რატომ სთხოვს აფხაზეთი დახმარებას რუსეთს პანდემიასთან ბრძოლაში

აფხაზეთის თავდაცვის მინისტრმა ვლადიმირ ანუამ თავის რუს კოლეგას, სერგეი შოუგუს აფხაზეთში, 500 კაცზე გათვლილი საველე ჰოსპიტალის გახსნა სთხოვა, სადაც კორონავირუსით დაავადებულებს უმკურნალებენ. ეს მას შემდეგ მოხდა, რაც ოპოზიციამ ხელისუფლება პანდემიის წინააღმდეგ ბრძოლაში გადადგმული არასაკმარისი ნაბიჯების გამო გააკრიტიკა.

თავდაცვის მინისტრის თხოვნა აიხსნება აფხაზეთში ეპიდემიოლოგიური ვითარების მკვეთრი გაუარესებით და COVID-19-ით ინფიცირებულთა რიცხვის საგრძნობი ზრდით.

გასული დღე-ღამის განმავლობაში, აფხაზეთში, COVID-19-ის დიაგნოზი 86 ადამიანს დაუდასტურდა. სულ, ამ მომენტისთვის დაინფიცირდა 1 466 ადამიანი, მათგან, ერთადერთ კოვიდჰოსპიტალში, 173 პაციენტი იმყოფება. მძიმე მდგომარეობაშია 28 ადამიანი, საშუალო სიმძიმისად ფასდება – 34. გარდაიცვალა – 23.

• „აფხაზეთის სახალხო მოძრაობა“ – აფხაზეთის ახალი ოპოზიცია 

• აფხაზეთი: რატომ არ სურთ ექიმებს კორონავირუსით ინფიცირებულთა მკურნალობა 

• აფხაზეთში პანდემიის დროს ნარკოტიკებთან ბრძოლის თავისებურებები

ოპოზიციის მოთხოვნა 

ეს, შეიძლება, დამთხვევაა, მაგრამ თავდაცვის მინისტრის ოფიციალურ მიმართვამდე, რამდენიმე საათით ადრე, ომის ვეტერანთა ოპოზიციურმა ორგანიზაცია „არუაამ“ მკაცრად გააკრიტიკა აფხაზეთის ხელისუფლება პანდემიასთან ბრძოლისას გამოვლენილი პასიურობის გამო.

სექტემბრის შუაში, „არუაამ“ უკვე მიმართა პრეზიდენტ ასლან ბჟანიას და ურჩია, მოსკოვისთვის მობილური სამხედრო ჰოსპიტალის გახსნა ეთხოვა.

თუმცა, ამ წინადადებას პრეზიდენტის მხრიდან რეაგირება არ მოჰყოლია, რის შემდეგაც, „არუაამ“ კვლავ შეახსენა მას თავი:

„მიგვაჩნია, რომ ასეთი უკიდურესად რთულ ვითარებაში, დანაშაულებრივი გულგრილობაა პრეზიდენტისა და პრემიერ-მინისტრის მხრიდან ჩვენი წინადადებების იგნორირება. თუკი ამ კვირაში, ჩვენი ქვეყნის ხელისუფლება ოფიციალურად არ მიმართავს რუსეთის პრეზიდენტს, ვლადიმირ პუტინს საველე ჰოსპიტალის გახსნის თხოვნით, ჩვენ ხელმოწერების შეგროვებას დავიწყებთ და რუსეთის პრეზიდენტს აფხაზი ხალხის სახელით მივმართავთ, აფხაზეთის პრეზიდენტსა და პრემიერს კი დამნაშავედ ჩავთვლით, როგორც მინიმუმ, COVID-19-ით გარდაცვალების ყოველ მეორე შემთხვევაში“, – ნათქვამია „არუაას“ განცხადებაში.

ახალი შეზღუდვები 

და აი, ახლა, აფხაზეთი ოფიციალურად სთხოვს რუსეთს საველე ჰოსპიტალის გახსნას. ამის პარალელურად, პრეზიდენტმა ასლან ბჟანიამ, კორონავირუსით ინფიცირებულთა რიცხვის ზრდის გამო, დამატებითი შეზღუდვები დააწესა. 

კერძოდ, ქვეყანაში, კვლავ იხურება ყველა საგანმანათლებლო დაწესებულება, ასევე, ბავშვთა სპორტული და კულტურული სექციები.

აიკრძალა კულტურული დაწესებულებების საქმიანობაც – თეატრების, საგამოფენო დარბაზების, ბიბლიოთეკების, მუზეუმების. სახელმწიფო ორგანოებს დაევალათ, სამსახურიდან გაათავისუფლონ და ხელფასი შეუნარჩუნონ 60 წელზე უფროსი ასაკის ყველა თანამშრომელს, იგივე რეკომენდაცია მიეცათ კომერციულ ორგანიზაციებსაც. 

გაჩერდა სპა და მასაჟის სალონების, ასევე, საუნების მუშაობა.

ახალი ზომები 15 ოქტომბრიდან 25 ნოემბრის ჩათვლით იმოქმედებს.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო