გაერთიანებული სამეფო საქართველოს მთავრობის პროგრამულ მხარდაჭერას აჩერებს
გაერთიანებული სამეფო საქართველოს მთავრობაზე
დიდი ბრიტანეთის საგარეო, თანამეგობრობის და განვითარების მინისტრი დევიდ ლამმი განცხადებას ავრცელებს და წერს, რომ “საქართველოში მიმდინარე მოვლენებიდან გამომდინარე”, გაერთიანებული სამეფო “დაუყოვნებლივ” აჩერებს საქართველოს მთავრობის პროგრამულ მხარდაჭერას, ზღუდავს თავდაცვის სფეროში თანამშრომლობას და ამცირებს ჩართულობას “ქართული ოცნების” მთავრობის წარმომადგენლებთან, მანამ სანამ არ შეწყდება ევროპული დემოკრატიული ნორმებისა და თავისუფლებებისგან უკუსვლა.
განცხადებაში დევიდ ლამი აცხადებს, რომ საქართველოს ხელისუფლების მხრიდან მომიტინგეებისა და ჟურნალისტების მიმართ ძალადობის შოკისმომგვრელი სცენები მიუღებელია და უნდა შეწყდეს.
“ეს ქმედებები ლახავს საქართველოს საერთაშორისო პოზიციებს და ეწინააღმდეგება საქართველოს კონსტიტუციურ ვალდებულებას ევროპული მომავლის მიმართ.
მიმდინარე მოვლენების გათვალისწინებით, გაერთიანებული სამეფო დაუყოვნებლივ აჩერებს საქართველოს მთავრობის პროგრამულ მხარდაჭერას, ზღუდავს თავდაცვის სფეროში თანამშრომლობას და ამცირებს ჩართულობას ქართული ოცნების მთავრობის წარმომადგენლებთან, მანამ სანამ არ შეწყდება ევროპული დემოკრატიული ნორმებისა და თავისუფლებებისგან უკუსვლა. გაერთიანებული სამეფო გააგრძელებს საქართველოს მოსახლეობის გვერდით დგომას და მხარს უჭერს მათ უფლებას აირჩიონ საკუთარი ქვეყნის მომავალი.”- ნათქვამია განცხადებაში.
მასშტაბური საპროტესტო ტალღა საქართველოში აგორდა მას შემდეგ, რას პრემიერმინისტრმა ირაკლი კობახიძემ განაცხადა, რომ ქვეყანა ოფიციალურად აჩერებს ევროკავშირთან მოლაპარაკებების გახსნას.
ამ განცხადების შემდეგ თბილისში მრავალათასიანი მიტინგები არ წყდება. უკვე ოთხი ღამეა, აქციის მონაწილეებს სასტიკად არბევენ, სცემენ, მათ წინააღმდეგ იყენებენ წყლის ჭავლს, წიწაკის სპრეის, მხუთავ აირს, მაგრამ, აქციები არ იშლება.
