საქართველომ არაბთა გაერთიანებულ საამიროებთან ეკონომიკურ პარტნიორობაზე შეთანხმება დადო. დუბაიში ვიზიტით მყოფმა ეკონომიკისა და მდგრადი განვითარების მინისტრმა, ლევან დავითაშვილმა საგარეო ვაჭრობის საკითხებში არაბთა გაერთიანებული საამიროების სახელმწიფო მინისტრთან ერთად საქართველოსა და საამიროებს შორის შეთანხმებას (CEPA) ხელი გუშინ მოაწერა.
“ეკონომიკური პარტნიორობის შესახებ შეთანხმება ქვეყნისთვის ხელსაყრელი დოკუმენტია, არაბული ბიზნესისთვისაც საინტერესოა საქართველო, ქვეყანას აქვს თავისუფალი ვაჭრობის შეთანხმება ორ ძალიან მნიშვნელოვან ეკონომიკურ ბლოკთან – ეს არის როგორც ევროკავშირის ქვეყნები, ისე ჩინეთი და რა თქმა უნდა, ეს განსაკუთრებულ შესაძლებლობებს აძლევს საქართველოში ინვესტორ კომპანიებს, ამ ორი მსხვილი ბაზრის შედეგებით ისარგებლოს”. – აღნიშნა დავითაშვილმა ცერემონიის შემდეგ გამართულ პრესკონფერენციაზე.
დამსწრეებს ვიდეოზარით ჩაერთო საქართველოს პრემიერმინისტრი ირაკლი ღარიბაშვილი. მისი თქმით, არაბთა გაერთიანებულ საამიროებთან, როგორც ერთ-ერთ წამყვან სახელმწიფოსთან, ურთიერთობათა განმტკიცება “ჩვენთვის ძალიან მნიშვნელოვან პრიორიტეტს” წარმოადგენს.
“არაბთა გაერთიანებული საამიროები ყოველთვის იდგა ინოვაციისა და პროგრესის სათავეებთან, რაც მომავლის იმედისა და ოპტიმიზმის მნიშვნელოვანი საწინდარია.” – თქვა საქართველოს პრემიერმა.
● მთავრობის პრესსამსახურის მიერ გავრცელებული ინფორმაციით, შეთანხმების ძალაში შესვლის შემდგომ საქართველოსთვის საიმპორტო ტარიფი მოიხსნება საქონლისა და ცხვრის ხორცზე, თაფლზე, თხილზე, მინერალურ წყალსა და სხვა პროდუქტებზე.
● საერთო ჯამში, საამიროებში ექსპორტისას ქართული პროდუქციის 97.5% ტარიფის გარეშე შევა.
● 5-წლიანი გარდამავალი პერიოდის გასვლის შემდეგ, სატარიფო შეღავათი უფრო მეტ პროდუქციაზე გავრცელდება.
● თავისუფალი ვაჭრობის შესახებ საქართველოსა და არაბთა გაერთიანებულ საამიროებს შორის მოლაპარაკება 2020 წლის დეკემბერში დაიწყო.
