კორონავირუსის გამო, შესაძლოა, გარდაბნის ორი სოფელი დაიკეტოს

გარდაბნის მუნიციპალიტეტის ორ სოფელში – ყარაჯალარსა და ყარათაკლიაში შესაძლოა, კარანტინი გამოცხადდეს.

გარდაბანში ბოლო ორი კვირის განმავლობაში კორონავირუსის 23 შემთხვევა გამოვლინდა.

აქედან 14 შემთხვევაა ერთ სოფელში – ყარაჯალაშია გამოვლენილი.

სამი ადამიანის ინფიცირების წყარო უცნობია. 60-მდე ადამიანი საკარანტინო სივრცეშია გადაყვანილი.

გარდაბანში ეპიდემიოლოგთა ექვსი ჯგუფია მობილიზებული. ისინი ყარაჯალარსა და ყარათაკლიაში მასობრივ PCR-ტესტირებას ატარებენ.

დღეს ამ სოფლებში კორონავირუსზე 700-მდე ადამიანი შემოწმდება.

ამ ტესტების პასუხებზეა დამოკიდებული, დაიკეტება თუ არა ეს ორი სოფელი.

• PCR-ტესტი, კარანტინი და თვითიზოლაცია – რა უნდა იცოდეთ, თუ საქართველოში შემოსვლას ან საქართველოდან წასვლას აპირებთ
• კარანტინი და ადამიანის უფლებები. საუბარი ანა არგანაშვილთან

26 თებერვლიდან დღემდე საქართველოში კორონავირუსის სულ 1049 შემთხვევა გამოვლინდა.

მათ შორის 10 – გასული 24 საათის განმავლობაში.

კორონავირუსისგან გამოჯანმრთელებულია 903 ადამიანი.

ინფიცირებულებს შორისაა 38 ქართველი ჯარისკაციც, რომლებიც ავღანეთში, ნატოს მისიაში მონაწილეობდნენ და იქ დაინფიცირდნენ. ჯარისკაცები საქართველოში უკვე ჩამოიყვანეს სპეცრეისით.