ყარაბაღში დაღუპულთა ხსოვნისადმი მიძღვნილი მსვლელობა ერევანში. ფოტორეპორტაჟი
ერევანში, ყარაბაღის მეორე ომში, 27 სექტემბრიდან 10 ნოემბრამდე დაღუპული ყველა ჯარისკაცის ხსოვნისადმი მიძღვნილი სამგლოვიარო მსვლელობა გაიმართა, რომლის მონაწილეებსაც ხელში სანთლები ეჭირათ.
ჯანდაცვის სამინისტროს ბოლო მონაცემების თანახმად, სასამართლო-სამედიცინო ექსპერტიზა ჩაუტარდა 2 317 სამხედრო მოსამსახურის ცხედარს. მათ შორის არიან ამ დრომდე არაიდენტიფიცირებულებიც. სომხური მხარე ჯერ კიდევ ელოდება ბრძოლის ველზე დაღუპულთა ცხედრების გადმოცემას.
აქციის მონაწილეები ერევნის ცენტრში, თავისუფლების მოედანზე შეიკრიბნენ. იქ მიიტანეს ომში დაღუპული სამხედროების ფოტოსურათები.
შემდეგ, ანთებული ჩირაღდნებით გაიმართა ქალაქში მსვლელობა, რომლის დროსაც, ხმამაღლა კითხულობდნენ ყველა დაღუპული მებრძოლის სახელს.
მსვლელობის ორგანიზატორი 17 ოპოზიციური პარტია იყო, რომლებმაც ყარაბაღში საბრძოლო მოქმედებების შესახებ სამმხრივი შეთანხმების გაფორმებისთანავე დაიწყეს ქუჩის საპროტესტო აქციები. ისინი სომხეთის პრემიერ-მინისტრის გადადგომასა და მის მიერ ხელმოწერილი „სამარცხვინო“ დოკუმენტის დენონსაციას ითხოვენ.
თუმცა, მსხვერპლთა ხსოვნის დღეს, ოპოზიციონერებმა, როგორც ადრევე განაცხადეს, არ გააკეთეს არანაირი პოლიტიკური განცხადება.
ცერემონია ძველ ხელნაწერთა ინსტიტუტის „მატენადარანის“ შენობასთან დასრულდა. ამ ადგილას აქციის მონაწილეებმა განაცხადეს, რომ კვირას, ეკლესიებში, დაღუპულთა ხსოვნისადმი მიძღვნილი წირვა გაიმართება.
