ლავროვის მოადგილე: დასავლეთს საქართველოში მაიდნის სცენარის განმეორება სურს
ლავროვის მოადგილე რუსულ კანონზე
დასავლეთი ცდილობს ოქტომბრამდე განახორციელოს საქართველოში ახალი „მაიდანის“ სცენარი, რათა შეიქმნას დაძაბულობის ახალი წყარო რუსეთის ფედერაციის საზღვრებთან – ამის შესახებ რუსეთის საგარეო საქმეთა მინისტრის მოადგილე მიხეილ გალუზინმა პროპაგანდისტულ TASS-თან ინტერვიუში განაცხადა.
რუსი მაღალჩინოსანი “ქართული ოცნების” ხელისუფლების წარმომადგენლების მსგავსად, იმეორებს, რომ დასავლეთი სუვერენულ სახელმწიფოზე “ზეწოლას” ცდილობს.
“ჩვენ ვხედავთ დასავლელების მცდელობებს საქართველოში ვითარების ესკალაციისკენ ოქტომბერში დაგეგმილი საპარლამენტო არჩევნების კონტექსტში. ჩვენ არ გამოვრიცხავთ, რომ მიზანი არის ხელისუფლების ცვლილების „მაიდანის“ სცენარის განხორციელების მცდელობა რუსეთის საზღვრებთან დაძაბულობის კიდევ ერთი წყაროს შექმნის იმედით“, – თქვა მან.
ასევე, გალუზინმა ყურადღება გაამახვილა რუსული კანონის საწინააღმდეგო აქციებზე, სადაც ლიეტუვის, ესტონეთისა და ისლანდიის საგარეო საქმეთა მინისტრები სიტყვით გამოვიდნენ. საქართველოს პრემიერმინისტრის, ირაკლი კობახიძის მსგავსად, ისიც ამ ყველაფერს “შიდა საქმეებში ჩარევად” აფასებს:
“ეს ყველაფერი არის ნეოკოლონიალური პრაქტიკის საზიზღარი მაგალითები ქვეყნებზე, რომელთა სუვერენიტეტის შეზღუდვას ცდილობენ.“
კრემლის პროპაგანდისტი და ე.წ. რუსული სამყაროს იდეოლოგი, ალექსანდრ დუგინი შალვა პაპუაშვილის მიერ რუსულ კანონზე ხელის მოწერას გამოეხმაურა და აღნიშნა, რომ კანონი, რომელსაც რუსულს ეძახიან, სინამდვილეში ამერიკულია.
“მოიშორა თუ არა საქართველომ უცხოური გავლენა?” – ჰქვია პოსტს, რომელიც დუგინმა Telegram არხზე გამოაქვეყნა.
“ორმაგი სტანდარტები საუკეთესო დემოკრატიული ტრადიციების გათვალისწინებით. ამერიკულის ფონზე, ქართული კანონი საზოგადოებრივ ადგილზე თამბაქოს მოხმარების ჯარიმას მოგაგონებთ. საქართველოში მოქმედებს 25 000 არასამთავრობო ორგანიზაცია. 3 700 000 მოსახლეზე გამოდის, რომ ყოველ 148-ე ადამიანზე ერთი არასამთავრობო ორგანიზაცია მოდის. ანუ თითოეულ ქართულ სახლში ზის უცხოეთის აგენტი და სხვებს ასწავლის დასავლურად ცხოვრებას. ამასთანავე, მიღებული კანონი მათ ამის უფლებას არ უზღუდავს, მხოლოდ რეგისტრაციას და ცოტაოდენი გადასახადების გადახდას ითხოვს.” – წერს დუგინი.
● ანალენა ბერბოკი: წარმოუდგენლად მტკივნეულია – მთავრობა ბლოკავს ქართველების ოცნებას ევროკავშირის წევრობაზე
● ჰელსინკის კომისიამ MEGOBARI აქტის ძირითადი დებულებები გამოაქვეყნა
საქართველოს პარლამენტის თავმჯდომარემ, შალვა პაპუაშვილმა რუსულ კანონს ხელი 3 ივნისს მოაწერა. პაპუაშვილის თქმით, კანონი 4 ივნისიდან შევა ძალაში. მისივე განმარტებით, უცხოური დაფინანსების მქონე ორგანიზაციებს ექნებათ 60 დღის ვადა, რათა დარეგისტრირდნენ შესაბამის ელექტრონულ პორტალზე და დაადეკლარირონ 2023 წლის ფინანსები. კანონი საკანონმდებლო მაცნეს ვებგვერდზე უკვე გამოქვეყნდა.
საქართველოს პრემიერმა, ირაკლი კობახიძემ მთავრობის სხდომაზე განაცხადა, რომ კანონის მიღებით გაიმარჯვა საქართველომ, მისმა სუვერენიტეტმა და უსაფრთხოებამ. ასევე, კობახიძის თქმით, ამ ორი თვის განმავლობაში, კანონის შესახებ გავრცელდა უამრავი დეზინფორმაცია. იყო ჭარბი ემოციები, რასაც ჰქონდა მხოლოდ და მხოლოდ ხელოვნური საფუძველი.
„ქართული ოცნების“ გენერალური მდივანი და თბილისის მერი კახა კალაძე ამბობს, რომ თუ ორგანიზაციები არ დაემორჩილებიან რუსულ კანონს, პასუხისმგებლობის სახით გათვალისწინებული ჯარიმების გადაუხდელობა გამოიწვევს მათ დაყადაღებას და საბოლოოდ, ფუნქციონირების შეწყვეტას.
რა უნდა ვიცოდეთ “აგენტების კანონზე” – მოკლედ
● კანონი “უცხოური გავლენის გამჭვირვალობის შესახებ” მმართველმა პარტიამ, “ქართულმა ოცნებამ” 28 მაისს მესამე მოსმენით მიიღო.
● ხელისუფლებამ კანონი მრავალათასიანი საპროტესტო გამოსვლების და საქართველოს დასავლელი პარტნიორების დაჟინებული მოწოდებისა და ევროსაბჭოს ვენეციის კომისიის მკაცრი დასკვნის მიუხედავად მიიღო.
● კანონის მიღების შემდეგ “ქართული ოცნების” ხელისუფლების მიმართ სანქციებზე საუბრობს აშშ. 23 მაისს სახელმწიფო მდივანმა ენტონი ბლინკენმა გამოაქვეყნა გადაწყვეტილება, სადაც ნათქვამია, რომ„საქართველოში დემოკრატიისთვის ძირის გამოთხრის გამო სავიზო შეზღუდვების პოლიტიკის გამოცხადება და აშშ-საქართველოს თანამშრომლობის ყოვლისმომცველი გადახედვა”. ფინანსური სანქციები იქნება ასევე გათვალისწინებული სენატისა და კონგრესის მიერ შემუშავებულ დოკუმენტებში.
● კანონის ძალაში შესვლის შემდეგ საპასუხო ზომების მიღებას აპირებს ევროკავშირიც. მანამდე ევროპელმა მაღალჩინოსნებმა არაერთხელ აღნიშნეს, რომ კანონი აშორებს საქართველოს ევროკავშირს.
● ხელისუფლების მთავარი არგუმენტია ის, რომ მსგავსი კანონმდებლობა აქვს ამერიკასაც და ასევე რიგ ევროპულ ქვეყნებსაც, მათ შორის, საფრანგეთსაც. “ქართული ოცნების” განმარტებით, ყველა ქვეყანას აქვს უფლება დაიცვას თავი უცხო გავლენისგან და მოსთხოვოს ორგანიზაციებს გამჭვირვალობა.
“ქართული ოცნების” მიერ მიღებული კანონის შედარება ამერიკულთან და ევროპულთან მცდარია და აი რატომ – კონკრეტული არგუმენტები:
ამერიკული კანონი FARA (Foreign Agents Registration Act), რომელზეც “ოცნება” აპელირებს, აშშ-ში მეორე მსოფლიო ომის წინ, 1938 წელს მიიღეს და ამ კანონის მიზანი იყო ამერიკის მოსახლეობა მაშინდელი მტრისგან – მესამე რაიხის ნაცისტური პროპაგანდისგან დაეცვა. არც მაშინ და არც დღეს FARA არ ვრცელდებოდა ამერიკის მოკავშირე, მეგობარ ქვეყნებზე.
იგივე, საფრანგეთში, სადაც “უცხო ქვეყნის გავლენის” კანონი ასევე აქვთ, პირდაპირ არის ჩამოთვლილი ქვეყნები, რომელთა წინააღმდეგ მოქმედებს ეს კანონი და ამ ჩამონათვალში ის ქვეყნებია, რომელთა გავლენის გაძლიერებასაც საფრანგეთი საფრთხედ მიიჩნევს და არა პარტნიორი და მეგობარი ქვეყნები. საფრანგეთის შემთხვევაში ეს ქვეყნებია: რუსეთი, ჩინეთი, თურქეთი და ირანი. ფრანგულ კანონში პირდაპირი დათქმაა ანუ მოქმედებს ჩამკეტი მექანიზმი, რომ ევროკავშირის ქვეყნებზე ეს კანონი არ გავრცელდება. მსგავსი დათქმა არ წერია “ქართული ოცნების” კანონში და შესაბამისად, ეს კანონი პირდაპირ ურტყამს სწორედ საქართველოს მეგობარი და პარტნიორი ქვეყნების – აშშ-ის და ევროკავშირის მიერ დაფინანსებულ ორგანიზაციებს, რომელთა დახმარებითაც ქვეყანაში დემოკრატიული პროცესები ვითარდება.
მეორე ტიპის ჩამკეტი მექანიზმი, რომელიც “უცხო ქვეყნების გავლენების შესახებ” კანონებს ზოგიერთ სხვა ქვეყნებში ახლავს ხოლმე, ეს არის შეზღუდვა საქმიანობის მიხედვით. მაგალითად, იგივე FARA-ში, რომელსაც ედრება “ოცნება”, წერია, რომ კანონი არ ეხება არც მედია ორგანიზაციებს და არც არასამთავრობო ორგანიზაციებს, არამედ მხოლოდ ლობისტურ ორგანიზაციებს. “ქართული ოცნების” ვარიანტში კი არც ამ ტიპის ჩამკეტი მექანიზმია გათვალისწინებული.
გამოდის რომ კანონი, რომელიც “ქართულმა ოცნებამ” მიიღო რუსულის ანალოგია. ამიტომ მას საქართველოში “რუსულ კანონს” ეძახიან. რუსული ვარიანტიც პირველ რიგში სწორედ მედიაორგანიზაციებს და არასამთავრობო სექტორს შეეხო. დღეს რუსეთში დახურულია ყველანაირი არასამთავრობო და მედია ორგანიზაცია, რომელიც არ კონტროლდება კრემლის მიერ.
ასევე მნიშვნელოვანი საკითხია, რომ ეს კანონი ეწინააღმდეგება ევროკავშირის სამართალს. უნგრეთში როდესაც მსგავსი კანონი მიიღეს, ის ადამიანის უფლებათა სასამართლომ გააუქმა. ეს კანონი უნგრეთში პირდაპირ იყო მიმართული მედიის გასაჩუმებლად, ასევე არასამთავრობო ორგანიზაციების შეურაცხყოფისთვის, ღირსების შესალახად.
მსგავსი შეზღუდვის დაწესება მეგობარი, პარტნიორი ქვეყნების მიმართ აჩენს ეჭვს, რომ ქვეყანა საგარეო ვექტორს იცვლის, რაზეც დღეს საქართველოში დამოუკიდებელი ექსპერტები, პოლიტიკოსები და სამოქალაქო საზოგადოების წარმომადგენლები საუბრობენ.
მრავალათასიანი მიტინგების მთავარი ლოზუნგიც სწორედ ეს არის – “კი ევროპას, არა – რუსეთს!”
კანონი, რომელიც “ქართულმა ოცნებამ” მიიღო, ამოქმედდება, სავარაუდოდ, სექტემბრისთვის, მაშინ როდესაც მზად იქნება სპეციალური რეესტრი, სადაც “უცხო ქვეყნის აგენტი” ორგანიზაციები საკუთარი ხელით უნდა დარეგისტრირდნენ.
“აგენტად გამოცხადდება ყველა ორგანიზაცია, რომლის შემოსავლის 20 პროცენტზე მეტი უცხო ქვეყნის გრანტებია. პატარა, ღარიბ ქვეყანაში – საქართველოში – ასეთია არასამთავრობო ორგანიზაციების თითქმის აბსოლუტური უმრავლესობა.
ევროკავშირის და აშშ-ის დახმარებით ქვეყანაში უკვე 33 წელია სასიცოცხლოდ მნიშვნელოვანი პროექტები ხორციელდება ნებისმიერ სფეროში – დაწყებული ჯანდაცვით და ინფრასტრუქტურით, დასრულებული სამოქალაქო საზოგადოების გაძლიერებით.
არასამთავრობო ორგანიზაციების და მედია ორგანიზაციების დიდი ნაწილი უარს ამბობს “უცხოური ძალის ინტერესების გამტარებლად” და “უცხოურ ძალად” რეგისტრირებაზე, რასაც ავალებს მათ კანონი. ორგანიზაციებისთვის და ადამიანებისთვის შეურაცხმყოფელია მსგავსი იარლიყი: “ჩვენ პატიოსნად ვშრომობთ საკუთარ ქვეყანაში, რატომ უნდა გვერქვას “უცხოური ძალის ინტერესების გამტარებელი?”, კითხულობენ ისინი.
ამდენად, ბევრი პატარა ორგანიზაცია უკვე აკეთებს განცხადებებს გარდაუვალ დახურვაზე. მაგალითად, არასამთავრობო ორგანიზაცია, ფეა თრიიზ ფონდმა გაავრცელა განცხადება, რომ რუსული კანონის მიღების გამო, ონში ბავშვთა სტომატოლოგიური კლინიკის გახსნის პროექტს აჩერებენ. ეს კლინიკა არასრულწლოვანებს უფასოდ უნდა მომსახურებოდა.
ან მაგალითად, ასევე განცხადება გაავრცელეს ცხოველთა დამცველებმა – მათ აღნიშნეს, რომ საქართველოში ცხოველთა დამცველი ორგანიზაციების თითქმის ასი პროცენტი უცხოურ გრანტებზე არსებობს და თუკი ამ კანონს მიიღებენ, ამ ორგანიზაციების დიდი ნაწილი დაიხურება.
