სკოლები და მეტრო იხურება: აზერბაიჯანში კვლავ მკაცრი კარანტინი ცხადდება

აზერბაიჯანში კორონავირუსით ინფიცირებულთა რიცხვის მკვეთრი ზრდის გამო, კვლავ მკაცრი კარანტინი გამოაცხადეს. იხურება ბაქოს მეტროპოლიტენი და ყველა სასწავლო დაწესებულება მთელი ქვეყნის მასშტაბით. ხელისუფლება მოსახლეობას აფრთხილებს, რომ უახლოეს მომავალში, შესაძლოა, სხვა შეზღუდვებიც დაწესდეს.

• თბილისში და იმერეთში რესტორნების მუშაობა შეიზღუდება – გახარია 

• რატომ სთხოვს აფხაზეთი დახმარებას რუსეთს პანდემიასთან ბრძოლაში

დღეს აზერბაიჯანის მინისტრთა კაბინეტთან არსებულმა ოპერატიულმა შტაბმა COVID-19-ით ინფიცირების 509 ახალი შემთხვევის შესახებ განაცხადა. გარდაიცვალა ორი ადამიანი, გამოჯანმრთელდა და სახლში გაეწერა 129 პაციენტი. სულ, პანდემიის დაწყებიდან, აზერბაიჯანში კორონავირუსით დაინფიცირდა 43 789 ადამიანი, მათგან 621 – გარდაიცვალა, 39 800 – გამოჯანმრთელდა.

სანიტარიულ-ეპიდემიოლოგიური სიტუაციიდან, კორონავირუსის მკურნალობის აქტიურ ფაზაში მყოფი ადამიანების რაოდენობიდან და ვირუსის გავრცელების სისწრაფიდან გამომდინარე, წესდება შემდეგი შეზღუდვები:

• 19 ოქტომბრის 00:00 საათიდან 2 ნოემბრის 06:00 საათამდე, ჩერდება ბაქოს მეტროპოლიტენით მგზავრთა გადაყვანა;

• 19 ოქტომბრიდან 2 ნოემბრის ჩათვლით, მთელი ქვეყნის მასშტაბით, ყველა სასწავლო დაწესებულებაში არდადეგები ცხადდება.

აზერბაიჯანის მინისტრთა კაბინეტის ინსტრუქციის თანახმად, 30%-მდე მცირდება სახელმწიფო სტრუქტურების თანამშრომელთა რაოდენობა, დანარჩენები დისტანციური მუშაობის რეჟიმზე გადადიან. ეს წესი ასევე რეკომენდებულია კერძო სექტორისა და სხვა სფეროებში მოქმედი დაწესებულებებისა და ორგანიზაციებისთვის.

65 წელზე უფროსი ასაკის ადამიანებს, რეკომენდაცია ეძლევათ, არ გავიდნენ ქუჩაში გადაუდებელი საჭიროების გარეშე.

მოსახლეობა სხვა აკრძალვების შესაძლო შემოღების შესახებაც გააფრთხილეს იმ შემთხვევაში, თუკი კორონავირუსით ინფიცირებულთა რიცხვის ზრდა მომავალშიც გაგრძელდება.

კარანტინი მთელ ქვეყანაში 2020 წლის 2 ნოემბრამდე იმოქმედებს. ტრადიციულად, ახალი გადაწყვეტილებები კარანტინის გაგრძელებასთან დაკავშირებით, კალენდარული თვის ბოლოს მიიღება.