"ხალხის ძალა": გამოდის, ენმ-ს რეჟიმის მართვის მოდელი შვეიცარიაშიც დაუმკვიდრებიათ
ენმ-ს რეჟიმის მართვის მოდელი შვეიცარიაშიც დაუმკვიდრებიათ
“ქართული ოცნებიდან” წასული დეპუტატები, რომლებმაც ახალი მოძრაობა “ხალხის ხმა” შექმნეს, მორიგ წერილს აქვეყნებენ, სადაც ვკითხულობთ, რომ “თუ ის ყველაფერი მართალია, რაზეც ბიძინა ივანიშვილის ადვოკატი და ექსპერტები საუბრობენ, გამოდის, ენმ-ს რეჟიმის მართვის მოდელი შვეიცარიაშიც დაუმკვიდრებიათ.”
“რეკეტი, არასამართლიანი სასამართლო და არათავისუფალი მედია, რაც საელჩოს ფავორიტი ხელისუფლების, სააკაშვილის რეჟიმის ხელწერა იყო”, – აცხადებენ დეპუტატები.
საქართველოს ყველაზე მდიდარი ადამიანი ბიძინა ივანიშვილი შვეიცარიულ ბანკ Credit Suisse-ს უკვე მეორედ უჩივის და ამჯერად პოლიტიკურ ზეწოლაშიც ადანაშაულებს.
ამ ფაქტის გამო, ივანიშვილის მხარდამჭერი განცხადებებით გამოვიდნენ მმართველი პარტიის გულშემატკივრები. შვეიცარიული ბანკის უკან ისინი ამერიკის შეერთებული შტატების ინტერესებს ხედავენ და ამბობენ, რომ მათ ივანიშვილის პოლიტიკაში შემობრუნება და ომში ჩათრევა უნდათ.
ოპოზიციაში აცხადებენ, რომ შვეიცარიული ბანკის გარშემო ატეხილმა სკანდალმა და “ქართული ოცნების” ხელმძღვანელობის მიერ გაკეთებულმა განცხადებებმა “ქართული ოცნების” ანტიამერიკული განწყობები კიდევ ერთხელ დადასტურდა.
ბიძინა ივანიშვილმა ვრცელი წერილიც გამოაქვეყნა, პირდაპირ მიანიშნებს, რომ შვეიცარიულმა ბანკმა მას პრობლემები იმის გამო შეუქმნა, რომ საქართველო არ ჩაერთო ომში. აქვე ივანიშვილი მიანიშნებს, რომ შვეიცარიული ბანკის მიერ გაჩერებული თანხების დახარჯვას საზოგადოების საჭიროებისთვის გეგმავდა.
ასევე, დეპუტატები ამტკიცებენ, რომ აშშ-ის საელჩოს “ისტერიული სურვილია”, მმართველი პარტია “ყოვლად დეგრადირებული “ნაციონალური მოძრაობით” ჩაანაცვლოს.
სოზარ სუბარის, დიმიტრი ხუნდაძის, მიხეილ ყაველაშვილის და გურამ მაჭარაშვილის განცხადებით, “ორგანიზაცია “სამართლიანი არჩევნების” გამოქომაგებით, ამერიკის საელჩო “ქართულ ოცნებას” პირდაპირ ეუბნება, რომ რევოლუცია უნდა მოხდეს, “ნაციონალური მოძრაობა” მეორე ფრონტის გასახსნელად ხელისუფლებაში უნდა დაბრუნდეს, ხოლო “ქართული ოცნება” და საზოგადოება ამას მშვიდად უნდა შეეგუონ”.
“საზოგადოებას ახსოვს, რომ ჩვენ ამერიკის ელჩს მოვუწოდეთ, გამიჯვნოდა რადიკალური ოპოზიციისა და შესაბამისი ენჯეოების რადიკალურ პოლიტიკურ მოთხოვნას მთავრობის გადადგომისა და ე.წ. ტექნიკური მთავრობის ფორმირების შესახებ, რაც მან არ გააკეთა. მიზეზი მარტივია – ამ მოთხოვნის ავტორი რეალურად საელჩოა, რომელიც მის დაყენებას, ცხადია, მომავალშიც გეგმავს.” – განმარტავენ დეპუტატები.
“ხალხის ხმა” სვამს კითხვას: რას შეიძლება უკავშირდებოდეს საელჩოს ისტერიული მცდელობა, ქვეყანაში არიოს სიტუაცია და ხელოვნურად მისცეს ბიძგი რევოლუციურ პროცესებს? და შემდეგ თავადვე პასუხობს: ამას მხოლოდ ერთი მიზეზი შეიძლება ჰქონდეს – საქართველომ არ შეასრულა მეორე ფრონტის გახსნის მისია, რომელიც მას სრულიად უსამართლოდ გამოუწერეს და რომელიც დღესაც აქტუალურია.
მათივე თქმით, საელჩომ კარგად იცის, რომ ქვეყნის განადგურებას მოქმედი ხელისუფლება არასოდეს მოაწერს ხელს, “ნაციონალური მოძრაობა” კი ნებისმიერი დავალების შესრულებაზეა წამსვლელი.
დეპუტატები NDI-ის საქართველოს ოფისის ყოფილი ხელმძღვანელის, ლორა თორნტონის ინტერვიუსაც გამოეხმაურნენ, სადაც თორნტონი აღნიშნავს, რომ საქართველოს მთავრობა ყოველთვის ამბობდა, რომ ისინი ევროპული და ევროატლანტიკური ინტეგრაციის მომხრეები არიან, თუმცა, NDI-ის ყოფილ ხელმძღვანელს კითხვები აქვს – “რატომ აყენებენ ჩრდილს ამას? რატომ აკრიტიკებენ დასავლელ მეგობრებს და მოკავშირეებს? რატომ არ არიან გაბედულები, როდესაც რუსეთის აგრესიასთან დაკავშირებულ კითხვებზე უწევთ პასუხის გაცემა”.
სოზარ სუბარის, დიმიტრი ხუნდაძის, მიხეილ ყაველაშვილის და გურამ მაჭარაშვილის თქმით, “ქალბატონ ლორას უნდა ესმოდეს, რომ ჩვენ დასავლეთი მოგვწონს ფასეულობების გამო, რომლებიც, მათ შორის, სამართლიანობასა და გამოხატვის თავისუფლებასაც მოიცავს:
“როდესაც შენს ქვეყანას უსამართლოდ ექცევიან და შენ ამაზე ხმის ამოღების უფლებაც არა გაქვს, ამას არაფერი აქვს საერთო დასავლურ ფასეულობებთან. ჩვენთვის დოგმა არის არა დასავლეთი, არამედ ის ღირებულებები, რომლებსაც დასავლური სამყარო ტრადიციულად განასახიერებდა”, – აღნიშნულია წერილში.
“ქართული ოცნების” სამმა დეპუტატმა, სოზარ სუბარმა, მიხეილ ყაველაშვილმა და დიმიტრი ხუნდაძემ პარტია და საპარლამენტო თანამდებობები 28 ივნისს დატოვეს და მოგვიანებით მოძროაობა “ხალხის ძალა” დააფუძნეს.
“ქართული ოცნების” თავმჯდომარის, მამუკა მდინარაძის თქმით, ზემოხსენებულ დეპუტატებს მიაჩნიათ, რომ ე.წ. კულისებიდან პოლიტიკური ფაქტებისა და მოვლენების შესახებ მეტი ინფორმაცია უნდა ვრცელდებოდეს და ამის გახმოვანებისთვის მათ თავისუფალი საპარლამენტო მანდატი სჭირდებათ, რადგან გუნდის შიგნით შესაძლოა, უხერხულობები შეექმნათ.
“ქართული ოცნებიდან” წასულმა დეპუტატებმა პირველი განცხადებაც მალევე გამოაქვეყნეს, რომელსაც ხელისუფლების ოპონენტებმა უკვე უწოდეს ანტიდასავლური შეთქმულების თეორია. ყოფილი დეპუტატების თქმით, საქართველოს კანდიდატის სტატუსს არც 6 თვის თავზე არავინ მიანიჭებს, “თუ მანამდე ომში არ ჩაერთო ან რუსეთს სანქციები არ დაუწესა.”
ამის შემდეგ დეპუტატმა მიხეილ ყაველაშვილმა, საქართველოში აშშ-ს ელჩს ღია წერილითაც მიმართა და მოუწოდა, ამერიკის იმიჯის დასაცავად “ნაციონალური მოძრაობის”პროვოკაციებსა და ტექნიკური მთავრობის მოთხოვნებს საჯაროდ გაემიჯნოს, რაზეც ელჩმა მმართველ პარტიას მიმართა კითხვით: რა მოტივი გაქვთ?
22 ივლისს კი სამმა დეპუტატმა აშშ-ს სახელმწიფო დეპარტამენტის სპიკერს, ნედ პრაისს მიმართა. მათი თქმით, მათ არ უნდათ რომ “ქვეყნები” უხეშად ერეოდნენ “შიდა საქმეებში.” დეპუტატების ეს განცხადება მოჰყვა აშშ-ის სახელმწიფო დეპარტამენტის სპიკერის, ნედ პრაისის მიერ გამოხატულ მხარდაჭერას საქართველოში აშშ-ის ელჩის, კელი დეგნანის მიმართ.
