"საკითხი ასე დგას: ან ივანიშვილი ან საქართველო". როგორ აფასებენ ივანიშვილის გამოსვლას ხელისუფლების ოპონენტები
ივანიშვილის გამოსვლა შეფასებები
პოლიტიკოსები და სამოქალაქო საზოგადოების წარმომადგენლები ბიძინა ივანიშვილის გამოსვლას აფასებენ 29 აპრილის პროსახელისუფლებო აქციაზე.
ექსპერტები და ოპოზიციის წარმომადგენლები მიიჩნევენ, რომ მთელი სიტყვა ანტიდასავლურ, პრორუსულ გზავნილებზე იყო აგებული. ექს-პრემიერმა ფაქტობრივად რეპრესიები დააანონსა, ამბობენ ისინი.
რა თქვა ივანიშვილმა აქციაზე წაიკითხეთ აქ.
ლაშა ბუღაძე, მწერალი: “საკითხი ასე დგას: ან ივანიშვილი ან საქართველო. გავუძლებთ აქციებზე დგომას? გავუძლებთ ტელე-ეკრანებთან მსხდომთა ისტერიულ ზარებს “რობოკოპები გამოიყვანეს, წადით სახლში”?! გავუძლებთ დაღლას? გავუძლებთ თუნდაც მოსაწყენ ორატორებს? არ გავიწრიტებით პირველივე მოთენთილობისთანავე? – მაშინ გადავარჩენთ ამ ქვეყანას… თუ არა და, ვერც საქართველო გადარჩება, ვერც ჩვენ და ვერც ის ხალხი, ვინც დღეს ივანიშვილის ტაშის ფონოგრამას ჰყვებოდა.”
მამუკა ხაზარაძე, პარტია “ლელო”: “ბიძინა ივანიშვილმა დღეს ღიად აღიარა, რომ ის ემსახურება რუსეთს და მისი პარტიისთვის ევროკავშირი არის “გლობალური ომის პარტია.” ამით გაიმეორა პუტინის “რაშისტული” ნარატივი. დღეს ბიძინა ივანიშვილის მთავარი გზავნილი იყო – არა განვითარებას, არა მომავალს, არა ევროპას – კი, რუსეთს და მის პერსონალურ პუტინიზაციას. ბიძინა, შენი რუსული ოცნება საქართველოში ვერასდროს ახდება. არ გაგატანთ საქართველოს რუსეთში.”
ნინო ლომჯარია, ყოფილი სახალხო დამცველი: “გამოვიდა ბიძინა, დასავლეთი გამოაცხადა ქვეყნის მტრად და ხალხს დაპირდა მეტ რეპრესიებს. ქართული ოცნება ისე თვალსა და ხელს შუა გაქრება, როგორც ავტობუსებით ჩამოყვანილი ხალხი გაქრა რუსთაველზე ბიძინას სიტყვის დასრულებისთანავე.”
● საქართველოს დიპლომატების განცხადება: ივანიშვილმა და ოცნებამ კურსი რუსეთისკენ შეცვალა
● ათიათასობით ადამიანი ქუჩაში. თბილისში რუსული კანონის წინააღმდეგ პროტესტი გრძელდება – ფოტო/ვიდეო
● 14 ამერიკელი სენატორის წერილი – სანქციები და სავიზო აკრძალვები ივანიშვილის რეჟიმს. სენატორები აგენტების კანონის გაწვევას ითხოვენ
ზურაბ ჯაფარიძე, “გირჩი-მეტი თავისუფლება”: “ყველა წარსული პრობლემა შეტენა დასავლეთს, დღესაც მთავარ საფრთხედ დასავლეთი დასახა. დასავლეთს დაემუქრა შევარდნაძის დროინდელ საქართველოში ან იანუკოვიჩის უკრაინაში არ შეგეშალოთო. არანაირი მართლმსაჯულების ან რაიმე სხვა რეფორმაო. არჩევნების შემდეგ რეპრესიები დააანონსა. ბოლოში იდიოტებს მორიგი ოცნება გადმოუგდო ევროკავშირში გაწევრიანების სახით. არა რა რუსეთი, რა შუაშია რუსეთი.”
გიორგი მარგველაშვილი, ექსპრეზიდენტი: “დღესაც საქართველოს პოლიტბიუროს თავმჯდომარე მოგვმართავდა, ნაკლებად დახვეწილი რიტორიკით, ვიდრე კომუნისტური პარტიის ლიდერები მოგვმართავდნენ, 80-იანი წლების ბოლოს და 90-იანებში, ბევრად უფრო კომიკურად, რადგან მათ უკან ბევრად სერიოზული იდეოლოგია იდგა. ქართული ოცნება დასავლეთს ესხმება თავს პირდაპირ, ირიბად და არა პირდაპირ უკვე 2 წელიწადზე მეტია.
მადლობა ბატონ ბიძინას რომ შეგვიჯამა ყველაფერი, ამას წერტილი დაუსვა და ამას აღარ დაერქმევა ვიღაცის უხამსი გამოსვლა. ეს არის ლიდერის გაცხადებული კურსი, რომელმაც საქართველოს წინააღმდეგ შეთქმულებაში დაადანაშაულა დასავლეთი, და არა მარტო ბოლო წლების განმავლობაში, არამედ თურმე ბოლო 20 წელიწადია დასავლეთი საქართველოზე ძალადობს შეთქმულების სახით.
მადლობა ყველა მთარგმნელს, რომელიც გადაუთარგმნის ელჩებს და ეტყვის, რომ თურმე მათი სახელმწიფოები, როდესაც ჩვენ გვქონდა შიმშილი, პრობლემები და ამ ათწლეულების განმავლობაში გვეხმარებოდნენ და გვივითარებდნენ ქვეყანას, თურმე ისინი ამ ქვეყანას აგენტების მეშვეობით მართავდნენ.”
ნიკა გვარამია, პარტია “ახალი”: “უკიდურესად იზოლაციონისტური და აგრესიულად რეპრესიული მიმართვა ჰქონდა ივანიშვილს, ზიზღის და შუღლის მთესველი.
საქართველოსთვის ძალიან საშიშია ეს კაცი და წელს უნდა დავამთავროთ. აუცილებლად ასე უნდა ვქნათ.”
გიორგი მაისურაძე, ფილოსოფოსი: “დღევანდელი მიტინგისთვის არ მიყურებია, მხოლოდ ბიძინას სიტყვა ვნახე, სხვების ოინბაზობები არაა საინტერესო. ბიძინამ კი, თუკი აქამდე რამე ნიღაბი ჰქონდა, ერთიანად ჩამოიხსნა და დავინახეთ მძიმე პარანოიდული აშლილობის მქონე ძალაუფლების და თვითგანდიდების მანიით შეპყრობილი, ყველგან მტრებს, აგენტებს და შეთქმულებებს რომ ხედავს და რაღაც მითოლოგიური ქთონიური ურჩხულივით ყველას მოსპობით რომ ემუქრება. „გლობალური ომის პარტია“ არა მხოლოდ პუტინის ციტატაა, არამედ პარანოიდული სიმტომიც, რომელიც ავტორიტარ მმართველებს, თითქმის გამონაკლისის გარეშე, ემართებათ. ჩემი შთაბეჭდილებით, თუკი კობახიძე, კალაძე, პაპუაშვილი და სხვანი მსგავს ბოდვას იმეორებენ, ისინი უბრალოდ თვალთმაქცობენ, ბიძინას კი მართლა სჯერა. ის ღიად ომს უცხადებს დასავლეთსაც და მედასავლეთეებსაც, როგორც მის წინააღმდეგ შეთქმულებს. ამაში ის მართალიცაა: დასავლური სამყარო და ოფშორების ოლიგარგი, თანაც განდიდების მანიით შეპყრობილი, ერთმანეთთან შეუთავსებელია, მაგრამ აქ მთავარი ისაა, რომ ბიძინას თავი ცალკე კერძო პირად, თუნდაც ქვეყნის ლიდერად არ წარმოუდგენია. ის საკუთარ თავს საქართველოდ წარმოისახავს. შესაბამისად, ბიძინას წინააღმდეგ ხმის ამაღლება ან მასთან უბრალო უთანხმოებაც კი, ქვეყნის ღალატია, რადგანაც ბიძინაა ქვეყანა. პარანოიდულია ჰომოფობიაც, ლგბტ პროპაგანდა – ეს ყველაფერი ჯერ კიდევ პარანოიის, როგორც ფსიქიკური აშლილობის აღმომჩენებმა აღწერეს და პარანოიის მთავარ საფუძვლად განდევნილი ჰომოსექსუალობა აჩვენეს. შესაბამისად, არა პოლიტიკური, არამედ ფსიქოლოგიური საფუძვლის მქონე ჰომოფობია პარანოიული სიმპტომიცაა. რაც იდეალურად ებმის „ქართული ოცნების“ ამჟამინდელ ულტრამემარჯვენე თუ ნეოფაშისტურ პათოსს. მაგრამ ეს არანაირად სასაცილო არაა, თუ გავითვალისწინებთ, რომ ეს პიროვნება მთლიანად აკონტროლებს ძალაუფლების ყველა შტოს, პარლამენტს, მთავრობას, ეკლესიას, ძალოვან სტრუქტურებს, სასამართლოს, მსხვილ ბიზნესს და მის უკან გიგანტური შავი კაპიტალია, რომელიც საქართველოს გაოფშორებით კიდევ არანორმალურად გაიზრდება. ბიძინას ოცნება – ესაა სრული ოლიგარქიული დიქტატურა, ყველა არაქოცის დევნითა და რეპრესიებით. ამაზეც პირდაპირ ილაპარაკა და ყველა წინასწარვე ნაციონალურ მოძრაობად შერაცხა.
მოკლედ, დავითისა და გოლიათის ბრძოლა იწყება. ერთ მხარეს მთელი სამყაროს მანკიერებაა, პარანოიდი დიქტატორის კვერთხით, მეორე მხარეს დანარჩენი საქართველო, ბიძინას და მისი კლანის მიერ გაძარცვულ-გაყვლეფილი, ბიძინას ხელში ყოველგვარი მომავლის პერსპექტივას მოკლებული. არჩევანი ასეთია: ან ბიძინა და მისი ოფშორ-კლანის აბსოლუტური მმართველობა, სრული წყვდიადი და ქვეყნის კულტურული გაჯაგნარება, ან საქართველოს ცივილიზებული, მისი სამართლიანობასა და თანასწორობის პრინციპებზე დამყარებული მომავალი. სხვა ვარიანტი აღარ არსებობს.”
