კომენტარი: აფხაზეთი რუსეთთან საკავშირო ხელშეკრულებაში შევა და რუსები აფხაზეთში მიწას იყიდიან?
აფხაზეთი რუსეთთან საკავშირო სახელმწიფოში
აფხაზეთში მწვავე დისკუსია მიმდინარეობს: თავდაპირველად, ასლან ბჟანიამ განაცხადა, რომ აფხაზეთს სურს შეუერთდეს საკავშირო შეთანხმებას რუსეთთან. სახელმწიფო სათათბიროს დეპუტატმა კონსტანტინე ზატულინმა კი თქვა: „უფრო მარტივი იქნება შეთანხმება რუსების მიერ აფხაზეთში მიწის ყიდვის შესაძლებლობაზე“.
პირველ საკითხთან დაკავშირებით, აფხაზურ საზოგადოებაში აზრები იყოფა, მაგრამ მეორე კითხვას რაც შეეხება – უცხოელების მიერ აფხაზეთში მიწისა და უძრავი ქონების შეძენის შესაძლებლობას – წლების განმავლობაში ჯიუტად ეწინააღმდეგებოდა საზოგადოების აბსოლუტური უმრავლესობა.
- ლუკაშენკო აფხაზეთის აღიარებისთვის ემზადება? მისი წარმომადგენლის ვიზიტი სოხუმში
- რა ტერიტორიების და ობიექტების მიღება სურს რუსეთს აფხაზეთისგან. კომენტარი
საკავშირო სახელმწიფოს შესახებ
„ის [რუსეთი] ახლოს არის აფხაზ ხალხთან, ეს ეროვნულ ინტერესებში შედის. მას შემდეგ, რაც რუსეთის ფედერაცია – დარწმუნებული ვარ, წარმატებით დაასრულებს სპეციალურ სამხედრო ოპერაციას -უკრაინის ტერიტორიაზე – იქნება სხვა რეალობა, შეიქმნება ახალი საკავშირო სახელმწიფოს მონახაზი. ჩვენ ამის იმედი გვაქვს და მზად ვართ ამაში მონაწილეობა მივიღოთ“, – განაცხადა აფხაზეთის პრეზიდენტმა ასლან ბჟანიამ 25 აგვისტოს Soloviev LIVE გადაცემაში.
სახელმწიფო სათათბიროს დეპუტატმა კონსტანტინე ზატულინმა განაცხადა, რომ აფხაზეთის შესვლა საკავშირო სახელმწიფოში შექმნის “ახალ პირობებს რიგი აქტუალური საკითხებისთვის”, მათ შორის რუსეთის ფედერაციისა და ბელორუსის მაგალითზე აფხაზეთ-რუსეთის საზღვარზე დაშვების რეჟიმის გამარტივებას.
ეს არის ის, რასაც აფხაზეთში ბევრი მიესალმა – მდინარე ფსოუს საგუშაგოზე მრავალი საათის განმავლობაში მუდმივი რიგების გათვალისწინებით.
- სტალინის სიყვარული ოსურად. მორიგი კამათი ბელადის გარშემო
- “პროპაგანდა და დეზინფორმაცია”- სახელმწიფო მდივანმა ბლინკენმა აფხაზების პროვოცირება მოახდინა?
აფხაზეთში რუსებისთვის მიწის მიყიდვის შესახებ
თუმცა, ზატულინმა აფხაზეთის საკავშირო სახელმწიფოში შესვლის კიდევ ერთ შედეგად, აფხაზეთში მიწის ყიდვის შესაძლებლობა დაასახელა.
მან ასევე გააკრიტიკა ამ იდეის მოწინააღმდეგე აფხაზები:
„აფხაზეთის ოპოზიცია ცდილობს ეჭვების გაჩენას: ამბობენ, თუ ეს დღეს დაიშვება, ხვალ აფხაზები შეწყვეტენ ქვეყნის მართვას. მაგრამ ცხადია, რომ აფხაზეთს მიწას არავინ წაართმევს. და ასეთი შიში რეალურად აფერხებს აფხაზეთის განვითარებას“
აფხაზეთის კანონმდებლობით მიწა საერთოდ არ იყიდება. აფხაზური კანონები ასევე კრძალავს უძრავი ქონების მიყიდვას უცხოელებზე, მათ შორის რუსებზე.
მაგრამ 2008 წლის აგვისტოდან, როცა რუსეთმა აფხაზეთის დამოუკიდებლობა აღიარა, მოსკოვი რეგულარულად აყენებს ამ ტაბუს მოხსნის საკითხს.
კომენტარი
აფხაზი პოლიტიკოსი ადგურ ლაგვილავა:
„რუსეთში არსებობს კანონი, რომლის მიხედვითაც უცხოელებს არ შეუძლიათ რუსეთის ფედერაციის ბევრ სუბიექტში მიწის ყიდვა. ესენია, მაგალითად, ყირიმი, კალინინგრადი და სხვა.
ზატულინის თქმით, აფხაზებს მიწას არავინ წაართმევს. და რა, ბირთვულ ძალას და გაეროს უშიშროების საბჭოს წევრს არ შეუძლია მიწა წაართვას?
რუსეთს თავის ინტერესები აქვს, ჩვენ კი არა? ისევ იდიოტებად მივაჩნივართ და ორმაგად უსიამოვნოა ამის მოსმენა იმ ადამიანისგან, რომელიც თავს აფხაზეთის მეგობრად თვლის.“
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
