"კანონპროექტი ძირს უთხრის დემოკრატიას" - სამოქალაქო პლატფორმა მშვიდობისთვის "რუსულ კანონზე"
სამოქალაქო პლატფორმა მშვიდობისთვის რუსულ კანონზე
სამოქალაქო პლატფორმა მშვიდობისთვის, რომელიც მშვიდობის მშენებლობის საკითხზე მომუშავე 60-ზე მეტ საზოგადოებრივ ორგანიზაციასა და დამოუკიდებელ ექსპერტს აერთიანებს, გმობს ე.წ. „რუსული კანონის“ ხელახლა ინიციირებას.
“მიგვაჩნია, რომ აღნიშნული კანონპროექტი ძირს უთხრის ხალხის მიერ არჩეული ევროპული ინტეგრაციის პროცესსა და დემოკრატიას. ასევე, კანონის მიღება მნიშვნელოვან საფრთხეს შეუქმნის სამოქალაქო მშვიდობას, გამოიწვევს საზოგადოების გახლეჩას და შეზღუდავს ქვეყანაში სიტყვის თავისუფლებას“, – ვკითხულობთ პლატფორმის განცხადებაში.
- “ეს კანონი არ არის კარგი, ეს არ არის ევროპული, არ არის ამერიკული” – ევროკავშირის ელჩი
- “რუსული კანონის მიღების შემთხვევაში, საქართველო ევროკავშირის წევრი ვერ გახდება” – კომენტარი
- აშშ-ის ელჩი: როცა მეგობარი შეშფოთებულია და ოკუპანტი გიწონებს, უნდა დაისვას კითხვა – კარგია თუ არა
პლატფორმის წევრების განცხადებით, ეს კანონპროექტი მნიშვნელოვან ზიანს მიაყენებს მშვიდობის მშენებლობის პროცესს.
პლატფორმის წევრები განცხადებში აღნიშნავენ, რომ სამოქალაქო პლატფორმას მშვიდობისთვის, მის წევრ ორგანიზაციებს და ექსპერტებს მნიშვნელოვანი წვლილი შეაქვთ კონფლიქტებით გაყოფილ საზოგადოებებს შორის შერიგებასა და ნდობის აღდგენაში. ასევე გამყოფ ხაზთან მცხოვრები კონფლიქტით დაზარალებული და დევნილი მოსახლეობის სოციალურ-ეკონომიკური დახმარების საქმეში, რაც არა უცხო ძალის, არამედ უპირველეს ყოვლისა ქართველი ხალხისა და სამშვიდობო პოლიტიკის ინტერესებს ემსახურება:
“ყველა მოქმედება, რომელსაც სამოქალაქო საზოგადოების ორგანიზაციები ღიად და გამჭვირვალედ, ხშირად ხელისუფლების წარმომადგენლებთან აქტიური თანამშრომლობით ახორციელებენ, სწორედ საერთაშორისო პარტნიორების, განსაკუთრებით, ევროკავშირის მტკიცე მხარდაჭერით არის შესაძლებელი“, – აცხადებენ ისინი.
აიქვე აღნიშნულია, რომ თავად ხელისუფლების მიერ სამშვიდობო ინიციატივის „ნაბიჯი უკეთესი მომავლისკენ“ ფარგლებში დაარსებული მშვიდობის ფონდი, რომელიც გამოყოფს გრანტებს გამყოფი ხაზის გასწვრივ ეკონომიკური პროექტების მხარდასაჭერად, ასევე საერთაშორისო პარტნიორების მიერ ფინანსდება:
“ნდობის აღდგენისთვის აუცილებელია ხალხთაშორისი კონტაქტების შენარჩუნება და შემდგომი განვითარება, რაც სახალხო დიპლომატიის გამოყენებითაა შესაძლებელი. ამ კონტექსტში, კანონპროექტის მიღება მნიშვნელოვან საფრთხეს შეუქმნის აფხაზურ და ოსურ საზოგადოებებთან არსებულ საკომუნიკაციო არხებს, რაც განსაკუთრებით საგანგაშოა ალტერნატიული მდგრადი დიალოგის ფორმატების არარსებობის ფონზე“.
● 3 აპრილს ცნობილი გახდა, რომ არასამთავრობო ორგანიზაციების “ფინანსების გამჭვირვალობაზე” მმართველი პარტია რუსულ კანონს ხელახლა აინიცირებს.
● ხელისუფლების მთავარი არგუმენტი მდგომარეობს იმაში, რომ საქართველოში მოქმედი არასამთავრობო ორგანიზაციების გამჭვირვალობა კითხვის ნიშნის ქვეშ დგას, რაც საფრთხეს უქმნის ქვეყნის უსაფრთხოებას. თუმცა, ამ არგულენტის არც დამოუკიდებელ ექსპერტებს, არც ოპოზიციას და არც სამოქალაქო საზოგადოებას არ სჯერა. ექსპერტები აღნიშნავენ, რომ ამგვარად “ქართული ოცნება” ხელისუფლებაში ყოფნის გახანგრძლივებას ცდილობს და ნიადაგს იმზადებს 2024 წლის ოქტომბრის საპარლამენტო არჩევნებისთვის, რათა ალტერნატიული აზრი ქვეყანაში ჩაახშოს.
● ერთხელ ე.წ. უცხოელი აგენტების შესახებ კანონი საქართველოს მმართველმა პარტიამ უკვე დააინიცირა ზუსტად ერთი წლის წინ – გასული წლის მარტში. მაშინ კანონი პირველი მოსმენით პარლამენტში მიიღეს კიდეც, თუმცა “ოცნება” იძულებული გახდა კანონი გაეწვია, რადგან თბილისი მრავალათასიანმა პროტესტმა მოიცვა. ათასობით ადამიანი რამდენიმე დღის განმავლობაში აპროტესტებდა აღნიშნული კანონის მიღებას, რომელსაც საქართველოში “რუსული კანონი” უწოდეს, რადგან იგი რუსეთში მიღებული კანონის ანალოგია.
პლატფორმის წევრი ორგანიზაციებისა და ექსპერტების დიდი ნაწილი სამშვიდობო პროცესში აქტიურად თანამშრომლობს საქართველოს პარლამენტთან და სხვა შესაბამის სახელმწიფო უწყებებთან.
ეს ორგანიზაციები არიან შერიგებისა და სამოქალაქო თანასწორობის საკითხებში სახელმწიფო მინისტრის აპარატთან შექმნილი „ექსპერტთა საკონსულტაციო საბჭოსა“ და „ქალთა საკონსულტაციო პლატფორმის“ წევრები. ასევე, თანამშრომლობენ საგარეო საქმეთა სამინისტროსთან, მონაწილეობენ ჟენევის დისკუსიებში, ასევე პარლამენტის ტერიტორიული მთლიანობის აღდგენისა და დეოკუპაციის საკითხებთან დაკავშირებული დროებითი კომისიის სხდომებში.
პარლამენტში ინიციირებული კანონპროექტის დამტკიცების შემთხვევაში კი, როგორც პლატფორმის წევრები აცხადებენ, ამ ფორმატებში პლატფორმის წევრების მონაწილეობა გართულდება:
“რაც, ჩვენი ღრმა რწმენით, მნიშვნელოვნად დააზარალებს კონფლიქტის მშვიდობიანი მოგვარების პროცესს და უარყოფითად აისახება კონფლიქტით დაზარალებული მოსახლეობის მდგომარეობაზე”, – ნათქვამია განცხადებაში.
ყველა ამ დეტალის განთვალისწინებით, სამოქალაქო პლატფორმა მშვიდობისთვის, ითხოვს ინიციირებული კანონპროექტის გაწვევას, ევროინტეგრაციის გზაზე დაკისრებული ვალდებულებების პირნათლად შესრულებას და დეკლარირებული სამშვიდობო პოლიტიკის განხორციელებას.
სამოქალაქო პლატფორმა მშვიდობისთვის რუსულ კანონზე
