"რაც საქართველოში ხდება, ეს რუსეთის მიერ წარმოებული ჰიბრიდული ომია" - ინტერვიუ გდდ-ს ყოფილ მაღალჩინოსანთან
ინტერვიუ ირაკლი შაიშმელაშვილთან
განსაკუთრებულ დავალებათა დეპარტამენტის ყოფილი მაღალჩინოსანი, ირაკლი შაიშმელაშვილი “ტვ პირველთან” ინტერვიუში ამბობს, რომ საქართველოში მიმდინარე მოვლენები რუსეთის მიერ წარმოებული ჰიბრიდული ომის ნაწილია.
მისივე თქმით, 2021 წლის 5 ივლისის ძალადობისას საპოლიციო მოქმედებები საპატრიარქოს საზოგადოებასთან ურთიერთობის სამსახურის ხელმძღვანელთან, დეკანოზ ანდრია ჯაღმაიძესთან იყო შეთანხმებული.
ამასთან, შაიშმელაშვილი არ გამორიცხავს, აქციების დარბევის ბრძანებებს თავად ბიძინა ივანიშვილი გასცემდეს.
პოლკოვნიკი ირაკლი შაიშმელაშვილი განსაკუთრებულ დავალებათა დეპარტამენტში ოპერატიული დაგეგმვის სამმართველოს ხელმძღვანელობდა. მან საქართველო ოჯახთან ერთად რამდენიმე დღის წინ დატოვა. როგორც თავად ამბობს, თანამდებობის დატოვების შემდეგ ოჯახის წევრების, მათ შორის მცირეწლოვანი შვილის ლიკვიდაციით დაემუქრნენ, ეს კი საკმარისი მიზეზი იყო იმისთვის, რომ ქვეყნის დატოვებაზე ეფიქრა.
ირაკლი შაიშმელაშვილმა სამსახური დეკემბრის დასაწყისში დატოვა და პატაკში მიზეზად ოჯახური პირობები დაასახელა.
რას ამბობს ირაკლი შაიშმელაშვილი
“რაც საქართველოში ხდება, ეს რუსეთის მიერ წარმოებული ჰიბრიდული ომია”
გდდ-ს ყოფილი მაღალჩინოსნის თქმით, ოცნება ჰიბრიდულ ომს არაფერს უპირისპირებს და ამის ნაცვლად, საზოგადოებას დეზინფორმაციითა და ტყუილებით წამლავს.
“დღეს რაც ხდება ეს არის რუსეთის მიერ აგრესიულად წარმოებული ჰიბრიდული ომი საქართველოში. სამწუხაროდ, დღევანდელი ჩვენი ხელისუფლება ამ ჰიბრიდულ ბრძოლას და ომს რაიმეს კი არ უპირისპირებს, არამედ დეზინფორმაციით და ტყუილებით მოწამლული ჰყავს საზოგადოება, მათ შორის, თავისი ამომრჩეველიც.
საინფორმაციო ველი არის დაბინძურებული მთლიანად, იმდენად არიან ტყუილებში აბსოლუტურად, რომ შეიძლება ხვალ გავიღვიძო და აღმოჩნდეს, რომ ორთაჭალიდან ბომბეიმდე ტუნელი მყავს გაყვანილი”, – განაცხადა შაიშმელაშვილმა.
“5 ივლისის ძალადობისას მოქმედებები ანდრია ჯაღმაიძესთან იყო შეთანხმებული”
ირაკლი შაიშმელაშვილმა ტვ პირველთან ინტერვიუში განაცხადა, რომ 2021 წლის 5 ივლისის ძალადობისას საპოლიციო მოქმედებები საპატრიარქოს საზოგადოებასთან ურთიერთობის სამსახურის ხელმძღვანელთან, დეკანოზ ანდრია ჯაღმაიძესთან იყო შეთანხმებული.
მისივე თქმით, შსს-დან ამ გადაწყვეტილებას შინაგან საქმეთა მინისტრის მოადგილე, შალვა ბედოიძე იღებდა, რომელიც უშუალოდ იყო ხაზზე ჯაღმაიძესთან:
“2021 წლის 5 ივლისის დღის საათებში, სამწუხაროდ, გეგმა არ იყო. წინასწარ შემუშავებული გეგმა, რომელიც წარვადგინეთ არ აამოქმედეს – სადაც გვყავდა ქვედანაყოფები განსაზღვრული იქ არ დაგვაყენებინეს იმ რაოდენობით, რა რაოდენობითაც უნდა ვყოფილიყავით. გვითხრეს, რომ სიტუაცია ანდრია ჯაღმაიძესთან (საპატრიარქოს საზოგადოებასთან ურთიერთობის უფროსი) იყო შეთანხმებული და ყველაფერი ისე იქნებოდა, როგორც საჭირო იყო. შსს-დან ამ გადაწყვეტილებას შინაგან საქმეთა მინისტრის მოადგილე, შალვა ბედოიძე იღებდა.
10-15 წუთში მოხდა ის, რაც მოხდა. მაშინ, როცა ჩვენი ქვედანაყოფები ადგილზე მივიდნენ, სამწუხაროდ, უკვე ყველა ნაცემი იყო.”
2021 წლის 5 ივლისს რუსთაველის გამზირზე დაგეგმილი ღირსების მარშის წინააღმდეგ შეკრებილმა ულტრამემარჯვენე და ძალადობრივმა ჯგუფებმა პარლამენტის წინ ხელისუფლების წინააღმდეგ აღმართული კარვები დაშალეს. ამ მოვლენის მსვლელობისას, ადგილზე ფაქტობრივად არ იყო მობილიზებული პოლიცია. ამის შემდეგ, ულტრამემარჯვენე ჯგუფებმა პარლამენტის წინ აღმართული ევროკავშირის დროშა ჩამოხსნეს და ჯვარი აღმართეს.
ულტრამემარჯვენე და ძალადობრივი ჯგუფების მთავარი სამიზნე მედია და ჟურნალისტები გახდნენ. მათი თავდასხმის შედეგად 53 ჟურნალისტი დაშავდა, დარბევიდან რამდენიმე დღეში კი “ტვ პირველის” სასტიკად ნაცემი ოპერატორი, ლექსო ლაშქარავა გარდაიცვალა.
“შესაძლოა, დარბევისას ივანიშვილისგან მოდიოდეს ბრძანებები”
შაიშმელაშვილი ასევე არ გამორიცხავს, რომ აქციების დარბევის ბრძანებებს თავად ბიძინა ივანიშვილი გასცემდეს.
მისივე თქმით, ბიძინა ივანიშვილის და ზვიად ხარაზიშვილის მჭიდრო კავშირების შესახებ ინფორმაცია აქამდეც ჰქონდა.
“შეიძლება, ივანიშვილისგანაც მოდიოდეს ბრძანებები პირდაპირ. არ გამოვრიცხავ, რომ ის კავშირზე იყოს სხვა დეპარტამენტის ხელმაძღვანელებთან, მაგალითად ჩემი დეპარტამენტის ხელმძღვანელთან”, – ამბობს შაიშმელაშვილი.
ამასთან, გდდ-ს ოპერატიული დაგეგმვის სამმართველოს ყოფილი უფროსი აღნიშნავს, რომ ბრძანების გარეშე პოლიციელი ადგილიდან არ გაინძრევა.
“ბრძანების გარეშე პოლიციელი ადგილიდან არ გაინძრევა. თუ არ აქვს მას მითითება განახორციელოს დევნა, ის არ გაეკიდება. იქ შეიძლება იყოს გარკვეული გადაცდომა, ცალკეულმა პოლიციელმა გადაამეტოს ძალა, მაგრამ ჯგუფურად, მასობრივად, მუდმივად? ერთი დღე იყო, კარგით, განიხილეს ეს შემთხვევები? რამე შეიცვალა მეორე, მესამე დღეს? ამ სიმძიმის ტვირთის იმ ბიჭებზე გადატანა, სისტემას აკნინებს, რომ გყავს თანამშრომლები, რომლებიც არ გემორჩილებიან.” – განაცხადა შაიშმელაშვილმა.
“აქციებზე არიან ადამიანები, რომლებიც გდდ-ს თანამშრომლები არ არიან”
ირაკლი შაიშმელაშვილი ამბობს, რომ აქციების დარბევაში ისეთი ადამიანებიც მონაწილეობდნენ, რომლებიც გდდ-ს თანამშრომლები არ არიან.
შაიშმელაშვილი განმარტავს, რომ აქციების დროს გდდ-ს ორი ტიპის დანაყოფები არიან წარმოდგენილნი: “ე.წ. რობოკოპები” და “დაკავების ჯგუფები”. მისივე თქმით, არიან სხვა ადამიანებიც, რომლებიც გდდ-ში არ მუშაობენ.
“დეპარტამენტში ძირითადად მანდ აქციების დროს ორი კატეგორიის დანაყოფები არიან წარმოდგენილნი: ე.წ. რობოკოპები და დაკავების ჯგუფები. რობოკოპები ძირითადად მოქმედებენ კოლოფის შემადგენლობაში, რომელიც რუსთაველს წმენდს წყლის ჭავლის მანქანის გამოყენებით, ეს მეორე ადამიანები არიან დაკავების ჯგუფები. თუმცა, კადრებში მეც ვნახე, არიან აგრეთვე, ასე ვთქვათ, ჯინსებში ჩაცმული ადამიანები, რომლებიც გდდ-ს თანამშრომლები ნამდვილად არ არიან”. – თქვა შაიშმელაშვილმა.
მელაძის კითხვაზე, არის თუ არა შესაძლებელი, რომ ადამიანების საწამებლად და დანაშაულების ჩასადენად გდდ-ს თანამშრომლებთან სრულად სხვა პირები იყვნენ შერეულები, შაიშმელაშვილი პასუხობს, რომ “გულწრფელად” არ იცნობს ვინ არიან ეს ადამიანები და სახეზეც ვერ ცნობს. მისივე თქმით, დეპარტამენტს მსგავსი მომზადება არ გაუვლია.
“მე გულწრფელად არ ვიცი, ეს ადამიანები ვინ არიან, არ ვიცი, ასეთი დეპარტამენტი არასდროს არ ყოფილა, დეპარტამენტს სწავლებები, რაც ჩატარებია და რაც გაგვივლია, მსგავსი რამე არ გაუკეთებიათ, ანუ, არ ვიცი, გულწრფელად არ ვიცი, ვინ არიან, ანუ სახეზეც არ ვიცი, ოღონდ მართლა გეუბნებით… ერთი, რაც ვიცი არის ის, რომ ეს არ ემსახურება საზოგადოებრივი წესრიგის აღდგენას – სიტყვა გეუბნება, აღადგინონ და არა – უარესი შედეგი მიიღონ საზოგადოებისგან.” – თქვა შაიშმელაშვილმა.
