კაია კალასი და მარტა კოსი: ოცნების პოლიტიკა განსხვავებული აზრის მქონეთა მიმართ ძალადობაა
კაია კალასი და მარტა კოსი ოცნების პოლიტიკაზე
ევროკავშირის უმაღლესი წარმომადგენელი, ევროკომისიის ვიცე-პრეზიდენტი კაია კალასი და გაფართოების საკითხებში ევროკომისარი, მარტა კოსი საქართველოში არსებულ ვითარებასთან დაკავშირებით ერთობლივ განცხადებას აქვეყნებენ და აღნიშნავენ, რომ ოცნების პოლიტიკა განსხვავებული აზრის მქონეთა მიმართ ძალადობაა.
მათივე განცხადებით, მზია ამაღლობელის საქმე კიდევ ერთი მაგალითია იმისა, როგორ ეპყრობა ოცნების რეჟიმი ჟურნალისტებსა და ყველა იმ ადამიანს, ვინც აზრს ხმამაღლა და თავისუფლად გამოხატავს.
ავტორები ქართულ ოცნებას მოუწოდებენ, რომ დაძაბულობის ზრდისგან თავი შეიკავონ. განცხადებაში ასევე ნათქვამია, რომ კანონში ცვლილებები დემოკრატიული განვითარების “სერიოზულ უკუსვლას ასახავს” და EU-ს კანდიდატი ქვეყნის მიმართ არსებულ მოლოდინებს არ შეესაბამება.
გარდა ამისა, განცხადებაში ხაზგასმულია, რომ მმართველი პარტია დაშინებასა და ძალადობას იყენებს და მშვიდობიანი მომიტინგეები, ჟურნალისტები და ოპოზიციონერები სამიზნეში ჰყავს ამოღებული.
კალასის და კოსის განცხადება
გავხდით მოწმენი იმისა, რომ საქართველოს ხელისუფლება დემოკრატიულ სტანდარტებს უფრო მეტად შორდება.
ადმინისტრაციულ სამართალდარღვევათა კოდექსში, სისხლის სამართლის კოდექსში და “შეკრებებისა და მანიფესტაციების შესახებ” კანონში ცვლილებების დაჩქარებული მიღება საქართველოს საზოგადოებაზე სერიოზული ზეგავლენა ექნება. ეს ცვლილებები არსებითად გამოუთხრის ძირს გამოხატვის თავისუფლებისა და შეკრების თავისუფლების უფლებებს, ისევე როგორც მედიის თავისუფლებას.
ეს მოვლენები საქართველოს დემოკრატიული განვითარების სერიოზულ უკუსვლას ასახავს და არ ამართლებს არცერთ მოლოდინს ევროკავშირის კანდიდატი ქვეყნის მიმართ.
მოვუწოდებთ ხელისუფლებას, შეაჩეროს ეს ზომები, თავი შეიკავოს დაძაბულობის შემდგომი გაზრდისგან და დაელოდოს ეუთოს დემოკრატიული ინსტიტუტებისა და ადამიანის უფლებათა ოფისის (OSCE / ODIHR) დასკვნას, სახალხო დამცველის მოთხოვნის შესაბამისად.
საქართველოს ხელისუფლებამ განსხვავებული აზრის ჩასახშობად დაშინების ტაქტიკასა და ძალადობას მიმართა. მშვიდობიანი საპროტესტო აქციების მონაწილეები, ჟურნალისტები და ოპოზიციონერი პოლიტიკოსები თავიანთი ფუნდამენტური უფლებების გამოყენების გამო დევნის სამიზნე გახდნენ. დაკავებული ჟურნალისტის, მზია ამაღლობელის საქმე კიდევ ერთი მაგალითია იმისა, თუ როგორ ექცევა ხელისუფლება ჟურნალისტებს და ყველას, ვინც აზრს თავისუფლად გამოხატავს. ამჟამად მოშიმშილე მზია ყველა უსამართლოდ დაკავებულის გამბედაობის სიმბოლოა. ძალადობაზე პასუხისმგებელი პირები უნდა დაისაჯონ.
მოვუწოდებთ საქართველოს ხელისუფლებას, გაათავისუფლოს ყველა უსამართლოდ დაკავებული ჟურნალისტი, აქტივისტი და პოლიტიკური ნიშნით დაკავებული პირი. მოვუწოდებთ ხელისუფლებას, უზრუნველყოს დიალოგი ყველა პოლიტიკურ ძალასთან და ასევე სამოქალაქო საზოგადოების წარმომადგენლებთან. ნდობისა და დიალოგის აღსადგენად არც ერთი ვარიანტი არ უნდა გამოირიცხოს. ბოლო არჩევნების შესახებ ეუთო/ოდირის ანგარიშის რეკომენდაციები სასწრაფოდ უნდა შესრულდეს. ევროკავშირი მზად არის, მხარი დაუჭიროს საქართველოს დემოკრატიული, სტაბილური და ევროპული მომავლისკენ მიმართულ ყველა ძალისხმევას.
“ქართული ოცნების” ერთპარტიულმა პარლამენტმა დაჩქარებული წესით ადმინისტრაციულ და სისხლის სამართლის კოდექსში რეპრესიული ცვლილებები 6 თებერვალს მიიღო.
კერძოდ, ცვლილებები შევა: ადმინისტრაციულ სამართალდარღვევათა კოდექსში, შეკრებებისა და მანიფესტაციების შესახებ კანონსა და სისხლის სამართლის კოდექსში.
ადმინისტრაციულ სამართალდარღვევად განისაზღვრება სახელმწიფო პოლიტიკური თანამდებობის პირის, საჯარო მოსამსახურის სიტყვიერი შეურაცხყოფა მის საქმიანობასთან დაკავშირებით, რისთვისაც მკაცრი სანქციები განისაზღვრება.
ასევე, სისხლის სამართლის კოდექსში იქნება რიგი ცვლილებები: ძალადობრივი ქმედებებისკენ საჯაროდ მოწოდება აქამდე ისჯებოდა მხოლოდ ჯარიმით და საზოგადოებისთვის სასარგებლო შრომით, არსებული ცვლილებით, ამ ქმედებისათვის განისაზღვრება პატიმრობა სამ წლამდე ვადით.
რა ცვლილებები შევიდა კოდექსში, დეტალურად წაიკითხეთ აქ.
