ევროპული საბჭო: მთავრობამ პატივი უნდა სცეს გამოხატვის თავისუფლებას და ხელი აიღოს ძალადობაზე
ევროპული საბჭოს ანგარიში
ევროკავშირის ლიდერების შეხვედრის შემდეგ ევროპული საბჭო დასკვნას აქვეყნებს, რომელშიც მოუწოდებს საქართველოს მთავრობას, პატივი სცეს გამოხატვის თავისუფლებას და ხელი აიღოს ძალადობაზე.
ევროპული საბჭო გმობს ივანიშვილის რეჟიმის მიერ პროევროპული საპროტესტო აქციების მონაწილე მშვიდობიანი მომიტინგეების, პოლიტიკოსებისა და მედიის წარმომადგენლების წინააღმდეგ განხორციელებულ ძალადობას და რეჟიმს მოუწოდებს, პატივი სცეს შეკრებისა და გამოხატვის თავისუფლებას და ხელი აიღოს ძალის გამოყენებაზე.
ევროპული საბჭო ანგარიშში იმეორებს მხარდაჭერას ქართველი ხალხისა და მათი ევროპული მისწრაფებების მიმართ.
“იხსენებს რა 2024 წლის ივნისისა და ოქტომბრის დასკვნებს, ევროპული საბჭო იმეორებს სერიოზულ შეშფოთებას საქართველოს მთავრობის მიერ განხორციელებული ქმედებების მიმართ, რომლებიც იმ ღირებულებებისა და პრინციპების წინააღმდეგ მიდის, რომლებზეც ევროკავშირია დაფუძნებული. [ევროპული საბჭო] წუხილს გამოთქვამს საქართველოს მთავრობის გადაწყვეტილების შესახებ, შეაჩეროს ქვეყნის ევროკავშირში გაწევრიანების პროცესი 2028 წლამდე.
ევროპული საბჭო მკაცრად გმობს მშვიდობიანი მომიტინგეების, პოლიტიკოსებისა და მედიის წარმომადგენლების წინააღმდეგ განხორციელებულ ძალადობას. საქართველოს ხელისუფლებამ პატივი უნდა სცეს შეკრებისა და გამოხატვის თავისუფლებას და ხელი აიღოს ძალის გამოყენებაზე. ძალადობის ყოველი აქტი გამოძიებულ უნდა იქნეს და [ძალადობაში ჩართულ] პირებს პასუხისმგებლობა უნდა დაეკისროთ.
ევროპული საბჭო ხაზს უსვამს ევროკავშირის მზაობას, მხარი დაუჭიროს ქართველი ხალხის ევროპულ მისწრაფებებს და ქვეყნის გზას [ევროკავშირში] გაწევრიანებისკენ. საქართველოს ხელისუფლებამ მოქმედებათა კურსი უნდა შეცვალოს”. – წერია ევროპული საბჭოს ანგარიშში საქართველოს შესახებ.
