ღარიბაშვილი ჩარტერით ევროპაში ჩავიდა, ევროპიდან ამერიკაში - რეგულარულით. მთავრობის შეცვლილი განმარტება

ღარიბაშვილი ამერიკაში

მედიაში გავრცელებული ინფორმაციის შემდეგ, რომ საქართველოს პრემიერმინისტრი აშშ-ში შვილთან ერთად ჩარტერული რეისით გაემგზავრა, საქართველოს მთავრობის სტრატეგიული კომუნიკაციების დეპარტამენტის უფროსმა, ნინო გიორგობიანმა გამოაქვეყნა განცხადება და განმარტა, რომ პრემიერმინისტრი ირაკლი ღარიბაშვილი აგვისტოში აშშ-ში შვილთან ერთად ჩარტერული რეისით მართლაც გაემგზავრა, თუმცა, მისი მტკიცებით, ხარჯი ბიუჯეტიდან არ გაწეულა.

მოგვიანებით სტრატკომმა ღარიბაშვილის აშშ-ში ჩასვლასთან დაკავშირებით განცხადება შეცვალა და აღნიშნა, რომ ღარიბაშვილი ჩარტერით ჯერ ევროპაში ჩავიდა, იქიდან კი ამერიკაში რეგულარული რეისით გაფრინდა.

“საზოგადოების შეცდომაში შეყვანის მიზნით, მიზანმიმართულად ვრცელდება ცრუ ინფორმაცია იმის შესახებ, რომ პრემიერ-მინისტრი ირაკლი ღარიბაშვილი შვილთან ერთად აშშ-ში თითქოსდა ჩარტერული რეისით გაემგზავრა.

საზოგადოების ინფორმირების მიზნით განვმარტავთ, რომ პრემიერმინისტრი როგორც ოფიციალური და სამუშაო, ისე კერძო ვიზიტების დროს აშშ-ში მგზავრობს სამგზავრო თვითმფრინავით,  სხვადასხვა ავიაკომპანიის რეგულარული, კომერციული რეისებით.

კიდევ ერთხელ განვმარტავთ, რომ  საუბარი იყო ჩარტერულ ფრენაზე, რომელიც განხორციელდა თბილისიდან ევროპის ერთ-ერთი ქალაქის მიმართულებით, ხოლო აშშ-ის მიმართულებით პრემიერ-მინისტრი რეგულარული რეისით გაემგზავრა. კერძო ვიზიტისას პრემიერ-მინისტრის მგზავრობის, ასევე ჩარტერული (კომერციული) რეისის თუ ნებისმიერი სხვა ხარჯი სახელმწიფო ბიუჯეტიდან არ გაწეულა”. – ვკითხულობთ განცხადებაში.

მთავრობის სტრატეგიული კომუნიკაციების დეპარტამენტის მტკიცებით, კონკრეტული მედიასაშუალებები ცდილობენ სკანდალის აგორებას იმასთან დაკავშირებით, რომ აგვისტოს თვეში პრემიერ-მინისტრი ირაკლი ღარიბაშვილი აშშ-ში გაემგზავრა საკუთარ შვილთან ერთად, რომელსაც პენსილვანიის უნივერსიტეტში სასწავლო წელი ეწყებოდა. მათივე თქმით, აქ სკანდალური არაფერია, რადგან ყველა ადამიანს აქვს სურვილი და უფლებაც მისი შვილისთვის ასეთ მნიშვნელოვან დროს მის გვერდით იყოს.

“პრემიერ-მინისტრი ყოველწლიურად ავსებს ქონებრივ დეკლარაციას, სადაც ასახულია ყველა გაწეული ხარჯი, შესაბამისად, დაელოდეთ შემდეგი დეკლარაციის გამოქვეყნებას”, – დაწერა გიორგობიანმა.

● ერთობლივი ენერგეტიკული და ინფრასტრუქტურული პროექტები – ირაკლი ღარიბაშვილი აზერბაიჯანში ჩავიდა
● საქართველოსა და სომხეთის მოქალაქეები საზღვარს პირადობის მოწმობებით გადაკვეთენ
● სამხრეთ კავკასიაში რუსეთს თურქეთი და აზერბაიჯანი ცვლის. სად ვართ ჩვენ? – პაატა ზაქარეიშვილის კომენტარი

გამოხმაურება

კახა კალაძე, დედაქალაქის მერი: “რა იყო დასამალი? ადამიანი როდესაც თავისი პირადი ხარჯებით გადაადგილდება, რატომ უნდა იყოს ეს საჯარო? როდესაც მე ჩემი ხარჯებით მივდივარ უცხო ქვეყანაში, რა, უნდა დავდგე და მოგიყვეთ თქვენ ყველაფერი? არანაირი აუცილებლობა არ მაქვს, რომ ჩემი ხარჯებით სადმე წავიდე და ამასთან დაკავშირებით დავდგე და გესაუბროთ.”

მამუკა მდინარაძე, “ქართული ოცნების” ერთ-ერთი ლიდერი: “რაც გავარკვიეთ ძალიან მოკლედ, კომუნიკაციის შედეგად, თავისი ოჯახის ხარჯებით, ჩარტერით არის გაფრენილი შვილთან ერთად ევროპაში და იქიდან გადაფრინდა ჩვეულებრივად, აშშ-ში. ჩემი აზრით, ეს არის მაშინ თქვენი საქმე, როცა ითვალისწინებს კანონი, გამოქვეყნდება, დეკლარაციაში ჩაიწერება, იმიტომ, რომ არის კერძო ხარჯი.

მე ჩარტერით ევროპაში ვერ გავფრინდები, არ მაქვს ამის საშუალება, თუ არ მომეხმარა, მაგალითად, ოჯახის რომელიღაც წევრი, რომელსაც შეიძლება ჰქონდეს ეს საშუალება. ჰოდა, გეუბნებით, მე ამ წუთში ჩარტერით ვერ გავფრინდები და [ირაკლი ღარიბაშვილის] ოჯახს აქვს გარკვეული შემოსავალი, როგორც ჩანს. იკითხეთ და გაგცემენ პასუხს – დეკლარაციაში ეწერება, ხალხო, დეკლარაციაში არ წერიაო, გუშინ წინ ადამიანი გაფრინდა და დღეს დეკლარაციაში რატომ არ წერიაო, ხომ სპეკულაციაა.“

ხატია დეკანოიძე, პარლამენტში პოლიტიკური ჯგუფის, ევროოპტიმისტების წევრი: “საჯარო მოხელეს ჩარტერის დაქირავების შესაძლებლობა არ აქვს – მე ძალიან დიდი ხანი ვიყავი საჯარო მოხელე, თითქმის, 20 წელი სხვადასხვა ქვეყანაში და მინდა გითხრათ, რომ თუ პატიოსნად ცხოვრობს საჯარო მოხელე და თუ არ არის კორუფციაში გახვეული, მაშინ მას ამის შესაძლებლობა არ აქვს. რა თქმა უნდა, ეს არის ძალიან დიდი ტრაგედია, რომ საქართველოს ჰყავს პრემიერმინისტრი, რომელიც თავს უფლებას აძლევს კორუფციული ფულით იქირავოს ჩარტერები და გადაფრინდეს ნებისმიერ ქვეყანაში.”

ეკა კვესიტაძე, ჟურნალისტი: “პენსილვანიის უნივერსიტეტმა უნდა გაიგოს, რომ ძალიან ღარიბი ქვეყნის პრემიერმა თავის სტუდენტს შვილს ჩარტერი უქირავა და ისე გააფრინა ამერიკაში. რა შეიძლება იყოს ამაზე უფრო გოიმური, მდაბიო, აღმაშფოთებელი და გულისამრევი საქციელი არა მხოლოდ პრემიერი მამისთვის, არამედ სტუდენტი შვილისთვის. ზუსტად ისევე უნდა აგოს პასუხი, როგორც მამამისმა. ასეთ ასაკში პროტესტის არქონა საკუთარი მამის უგვანი, კორუმპირებული, დანაშაულებრივი ქცევის მიმართ სრულიად მეტყველებს სრულწლოვანი ადამიანის ღირებულებებზე!”