწინააღმდეგო აქციებზე გრიგორიადისმა შს სამინისტროს განსაკუთრებულ დავალებათა დეპარტამენტის თანამშრომლების მიმართულებით ორჯერ ისროლა ე.წ. მოლოტოვის კოქტეილი. ამასთან, უწყება დაკავებულს ედავება, რომ მან 9 მარტს, ღამის საათებში განზრახ წაუკიდა ცეცხლი შინაგან საქმეთა სამინისტროს კუთვნილ ტოიოტა კოროლას მოდელის ავტომანქანას.
ამ ეტაპზე გრიგორიადისი ერთადერთი ადამიანია, რომელიც 7-9 მარტის პროტესტების გამო დააკავეს.
გრიგორიადისის ადვოკატებმა პრემიერმინისტრ ირაკლი ღარიბაშვილისა და “ქართული ოცნების” თავმჯდომარის, ირაკლი კობახიძის წინააღმდეგ თბილისის საქალაქო სასამართლოს სამოქალაქო საქმეთა კოლეგიას მიმართეს. სარჩელის მოტივი ლაზარე გრიგორიადისის შესახებ პატივისა და ღირსების შემლახველი განცხადებების საჯაროდ გავრცელებაა.
7-9 მარტს თბილისის ცენტრში ათიათასობით მომიტინგე შეიკრიბა. ისინი “უცხოური გავლენის აგენტების შესახებ” პარლამენტის მიერ პირველი მოსმენით მიღებულ კანონს აპროტესტებდნენ. პოლიცია აქციების დასაშლელად სამი დღე ზედიზედ იყენებდა წყლის ჭავლს და ცრემლსადენ გაზს. მომიტინგეების მხრიდან ნასროლი იყო რამდენიმე “მოლოტოვის კოქტეილი”. საბოლოოდ, ხელისუფლება იძულებული გახდა წასულიყო დათმობაზე – აქციის მოთხოვნების შესაბამისად, გაიწვია კანონპროექტი და გაათავისუფლა მიტინგების დროს დაკავებული ყველა მოქალაქე.
მოსამართლის გადაწყვეტილებით, ლაზარე გრიგორიადისს სისხლის სამართლის კოდექსის 11 პრიმა 120-ე მუხლით წარდგენილი ბრალდება, რაც ჯანმრთელობის განზრახ მსუბუქ დაზიანებას გულისხმობს, ოჯახის წევრის მიმართ ჩადენილი ძალადობით გადაუკვალიფიცირდა.
სასამართლომ ლაზარე გრიგორიადისი დამნაშავედ ცნო ბექა გრიგორიადისის მანქანის დაზიანებაშიც და ამისთვის სასჯელის სახით 3 000-ლარიანი ჯარიმა განუსაზღვრა. თუმცა, სასჯელის შთანთქმის პრინციპით გრიგორიადისს ჯარიმის გადახდა არ მოუწევს.
სასამართლოზე ლაზარე გრიგორიადისის მამამ, ბექა გრიგორიადისმა დარბაზიდან განაცხადა, რომ “ძალიან მთვრალი იყო და ბავშვი არაფერ შუაში იყო”. მოსამართლემ ის წესრიგის დარღვევის გამო სხდომათა დარბაზიდან გააძევა.
შემთხვევა, 2021 წელს მოხდა. გამოძიების ვერსიით, ლაზარე გრიგორიადისმა მამას ცივი იარაღით, დანით ბარძაყის არეში დაზიანება მიაყენა და მისი კუთვნილი ავტომანქანის უკანა საქარე მინა ჩაამტვრია.
“ახალგაზრდა იურისტთა ასოციაცია” აცხადებს, რომ 7-9 მარტის საპროტესტო აქციების საქმეზე დაკავებული ლაზარე გრიგორიადისის უფლებები შესაძლოა ირღვეოდეს.
ამ განცხადებას გავლენიანი არასამთავრობო ორგანიზაცია საჯარო ინფორმაციაზე დაყრდნობით ავრცელებს და მოჰყავს კონკრეტული მაგალითები, რა დროსაც ლაზარეს წინააღმდეგ კანონი, შესაძლოა, დაირღვა:
● მიუხედავად მაღალი საჯარო ინტერესისა, სასამართლო სხდომაზე, სადაც ლაზარე გრიგორიადისს აღკვეთის ღონისძიების სახით ორთვიანი პატიმრობა შეუფარდეს, არ იყო განმარტებული პატიმრობის გამოყენების საფუძვლები;
● ადვოკატებმა, რომლებმაც მოინახულეს გრიგორიადისი, 3 აპრილს გაავრცელეს ინფორმაცია, რომ შესაძლოა, საგამოძიებო ორგანოს თანამშრომლებმა აიძულეს გრიგორიადისი მიეწოდებინა მათთვის საკუთარი თავის მამხილებელი ინფორმაცია;
● 3 აპრილს გრიგორიადისის ადვოკატმა ასევე გაავრცელეს ინფორმაცია, რომ ბრალდებულს მისი ნების საწინააღმდეგოდ გადაპარსეს თმა. მართალია, პენიტენციურმა სამსახურმა ეს ინფორმაცია უარყო, თუმცა საია მიიჩნევს, რომ არ არის გამორიცხული, რომ დაკავებულის წინააღმდეგ დაირღვა უფლებები.
