კანონიერი ქურდები საქართველოს პრეზიდენტს სასამართლოში უჩივიან
“კანონიერი ქურდები” – დავით გერლიანი („სვანი“) და ილია სამსონია (“ილო ოზურგეთსკი”) საქართველოს პრეზიდენტს, სალომე ზურაბიშვილს სასამართლოში უჩივიან. ისინი პრეზიდენტს საქართველოს მოქალაქეობის ჩამორთმევის გამო ედავებიან.
სასარჩელო განცხადებაში “კრიმინალური ავტორიტეტები” წერენ, რომ საქართველოს პრეზიდენტმა ისინი პირადობის დამადასტურებელი საბუთის გარეშე დატოვა.
“კანონიერი ქურდების” ადვოკატის, თამარ აბესაძის განცხადებით, საქართველოს პრეზიდენტმა გერლიანს და სამსონიას საქართველოს მოქალაქეობა 2020 წლის იანვარში, გადაუმოწმებელი საბუთების საფუძველზე ჩამოართვა.
აბესაძის განმარტებით, საქართველოდან წასული რამდენიმე “კანონიერი ქურდი” საზღვარგარეთ ყალბი პასპორტით დააკავეს. მას შემდეგ, რაც ყალბი პასპორტებით მათი დაკავების შესახებ საქართველოს აცნობეს, პრეზიდენტმა მათ მოქალაქეობა ჩამოართვა.
„პრეზიდენტის ბრძანებით ამ ადამიანებს სრულიად უსაფუძვლოდ ჩამოართვეს საქართველოს მოქალაქეობა. არ გადამოწმებულა, რეალურად ჰქონდათ თუ არა რომელიმე სხვა ქვეყნის მოქალაქეობა. აბსოლუტურად მიუღებელია ადამიანის მოქალაქეობის გარეშე დატოვება. ეს მოკლებულია ყოველგვარ სამართლებრივ საფუძველს. დღეს ისინი არცერთი ქვეყნის მოქალაქეებად არ ითვლებიან,“ – ამბობს ადვოკატი.
ის “კანონიერი ქურდების” – ილია სამსონიას და დავით გერლიანის ინტერესებს იცავს.
ადვოკატის თქმით, “კრიმინალური ავტორიტეტებისთვის” საქართველოს მოქალაქეობის ჩამორთმევის ერთადერთი მიზანი არის ის, რომ საზღვარგარეთ დაკავების შემთხვევაში საქართველოში მათი დეპორტაცია აღარ მოხდეს.
“მოპასუხე მხარე საქართველოს პრეზიდენტია და მან უნდა დაამტკიცოს, რომ არ დაურღვევია საქართველოს კონსტიტუცია. იმისთვის, რომ საქართველოში აღარ შემოუშვან, ყალბი პასპორტის გამო მოქალაქეობა ჩამოართვეს. რამე რომ დაემართოთ, ვერ ჩამოასვენებენ, იმიტომ, რომ ადამიანი აღარ არსებობს – პიროვნების დამადასტურებელი საბუთი აღარ აქვთ,” – ამბობს ადვოკატი თამარ აბესაძე.
ვინ არიან კანონიერი ქურდები, რომლებიც პრეზიდენტს უჩივიან
ილია სამსონია ( ილო ოზურგეთსკი)
ილია სამსონია 46 წლის არის. ის თბილისის საერთაშორისო აეროპორტში 2018 წლის მარტში დააკავეს. სამსონიას ბრალი “კანონიერი ქურდობისთვის” წაუყენეს. თუმცა, სასამართლომ ის უდანაშაულოდ ცნო და დარბაზიდან გაათავისუფლეს.
ის საქართველოში შემოსვლას ყირგიზეთიდან ცდილობდა, სადაც 2012 წლიდან დოკუმენტაციის გაყალბების გამო იხდიდა სასჯელს.
კრიმინალურ წრეებში მას „ილო ოზურგეთსკის“ სახელით იცნობენ.
დავით გერლიანი (სვანი)
დავით გერლიანი 48 წლისაა. მას სხვადასხვა ქვეყნის საპატიმრო დაწესებულებებში 20 წელი აქვს გატარებული.
2016 წლის ივნისში უკრაინის უშიშროების სამსახურმა ის ოდესაში დააპატიმრა და საქართველოში გამოაძევა. გერლიანმა უკრაინული პასპორტითა და ჩაჩიბაიას გვარით უპრობლემოდ გაიარა თბილისის აეროპორტის სასაზღვრო-გამშვები პუნქტი. შინაგან საქმეთა სამინისტრომ ის 2016 წლის 22 ივნისს, საქართველო-სომხეთის საზღვართან დააკავა, საიდანაც გერლიანი ქვეყნის დატოვებას გეგმავდა.
ეს ფაქტი მაშინ ხელისუფლებასა და ოპოზიციას შორის დაპირისპირების საგანი გახდა. ოპოზიცია ამტკიცებდა, რომ ქვეყანაში „ქართული ოცნების“ ინტერესების სასარგებლოდ წინასაარჩევნოდ „კანონიერი ქურდების“ უპრეცედენტო კონცენტრაცია ხდებოდა.
მაშინდელი შს მინისტრი გიორგი მღებრიშვილი კი ამტკიცებდა, რომ უკრაინულმა მხარემ კანონიერი ქურდის დეპორტაციის შესახებ საქართველოს ინფორმაცია არ მიაწოდა და დავით გერლიანთან დაკავშირებული პროცესები „ოდესელების პროვოკაციად“ შეაფასა – იმ პერიოდში ექსპრეზიდენტი მიხეილ სააკაშვილი ოდესის ოლქის გუბერნატორი იყო.
გერლიანი 2016 წლის 8 დეკემბერს, თბილისის საქალაქო სასამართლომ „კანონიერი ქურდობის“ ბრალდების ნაწილში გაამართლა, ხოლო საზღვრის უკანონო კვეთის მცდელობაში დამნაშავედ ცნო და 6 500 ლარის ოდენობის ჯარიმა დააკისრა.
ამ გადაწყვეტილების მიღების შემდეგ დავით გერლიანი სასამართლო დარბაზიდან გაათავისუფლეს.
მან ქვეყანა მაშინვე დატოვა და უკრაინაში წავიდა. ის უკრაინიდან 2-ჯერ გააძევეს. საქართველოს მოქალაქეობა კი მას უკრაინის მოქალაქეობის მიღების გამო შეუწყვიტეს.
“კანონიერი ქურდების” სარჩელი თბილისის საქალაქო სასამართლოში უკვე შევიდა. როგორც ადვოკატი თამარ აბესაძე აცხადებს, ახლა საქართველოს პრეზიდენტმა სალომე ზურაბიშვილმა უნდა წარმოადგინოს მის ხელთ არსებული ინფორმაცია და საბუთები და დაამტკიცოს, რომ “კანონიერ ქურდებს” მოქალაქეობა სამართლიანად ჩამოართვა.
