გერმანიის ბუნდესტაგმა საქართველოზე რეზოლუციას მხარი დაუჭირა
გერმანიის ბუნდესტაგის რეზოლუციაა
გერმანიის ბუნდესტაგმა საქართველოს საკითხზე რეზოლუციას – “საქართველოს ევროპული მომავლისთვის“ მხარი დაუჭირა. როგორც რეზოლუციაშია აღნიშნული, ავტორიტარული და ანტიევროპული კურსი, რომელსაც საქართველოს ამჟამინდელი მთავრობა დაადგა, საქართველოს ევროპულ მომავალს რისკის ქვეშ გამიზნულად აყენებს.
დოკუმენტში ასევე აღნიშნულია, რომ ეგრეთ წოდებული „უცხოური გავლენის გამჭვირვალეობის შესახებ“ კანონით ევროკავშირში გაწევრიანების პროცესში შემდეგი წინსვლა ვერ და არ იქნება. ბუნდესტაგი დაჟინებით მოითხოვს, რომ სანამ [რუსული] კანონი ძალაშია, საქართველოსთან, EU-ში გაწევრიანების პროცესში, შემდეგი წინსვლა აღარ მოხდეს.
აქვე ხაზგასმულია “ქართული ოცნების” საპატიო თავმჯდომარის როლი და ნათქვამია, რომ ბიძინა ივანიშვილის ძალაუფლების შენარჩუნების მიზანი საქართველოს ევროპულ მომავალსა და დემოკრატიულ სტაბილურობაზე მაღლაა დაყენებული.
“პარტიის დამაარსებლის და საპატიო თავმჯდომარის, ქართველი ოლიგარქი ბიძინა ივანიშვილის ძალაუფლების შენარჩუნების მიზანი საქართველოს ევროპული მომავალზე და დემოკრატიულ სტაბილურობაზე მაღლაა დაყენებული”, – წერია რეზოლუციაში და აქვე, აღნიშნულია, რომ “ქართული ოცნების” ხელმძღვანელობა ცდილობს “სულ უფრო ავტორიტარული მოქმედებით და საზოგადოების მეგობრებად/პატრიოტებად და მტრებად/მოღალატეებად დაყოფით, შიშის ატმოსფეროს გაღვივებას”.
რეზოლუციაში ასევე ნათქვამია, რომ გერმანიის ბუნდესტაგი ფედერალურ მთავრობას მოუწოდებს, “ზედმიწევნით ადევნოს თვალი საქართველოში არსებულ სიტუაციას, რათა გამოავლინოს შესაძლო ფაქტები, რომლებიც შეიძლება მიზნობრივი სანქციების დაწესების საბაბი გახდეს”.
რეზოლუციას მმართველ უმრავლესობის პარტიებმა დაუჭირეს მხარი – “სოციალ-დემოკრატიულმა პარტიამ”, “მწვანეებმა” და “ლიბერალურ-დემოკრატიულმა პარტიამ”. ოპოზიციური პარტიები “ქრისტიან-დემოკრატიული კავშირი”, ულტრამემარჯვენე “ალტერნატივა გერმანიისთვის” და ულტრამემარცხენე “სარა ვაგენკნეხტის კავშირი” წინააღმდეგ წავიდნენ. “მემარცხენეებმა” თავი შეიკავეს.
გერმანიის “თავისუფალი დემოკრატიული პარტიის” დეპუტატმა, ანიკო გლოგოვსკი-მერტენმა ბუნდესტაგგის სხდომაზე განაცხადა, რომ ივანიშვილი ნიურნბერგის პროცესს, ოპოზიციის დევნას ითხოვს, რაც საფრთხეა:
აქედან მოგმართავთ კოლეგებო, რომ მომავალ დღეებში რამდენიმე თქვენგანი წავა საქართველოში დამკვირვებლად და ვიცი, რომ კარგად დაინახავთ იქ არსებულ სიტუაციას. აქაც არ გვაქვს უფლება, სისუსტე გამოვიჩინოთ, იმპერიალისტების ფანტაზია და მათი ძალისხმევა არ გაქრება.
პატივცემულო ქართველებო, ჩვენ შევხვდებით ერთმანეთს, დარჩით ძლიერები და იბრძოლეთ რუსული ოლიგარქის მარიონეტული რეჟიმის წინააღმდეგ. მე შევუერთდებით დემონსტრანტების ძახილს: არა რუსულ კანონს და კი საქართველოს ევროკავშირის რიგებში.” – განაცხადა ანიკო გლოგოვსკი-მერტენმა.
დეპუტატმა მიხაილ როთმა ბუნდესტაგის სხდომაზე განაცხადა, რომ “ქართული ოცნებისგან” ქართული კოშმარი დაიბადა.
“ქართული ოცნება” ოდესღაც მიეკუთვნებოდა სოციალურ-დემოკრატიულ ოჯახს. და ახლა კი მისგან, ქართული ოცნებისგან ქართული კოშმარი დაიბადა. მე არა ვგულისხმობ იმას, რომ მხოლოდ ჩვენი პერსპექტივიდან იღებენ ისინი მცდარ გადაწყვეტილებებს. ისინი უბრალოდ არაა შესაბამისი ევროპულ ღირებულებებთან.
საქართველოს მოქალაქეები მკაფიოდ აცხადებენ, რომ მათ უნდათ გაერთიანებული ევროპის წევრები იყვნენ. სწორედ ამიტომ, რადგან ვიცი, რომ ჩემი რამდენიმე მეგობარი საქართველოში უსმენს ამ დებატებს და ადევნებენ თვალს, ჩემთვის ცოტა რთულია, მაგრამ ქართულად მინდა ვთქვა: საქართველოს მომავალი დემოკრატიული, თავისუფალი და ევროპული.” – თქვა როთმა.
10 ოქტომბერს ვაიმარის სამკუთხედის წევრმა ქვეყნებმა, გერმანიის, საფრანგეთისა და პოლონეთის საგარეო საქმეთა მინისტრებმა საქართველოს შესახებ ერთობლივი განცხადება გამოაქვეყნეს, რომელშიც მოუწოდებენ საქართველოს მთავრობას, შეცვალოს თავისი ქმედებები.
განცხადების თანახმად, სამივე ქვეყნის საგარეო საქმეთა მინისტრები საქართველოს მთავრობას მიმდინარე ქმედებების კურსის ცვლილებისკენ მოუწოდებენ. მინისტრების თქმით, ევროკავშირისა და საქართველოს თანამშრომლობა საფრთხის ქვეშ დგას.
განცხადებაში ასევე ხაზი გაესვა მომავალი საპარლამენტო არჩევნების თავისუფალი და სამართლიანი ჩატარების მნიშვნელობას.
აღსანიშნავია, რომ ევროპარლამენტმა საქართველოზე კრიტიკული რეზოლუცია 9 ოქტომბერს მიიღო, რომელშიც ევროპარლამენტარები მოუწოდებენ ევროპულ საბჭოსა და ევროკავშირის დემოკრატიულ პარტნიორებს, დაუწესოს დაუყოვნებლივი და მიზანმიმართული პერსონალურ სანქციები ბიძინა ივანიშვილს “საქართველოში პოლიტიკური პროცესის გაუარესებაში მისი როლის გამო.”
